Okuti Okutomba Ovitumino Ove Utyiyele?
“Ove [Jesus] uyele okutomba ovitumino.” —HEBREUS 1:9.
1. Oityi Jesus alongesile konthele yohole?
OPO alekese nawa okuti ohole yakolela, Jesus Kristu wapopila ovalongwa vae okuti: “Ame ndyimupa otyitumino otyipe, tyokuti kalei nohole pokati kenyi, ngetyi ame ndyimuhole, nonwe kalei nohole kese umwe namukuavo. Ovanthu aveho mavaimbuka okuti muvalongwa vange inkha mukala nohole pokati kenyi.” (João 13:34, 35) Jesus watumine ovalanduli vae vakale nohole yotyotyili kese umwe namukuavo. Ohole oyo, oyo enyingilikilo liavo. Tupu Jesus wevepopilile okuti: “Tualeiko okukala nohole nonondyale mbenyi nokuitilako vana vemuyeva.”—Mateus 5:44.
2. Oityi ovalanduli va Kristu vesukisa okuyala?
2 Opo alonge ovalongwa vae konthele yohole, tupu Jesus wevelongesa oityi vena okuyala. Tyapopiwa konthele ya Jesus okuti: “Ove uhole ouviuki, iya uyele okutomba ovitumino ine [ovivi].” (Hebreus 1:9; Salmo 45:7) Otyo tyilekesa okuti onthue kamatulilongesa vala okukala nohole youviuki, mahi tupu tuna okuyala onkhali, ine okutomba ovitumino. Tyakolela okutala etyi apostolu João apopia konthele yotyo okuti: “Kese una ulinga onkhali tupu ukahi nokutomba ovitumino, iya ngotyo onkhali okutomba ovitumino.”—1 João 3:4.
3. Onthele ei maipopi ovipuka patyi konthele yokutomba ovitumino?
3 Otyiwa onthue Vakristau tulipule okuti, ‘Ame ndyiyele okutomba ovitumino?’ Tutalei oñgeni matulekesa okuti tuyele ovivi, mononthele ononkhuana mbomuenyo: (1) oñgeni tutala okunwa unene ovikunwa vikoleswa, (2) oñgeni tutala omaumbanda, (3) oñgeni tutala oundalelapo, (4) noñgeni tutala vana vehole okutomba ovitumino.
Uhakale Omupika Wovikunua
4. Oityi ankho Jesus apondolela okulondola vakuavo nomutima wasukuka konthele yokunwa unene?
4 Jesus pamwe ankho unwa ovinyu, okuimbuka otyali tya Huku. (Salmos 104:14, 15) Anthi, oe nalumwe anwine unene, okutomba otyali otyo. (Provérbios 23:29-33) Ngotyo, Jesus ankho upondola okulondola vakuavo nomutima wasukuka konthele yotyituwa otyo. (Tanga Lucas 21:34.) Okunwa unene tyipondola okutuala kononkhali ononene. Moluotyo, apostolu Paulu wahoneka okuti: “Muhakolwei novinyu, ituala kovivi, mahi kalei tyelula ospilitu.” (Efésios 5:18) Oe tupu wapopila ovakai ovakulu mewaneno opo ‘vahakale ovapika vovinyu.’—Tito 2:3.
5. Oityi vokunwa ovikunwa vikoleswa vesukisa okulipuka?
5 Inkha ove waholovona okunwa ovikunwa vikoleswa, otyiwa ulipule okuti: ‘Ame ndyina olusoke ngo lwa Jesus konthele yokunwa unene? Inkha tyesukisa okulondola vakuetu konthele oyo, mandyipopi nomutima wasukuka? Okuti ame ndyinwa pala okutila omasukalalo ine ovitateka? Kese simano ndyinwa etyi tyilifuepi? Tyina umwe amphopila okuti ndyinwa unene, tyinkhalesa ñgeni? Okuti ndyiliamena ine alo umwe ndyinumana?’ Okuliyeka okukala ovapika vovikunwa, tyinyona ounongo wetu wokupunga ovipuka nokulinga omatokolo onondunge. Ovalanduli va Kristu valinga ononkhono mbokuyunga nawa onondunge mbavo.—Provérbios 3:21, 22.
Lityilika Ovituwa Viomaumbanda
6, 7. (a) Oñgeni Jesus alingile Satanasi novilulu? (b) Omokonda yatyi omaumbanda eliyandyanena unene hono?
6 Etyi Jesus ali pano pohi ankho uyele Satanasi novilulu. Oe waanyene okuhongiliyua na Satanasi okunyona oukuatyili wae. (Lucas 4:1-13) Jesus tupu waimbukile nokuanya elunguko evi liokuhongiliya omalusoke ae nevi alinga. (Mateus 16:21-23) Jesus wavatelele ovaviuki okuyovoka metumino evi liovilulu.—Marcos 5:2, 8, 12-15; 9:20, 25-27.
7 Etyi Jesus avialekwa Kouhamba mo 1914, oe wasukukisa eulu kehongiliyo lia Satanasi novilulu. Pahe Satanasi una ehando enene “liokuyondya ovanthu aveho.” (Revelação 12:9, 10) Moluotyo, okusuka nomaumbanda tyikahi nokuliyandyana, nokuliyawisa unene. Oityi tupondola okulinga opo tuliamene?
8. Oityi kese umwe ena okulipula konthele yokuholovona ovitalukiso?
8 Ombimbiliya itulondola neyandyuluko konthele yoviponga vioumbanda. (Tanga Deuteronômio 18:10-12.) Hono, Satanasi novilulu viae vahongiliya omalusoke ovanthu okuundapesa onosinema, nomikanda, nono video game, opo ayandyanese omaumbanda. Mahi, tyina tuholovona ovitalukiso, tuesukisa okulipula okuti: ‘Monohanyi mbokualamba okuti naholovona okutala onosinema, no TV, nono video game, nomikanda ine ovipuka ovikuavo viomaelema viyolesa? Okuti tupu nasokale oñgeni Jeova elitehelela konthele yovitalukiso ndyiholovona? Inkha neliyeka okukengelelwa novipuka ovio via Satanasi, okuti ohole ndyina na Jeova novitumino viae viaviuka mavimphe ondundo yokutokola okuviyekapo?—Atos 19:19, 20.
Tavela Elondolo lia Jesus Konthele Youndalelapo
9. Oñgeni omunthu apondola okukala nohole yokutomba ovitumino?
9 Jesus waamenene ovitumino via Jeova konthele yotyihola. Oe wati: “Kamunetange okuti una wevetunga tunde ponthyimbi, wevetungile omulume nomukai. Iya ati, ‘Moluotyo omulume masipo he na ina, eliwaneka nomukai wae, iya ovo vevali avakala ohitu ike vala?’ Ngotyo, kavakala vali ovanthu vevali, anthi vakala ohitu ike vala. Moluotyo, etyi Huku apaka kokanga ike, omunthu ehetyiyapule.” (Mateus 19:4-6) Jesus ankho utyii okuti evi tutala vipondola okuhongiliya omutima wetu. Melongomona liae lio Komphunda, oe wati: “Muetyiiva etyi tyapopiwa okuti: ‘Uhalinge oumbalehi.’ Anthi, ame ndyimupopila okuti kese una utualako okutala omukai, nepeleyo lio kumuhanda, ngotyo momutima walingale nae oumbalehi.” (Mateus 5:27, 28) Tyotyili, vana vehetavela elondolo lia Jesus, vekahi nokukala nohole yokutomba ovitumino.
10. Popia ongeleka ilekesa okuti omunthu upondola okuyekapo otyituwa otyivi tyokutala ovanthu vekahi muhoyo.
10 Satanasi uundapesa omikanda no nosinema mbovanthu vemuhoyo opo ahongiliye ovanthu okulinga oundalelapo. Ouye uno weyula ovipuka ovio. Vana vevitala tyivepuiya unene okuvinyima momitima viavo. Vapondola alo umwe okutyiliya okutala ovanthu vemuhoyo. Tala etyi tyaendele Nomukristau umwe. Oe wati: “Ame ankho ndyitala tyaholama onosinema mbovanthu vemuhoyo. Andyihimbika okusoka kouye welikalela no wovaumbili va Jeova. Ame ankho ndyityii okuti otyituwa otyo otyivi, mahi tupu ankho ndyisoka okuti Huku nkhele metavela ovilinga viange.” Oityi tyapilulula olusoke luomukuatate oo? Oe wati: “Namphila otyipuka otyo nalinga ankho katyaviukile, natokola okukapopia novakulu vewaneno konthele yotyitateka tyange.” Okuhulililako, omukuatate ayekepo otyituwa tyae otyo otyivi. Tupu wati: “Etyi nasukukisa omuenyo wange konkhali oyo, pahe andyilitehelela okuti tyotyili ndyina omutima wasukuka.” Vana velilonga okuyala okutomba ovitumino, vesukisa okulilonga okuyala okutala omikanda no nosinema mbovanthu vahavalele.
11, 12. Oñgeni tupondola okulekesa okuti tuyele okutomba ovitumino pokuholovona oviimbo?
11 Onondaka mboviimbo, mbupondola okuhongiliya unene omalusoke etu, nomitima vietu. Otyiimbo otyipuka otyiwa tuapewa na Huku, iya viundapeswa mefendelo liotyotyili mokueenda kuomanima omanyingi. (Êxodo 15:20, 21; Efésios 5:19) Mahi, ouye omuvi wa Satanasi waetako oviimbo vinkhimaneka oundalelapo. (1 João 5:19) Oñgeni moimbuka inkha oviimbo utehelela mavikunyono ine kamavikunyono?
12 Tete una okulipula okuti: ‘Okuti oviimbo ndyitehelela vinkhimaneka ononkhia, noumbalehi, noundalelapo, nokuhingana Huku? Inkha ndyitangela omunthu onondaka mboviimbo viimwe, oe maimbuka okuti okutomba ovitumino ame ndyityiyele, ine onondaka mambulekesa okuti omutima wange ukahi nokusila?’ Onthue katupondola okuyala okutomba ovitumino, inkha tutehelela oviimbo vinkhimaneka ovipuka viailikwa movitumino. Jesus wati: “Ovipuka vipopiwa nomulungu, vitunda momutima. Iya ovipuka ovio, ovio visilisa omunthu. Mongeleka, momutima omo mutunda omalusoke omavi, ngokuipaa, nomaumbalehi, nomaundalelapo, nomaumphulu, nokuava omaumbangi omatutu, nomahingano.”—Mateus 15:18, 19; Tiago 3:10, 11.
Kala Nga Jesus Konthele ya Vana Vehole Okutomba Ovitumino
13. Oñgeni Jesus atala vana vatualako okulinga onkhali tyihelivele?
13 Jesus wati oe ankho weya okuvatela ovakuankhali, ine vokutomba ovitumino, opo velivele. (Lucas 5:30-32) Iya oñgeni ankho atala vana vakakatela movituwa viavo ovivi? Jesus waavele omalondolo atona konthele yokuhongiliyua novanthu ovo. (Mateus 23:15, 23-26) Oe tupu wapopile neyandyuluko okuti: “Haaveho ko vati ‘Tatekulu, Tatekulu,’ mavakanyingila mouhamba wo keulu. Mukanyingila vala una ulinga ehando lia Tate yange uli keulu. Ovanyingi monthiki oyo [tyina Huku amaetako ekoyeso], mavakati ‘Tatekulu, Tatekulu, katualongesile menyina liove, katuapayele ovilulu menyina liove, nokulinga ovipuka ovinyingi vihuvisa menyina liove?’” Anthi, makaanya vana vatualako okutomba ovitumino tyehelivele, evepopila okuti: “Tundei ponthele yange.” (Mateus 7:21-23) Omokonda yatyi ovanthu ovo makavakoyesilwa ngotyo? Omokonda vetupu onthilo na Huku, iya vamonesa vakuavo ononkhumbi novivi valinga.
14. Omokonda yatyi vokutualako nokulinga onkhali tyehelivele vapolelwa mewaneno?
14 Ondaka ya Huku ipopia okuti vana valinga onkhali tyehelivele vena okupolwa mewaneno. (Tanga 1 Coríntios 5:9-13.) Otyo tyesukisa mokonda yomahunga aa etatu: (1) opo enyina lia Jeova lihapopiwe omapita, (2) opo otyituwa otyo tyiheliyandyane mewaneno, (3) nokukuatesako una walinga onkhali opo elivele.
15. Inkha tuhanda okutualako nekolelo mu Jeova, omapulo patyi akolela tuna okulipula?
15 Okuti onthue tuna olusoke lwa Jesus konthele ya vana vayekapo ovitumino? Onthue tuesukisa okusoka komapulo aa: ‘Okuti ndyiholovona okukala apeho nomuthu wapolua mewaneno ine welipola oe munene mewaneno lio Vakristau? Iya inkha omunthu oo ombunga yenge mahi kakala meumbo liange? Otyitataka otyo tyipondola okulola ohole yetu youviuki nekolelo lietu ku Huku.a
16, 17. Otyitateka patyi tyepuiya tyaendele nomphange umwe Omukristau? Oityi tyemuvatela okuendela motyitumino konthele yovokuhelivele vapolwa mewaneno?
16 Tala ongeleka yomphange umwe una omona omukulu ankho uhole Jeova. Mahi, konyima alingi ovivi ehelivele. Moluotyo apolwa mewaneno. Omphange yetu ankho uhole Jeova, mahi tupu ankho uhole omona wae, iya akala notyitateka otyinene tyokulandula otyitumino Tyovihonekwa tyokulityilika okukala nomunthu wapolua mewaneno.
17 Elondolo patyi ove ñgeno waavela omphange oo? Omukulu umwe weuaneno wemukuatesako okuimbuka okuti Jeova ankho wanoñgonoka omwihamo wae. Omukuatate ati soka komwihamo Jeova akalele nao etyi omona wae oandyu emupilukilapo. Omukulu weuaneno emukuatesako okusoka okuti namphila Jeova anoñgonoka omuihamo oo, oe uhanda una walinga onkhali tyihelivele apolwe mewaneno. Oe wetavela otyitumino otyo apopilwa konthele ya vana vapolwa mewaneno.b Oukuatyili oo, uhambukiswa omutima wa Jeova.—Provérbios 27:11.
18, 19. (a) Okulityilika okukala na vana veyele ovitumino tyilekesa okuti onthue tuyele tyi? (b) Okukala ovakuatyili na Huku neongano liae tyieta tyi?
18 Inkha ukala notyitateka ngotyo, mbambavo hinangela okuti Jeova una okankhenda nove. Tyina uyekapo okukala na una watunda mewaneno ine wapolwamo, ove ukahi nokulekesa okuti uyele ovituwa novipuka vilingisa omunthu okupolwa mewaneno. Tupu ukahi nokulekesa okuti uhole omunthu oo walinga onkhali iya uhanda okumulingila etyi tyaviuka. Ekolelo liove ku Jeova lipondola okukuatesako una walinga onkhali okulivela akondoka ku Jeova.
19 Omunthu umwe wapolelue mewaneno, iya konyima elivele, wahoneka okuti: “Nahambukwa unene mokonda Jeova uhole unene ovanthu vae iya uhanda eongano liae litualeko tyasukuka. Etyi ovanthu vokondye vasoka okuti katyaviukile, tyotyili tyesukisa, tupu otyiwa okutyilinga.” Ove usoka okuti ñgeno omunthu oo wakalele nolusoke ngoolo, inkha ovanthu mewaneno, nombunga yae vatuaileko okukala nae apeho namphila apolwa mewaneno? Okulandula otyitumino Tyovihonekwa konthele yovokuapolwa mewaneno tyilekesa okuti tuna ohole youviuki, nokuimbuka okuti Jeova watokala okutuavela ovitumino konthele yovituwa.
“Yala Ovivi”
20, 21. Omokonda yatyi tyakolela okulilonga okuyala okutomba ovitumino?
20 Apostolu Petulu walondola okuti, “Lungukei, nokutala nawa.” Omokonda yatyi? Mokonda “ondyale yenyi Eliapu, likahi nokuenda-enda ngatyina onkheyama ikoma okuovola ou maili.” (1 Pedro 5:8) Okuti ove maili? Otyo tyitei koñgeni ulilongesa okuyala okutomba oviatumino.
21 Okuyala ovivi katyapepukile. Mokonda onthue tuatyitilwa monkhali, nokukahi mouye utuhongiliya omahando olutu. (1 João 2:15-17) Mokuhetekela Jesus Kristu, nokukala noholele onene na Jeova Huku matyitukatesako okuyala okutomba ovitumino. Tutokelei okuyala ovivi, nokukala nonthumbi yokuti Jeova “wamena . . . vana vakolela mwe. Uveyovola pomaoko onondingavivi.”—Salmo 97:10.
[Onondaka Poutoi]
a Opo unoñgonoke vali konthele oyo, tala o Sentinela 15 ya Setembro yo 1981, pomafo 26-31.
b Tupu tala o Sentinela 15 ya Janeiro yo 2007, pomafo 17-20.
Oñgeni Ove Mokumbulula?
• Oityi matyitukuatesako okutala nawa otyituwa tyetu konthele yovikunwa vikoleswa?
• Oityi tupondola okulinga opo tulityilike ovituwa viomaumbanda?
• Omokonda yatyi okutala omikanda no nosinema mbovanthu vahavalele otyiponga?
• Oñgeni tulekesa okuti tuyele okutomba ovitumino tyina umwe tuhole apolwa mewaneno?
[Olutalatu pefo 29]
Inkha ove waholovona okunwa ovikunwa vikoleswa, oityi wesukisa okulipula?
[Olutalatu pefo 30]
Tala nawa omahongaiyo a Satanasi movitalukiso
[Olutalatu pefo 31]
Okutala omikanda no nosinema mbovanthu vahavalele, tyikalesa nohole yatyi?