Tavela Ospilitu Ya Huku, Uhetavele Youye

“Onthue katuatambulile ospilitu youye, anthi tuatambula ospilitu ya Huku, opo tunoñgonoke ovipuka Huku etuavela noluembia.”—1 CORÍNTIOS 2:12.

1, 2. (a) Omonkhalelo patyi Ovakristau votyotyili vekahi movita? (b) Omapulo patyi matulilongesa?

OVAKRISTAU votyotyili vekahi movita! Ondyale yetu ina ononkhono ononene, nelunguko movivi, nokuhanda vala ovilwa. Oe una eliva aundapesa nawa likahi nokunyona ovanthu ovanyingi. Mahi, onthue katuesukisile okusoya ine okusoka okuti tutupu ombatelo. (Isaías 41:10) Onthue tuna ombatelo ihafindwa nokuapama unene.

² Ovita vietu kavimoneka komaiho, ovio paspilitu. Ondyale yetu o Satanasi Eliapu, iya otyiti tyotete aundapesa “ospilitu youye.” (1 Coríntios 2:12) Ondyakulilo yakolela ituamena kospilitu oyo, ospilitu ya Huku. Opo tuhupe movita ovio, iya atutualako noupanga omuwa na Jeova, tuesukisa okuita ospilitu ya Huku, nokukala notyinyango tyayo momuenyo wetu. (Gálatas 5:22, 23) Mahi, ospilitu youye oityi, iya oñgeni ihongiliya? Oñgeni matuimbuka inkha ospilitu youye ikahi nokutuhongiliya? Iya oityi tulilongesila ku Jesus konthele yokutambula ospilitu ya Huku, nokuanya ospilitu youye?

Oityi Ospilitu Youye Yeliyandyanena Unene?

3. Ospilitu youye oityi?

³ Ospilitu youye uno yahimbikwa na Satanasi “omutumini wouye uno”, iya iliyele nospilitu sandu ya Huku. (João 12:31; 14:30; 1 João 5:19) Ospilitu oyo, oyo itumina ouye, nokuhongiliya ovanthu muetyi valinga. Ononkhono ombo mbuhindila ovanthu okulwisa ehando lia Huku.

4, 5. Oñgeni ospilitu ya Satanasi yeliyandyana unene?

⁴ Oñgeni ospilitu ya Satanasi yeliyandyana unene? Tete, Satanasi, wayondya Andau na Eva motyikunino tyo Endene. Oe wemupopila okuti okuhatuminwa na Huku matyikalesa vali nawa omuenyo wavo. (Gênesis 3:13) Satanasi wakemba ngatyi! (João 8:44) Iya aundapesa omukai opo ahongiliye Andau okuhetavela ku Huku. Mokonda yeholovono lia Andau, ovanthu valandeswa konkhali, avapiñgana eyembelo liokulandula ospilitu yokuhetavela ya Satanasi.—Tanga Efésios 2:1-3.

⁵ Tupu Satanasi wahongiliya onoandyu ononyingi, ambukala ovilulu. (Revelação 12:3, 4) Otyo tyamoneka kononthiki mba Noe etyi Ombila onene nkhele iheneloke. Onoandyu ombo mbetavela okuti mavakala vali nawa inkha vayekapo ovilinga viavo keulu, aveya pano pohi okulinga omahando avo ahaviukile. (Judas 6) Onoandyu ombo mbakondoka keulu, ambulipake kumwe na Satanasi “okuyondya ovanthu aveho.” (Revelação 12:9) Hono ovilulu vitualako okuhongiliya ovanthu.—2 Coríntios 4:4.

Okuti Ospilitu Youye Ikahi Nokukuhongiliya?

6. Oñgeni ospilitu youye ipondola okutuhongiliya vala?

⁶ Ovanyingi kavetyii oñgeni Satanasi ayondya ovanthu, mahi, Ovakristau votyotyili valongeswa no Mbimbiliya vetyii oñgeni etyilinga. (2 Coríntios 2:11) Tyotyili, inkha katuliyeke ospilitu youye kamaituhongiliya. Tutalei omapulo ekuana maetukuatesako okutala inkha tukahi nokuhongiliyua nospilitu ya Huku ine o youye.

7. Omonkhalelo patyi imwe Satanasi aovola okutuyapula ku Jeova?

⁷ Ovitalukiso ndyiholovona vilekesa tyi konthele yange? (Tanga Tiago 3:14-18.) Satanasi wovola okutuyapula ku Huku mokutuhindila okukala nohole youngangala momutima. Eliapu lityii okuti Jeova uyele kese umwe uhole oungangala. (Salmo 11:5) Moluotyo, Satanasi uundapesa omikanda, no nosinema, noviimbo, no novideogame, mbumwe mbulekesa oundalelapo noungangala, pala okuhongiliya omahando etu. Satanasi uhambukwa unene tyina omutima wetu ukala nohole novipuka ovivi aetako, namphila nkhele tuhole ovipuka viaviuka.—Salmo 97:10.

8, 9. Omapulo patyi tuesukisa okulilinga konthele yovitalukiso?

⁸ Anthi, ospilitu ya Huku ilunda vana veitambula okukala ovasukuki, no vanambembwa, nokukala unene okankhenda. Tuesukisa okulipula okuti: ‘Ovitalukiso ndyiholovona vinkhalesa novituwa oviwa?’ Ounongo wokeulu “utupu emphinia.” Vana vahongolelwa nospilitu ya Huku kavaivisa ousukuke nombembwa kuvakuavo, mahi tyina vekahi aveke momaumbo avo avatale oungangala, noundalelapo.

⁹ Jeova uhanda ovanthu vafende vala kwe. Mahi, Satanasi mahambukwa alo umwe inkha tumufenda vala otyikando tyike, ngetyi ahandele okulinga na Jesus. (Lucas 4:7, 8) Tuesukisa okulipula okuti: ‘Ovitalukiso ndyiholovona vinkhuatesako okufenda vala Jeova? Evi ndyiholovona vinthyindila okutavela ine okuanya ospilitu youye? Okuti nesukisa okupilulula onkhalelo yange yokuholovona ovitalukiso?’

10, 11. (a) Ouye una olusoke patyi konthele yomalumono? (b) Ondaka ya Huku itulunda okukala nolusoke patyi?

¹⁰ Oñgeni ndyitala omalumono? (Tanga Lucas 18:24-30.) Ospilitu youye ihindila ovanthu “epeleyo liomaiho,” mokuvelunda okukala nelungavi liomalumono. (1 João 2:16) Ihongiliya ovanyingi okuovola vala okukala ovahona. (1 Timóteo 6:9, 10) Ospilitu oyo ituhindila okutavela okuti okuongiya omalumono, matyieta epamo liahapu. (Provérbios 18:11) Mahi, inkha tuyeka ohole yonombongo ivilepo ohole tuna na Huku, Satanasi metufindi. Onthue tuesukisa okulipula okuti: ‘Momuenyo wange nasukalala vala nokuovola oulenga nomalumono?’

¹¹ Mahi, Ondaka ya Huku yahonekwa nombatelo yospilitu, ituavela ondundo yokukala nolusoke luapola pokati konthele yonombongo, nokuundapa nombili opo tulitekule nokutekula ombunga yetu. (1 Timóteo 5:8) Ospilitu ya Huku ikuatesako vana veitambula okukala notyali nga Jeova. Ovanthu ovo veiwe ngovanthu votyali, kavakevela vala okupewa. Vaavela vali esilivilo ovanthu tyipona ovipuka, nokuna ehambu liokuava etyi vena. (Provérbios 3:27, 28) Ovanthu ovo kavayeke okuovola onombongo tyikale komutwe wokuumbila Jeova.

12, 13. Tyelikalela nospilitu youye, oñgeni ospilitu ya Huku itulunda okulinga oviwa?

¹² Ovituwa viange vilekesa okuti ndyihongolelwa nospilitu patyi? (Tanga Colossenses 3:8-10, 13.) Ospilitu youye yovola vala ovilinga violutu. (Gálatas 5:19-21) Ospilitu oyo kaiovola okutuhongiliya tyina ovipuka vikahi nokueenda nawa, mahi, otyina vihaende nawa, mongeleka, tyina omukuatate ine omphange Omukristau etunianga, nokutupopia omapita, ine okutulinga otyipuka otyivi unene. Tupu, tyina tukahi atuike meumbo, matyimoneka inkha tuna ospilitu ya Huku ine o youye. Tuesukisa okulinoñgonoka nawa. Lipula ove muene okuti: ‘Monohanyi epandu mbokualamba, okuti ovituwa viange vikahi vali ngo via Kristu, ine ndyikahi nokukondoka konkhalelo ombi yokupopia novituwa nasilepo?’

¹³ Ospilitu ya Huku ipondola okutuvatela ‘okulilula omunthu wokohale novituwa viae’ nokulivaleka ‘omunthu omupe.’ Otyo matyitukuatesako okukala vali nohole, nomutima omuwa. Matukala tyafuapo pala okulievela pokati, namphila tuna ehunga liokunumana. Tyina tulingwa ovivi onthue katukumbulula ‘novivi viungisa omutima, nokunumana, nonyengo onene, nonondyaya, nokupenya.’ Anthi, tulinga ononkhono ‘mbokulinga okankhenda.’—Efésios 4:31, 32.

14. Oñgeni ovanyingi mouye vatala Ondaka ya Huku?

¹⁴ Okuti ndyina onthilo nohole yovitumino Viombimbiliya? (Tanga Provérbios 3:5, 6.) Ospilitu youye ihongiliya okuanya Ondaka ya Huku. Vana vahongiliyua nospilitu oyo, kavetavela onondonga mbo Mbimbiliya vasoka okuti kambaviukile, anthi, vaholovona okulandula oviso nomalongeso ovanongo vouye. (2 Timóteo 4:3, 4) Vamwe kavetavela Ondaka ya Huku aiho. Ovanthu vatyo ovo, vatomba esilivilo lio Mbimbiliya notyili ipopia, okukala ovanongo komaiho avo muene. Vatomba ovitumino viayo viasukuka konthele youmbalehi, novalume okulala poyavo, nokulihenga. Valongesa okuti “otyiwa otyivi, iya otyivi otyiwa.” (Isaías 5:20) Okuti tukahi nokuhongiliyua nospilitu oyo? Okuti tyina tuvasiwa novitateka tuyumba onthumbi mounongo wovanthu, no momalusoke etu muene? Ine tulinga ononkhono mbokulandula onondonga mbo Mbimbiliya?

15. Oityi tuesukisa okulinga, tyipona okukolela mounongo wetu muene?

¹⁵ Ospilitu ya Huku itulunda okukala nonthilo no Mbimbiliya. Ngo muhoneki wo salmu, onthue tutala ondaka ya Huku ngatyina otyimimikilo tyonomphai mbetu notyimimi tyonondyila mbetu. (Salmo 119:105) Tuyumba onthumbi Mondaka yahonekwa ya Huku pala okutuvatela okupunga etyi tyaviuka netyi tyapenga, ha mounongo wetu muene. Katulongwa vala okukala nonthilo Nombimbiliya, mahi, tupu nokukala nohole novitumino via Huku.—Salmo 119:97.

Lilongesila Kongeleka ya Jesus

16. Okukala ‘nomutima wa Kristu’ tyakutikinya tyi?

¹⁶ Opo tutambule ospilitu ya Huku, tuna okulinga ononkhono mbokukala ‘nomutima wa Kristu.’ (1 Coríntios 2:16) Opo tukale “nolusoke ngo lwa Kristu Jesus,” tyesukisa okunoñgonoka onkhalelo yae yokusoka no yokulinga ovipuka, iya atumuhetekela. (Romanos 15:5; 1 Pedro 2:21) Tala ononkhalelo mbumwe tupondola okutyilinga.

17, 18. (a) Oityi tulilongesila ku Jesus konthele yelikuambelo? (b) Oityi tuesukisila ‘okutualako okuita’?

¹⁷ Likuambela okuita ospilitu ya Huku. Etyi nkhele ehenevasiwe novitateka, Jesus welikuambelele okuita ospilitu ya Huku opo imukuateseko. (Lucas 22:40, 41) Nonthue tuesukisa okuita ku Huku ospilitu sandu yae. Jeova uyavela otyali vana veiita nekolelo. (Lucas 11:13) Jesus wati: “Tualeiko nokuita, alo mupewa; tualeiko nokuovola, alo muvasa; tualeiko nokutotola, alo muyeululwa. Mokonda kese munthu wiita utambula, kese una wovola mavasi, iya kese una utotola maikuliluako.”—Mateus 7:7, 8.

¹⁸ Tyina tuovola ospilitu ya Jeova nombatelo yae, tuhayekeipo liwa okuiita. Hamwe tusukisa okulikuambela vali ovikando ovinyingi, nokupopia vali melikuambelo. Pamwe, Jeova uyeka vana velikuambela valekese inkha vesuka umwe netyi vekahi nokuita, nokutala inkha vena umwe ekolelo liokuti omalikuambelo avo maakumbululwa.a

19. Oityi Jesus alingaile apeho? Omokonda yatyi tuesukisila okumuhetekela?

¹⁹ Tavela Jeova muaviho. Jesus walingile apeho ovipuka vihambukiswa Tate yae. Nthiki imwe, Jesus wasokele monkhalelo yelikalela netyi Tate yae ankho ahanda konthele yokutetulula otyitateka tyimwe. Mahi, oe apopila Tate yae nonthumbi okuti: “Tyilingwe ngetyi ove uhanda, hangetyiko ame nahanda.” (Lucas 22:42) Lipula okuti: ‘Ndyitavela ku Huku alo umwe tyina kuame tyihapepukile?’ Okutavela ku Huku tyakolela opo tukale nomuenyo. Onthue tumutavela apeho mokonda oe Omupakeko wetu, Ondyivi-ndyivi Nomutekuli womuenyo wetu. (Salmo 95:6, 7) Natyike tyipondola okupingapo okutavela. Katupondola okupandwa na Huku, inkha katutavela.

20. Jesus wasukile vali natyi? Oñgeni tupondola okumuhetekela?

²⁰ Noñgonoka nawa Ombimbiliya. Tyina Jesus ankho eliyakulila komahongiliyo a Satanasi, ankho utumbula Ovihonekwa. (Lucas 4:1-13) Pokukumbulula onondyale mbae vonongeleya, Jesus waundapesa Ondaka ya Huku. (Mateus 15:3-6) Jesus wasukile vali nokunoñgonoka ovitumino via Huku nokuvifuisapo. (Mateus 5:17) Nonthue tuhanda okutualako okuyulisa omutima wetu Nondaka ya Huku ipameka ekolelo. (Filipenses 4:8, 9) Okuvasa omuvo wokulilongesa atuike ine onombunga, ku vamwe puonthue tyipondola okupuiya. Mahi, omuwo katuuvasi vala, tuna okuholovona.—Efésios 5:15-17.

21. Ononthele patyi mambutuvatela okunoñgonoka vali nawa Ondaka ya Huku nokuyundapesa?

²¹ “Omupika Wekolelo no Kualunguka” waonganeka onthiki Yelilongeso Liombimbiliya Mombunga okutuvatela opo tutyivile okulilongesa atuike, nombunga kese simano. (Mateus 24:45) Okuti ukahi nokuundapesa nawa onthiki oyo? Opo tyikuvatela okukala nomutima ngo wa Kristu, okuti ovikando vimwe melilongeso liove upopiamo etyi Jesus alongesile? Upondola okuundapesa o Índice das Publicações da Torre de Vigia, opo uvase omikanda muvasiwa etyi uhanda. Mongeleka, tunde mo 2008 alo mo 2010, omukanda ou, waeta ononthele 12 mbati, “O Que Aprendemos de Jesus.” Upondola okuholovona pononthele ombo opo ulilongese. Tunde mo 2006, o Despertai! yeeta onthele yati “Qual É a sua Resposta?” Onthele yalingwa opo ikukuateseko okuyawisa nokunoñgonoka vali nawa Ondaka ya Huku. Omokonda yatyi pamwe uhakutikinyina ononthele mbatyo ombo Melilongeso liove Liombimbiliya Mombunga?

Onthue Tupondola Okufinda Ouye

22, 23. Oityi tuna okulinga opo tufinde ouye?

²² Opo tuhongolelwe nospilitu ya Huku, tuna okuanya ospilitu youye. Okuanya oko kakuapepukile. Tyesukisa okulinga ononkhono, okulwa unene. (Judas 3) Mahi tupondola okufinda! Jesus wapopilile ovalongwa vae okuti: “Mouye mamumono ononkhumbi, mahi kolei omutima! Ame nafinda ouye.”—João 16:33.

²³ Nonthue matufindi ouye inkha tuanya ospilitu yao, nokulinga ononkhono opo tutambule ospilitu ya Huku. Tyotyili, “inkha Huku ukahi nonthue, olie metuutukila?” (Romanos 8:31) Okutambula ospilitu ya Huku, nokulandula ehongolelo liayo ngetyi Ombimbiliya yapopia, matuvasi ehambu, nombembwa, nonthumbi yokupewa omuenyo uhapu mouye omupe ukahi pahe popepi.

[Onondaka Poutoi]

Okuti Ove Utyihinangela?

• Oityi ospilitu youye yayandyanena unene?

• Omapulo patyi ekuana tuna okulipula onthue muene?

• Ovipuka patyi vitatu tulilongesila ku Jesus opo tutambule ospilitu ya Huku?

[Olutalatu pefo 10]

Oñgeni onoandyu mbumwe mbakala ovilulu?

[Olutalatu pefo 12]

Satanasi uundapesa ospilitu youye opo atumine ovanthu, mahi onthue tupondola okulityilika ehongiliyo liae