Ombimbiliya Tyina Ipopia Konthele Younongo Wouye Yafuapo
“Hekuhonekelele alo pahetyino onondonga, nenoñgonoko, opo ndyikulekese otyili tyonondaka mbaviuka, opo utyivile okukumbulula onondaka mbotyotyili?”—PROVÉRBIOS 22:20, 21.
OÑGENI OMBIMBILIYA YELIKALELA? Omikanda viokohale pamwe kavipopi otyili, nokuna omalusoke ahaviukile ehole okupilululwa opo elikuate nounongo wouye hono. Alo umwe hono, ovahoneki vesukisa okupilulula omikanda viavo opo vilikuate novipuka ovipe vanoñgonoka vali nawa. Mahi, Ombimbiliya ipopia okuti muene wayo, Omutungi, iya Ondaka yae “itualako apeho.”—1 Pedro 1:25.
ONGELEKA: Ovitumino Viapelwe Moisesi, ankho vituma ova Isilayeli okuti tyina vaya kohika vena okuheya etoto “kokule yonthanda” avahihilako. (Deuteronômio 23:12, 13) Inkha ova Isilayeli vayama kotyivimbi ine otyinyama tyankhia, vena okulikoha nomeva. (Levítico 11:27, 28; Números 19:14-16) Omunthu wokuna otyilundu ankho una okukala kokule novanthu alo amoneka okuti waveluka.—Levítico 13:1-8.
OITYI ONONDOTOLO HONO VAPOPIA: Ovanthu vena okuhihila atyiho tyasila, nokukoha omaoko, nokukala kokule na vana vena ouvela ulitambuliswa, opo vakale nekongoko. Inkha petupu onondyuo mbokutalamena ine onomphangu ononkhuavo mbokupaka evi viasila, eongano Centros de Controle e Prevenção de Doenças, EUA, lituma okuti: “Tyina wenda kohika enda kokule ohihilako, tupu uhetyilingile popepi nomaande.” Eongano Liekongoko Mouye liati, okuhihila omatwii, tyitepulula unene omauvela otyihana. Omanima 200 konyima, onondotolo vanoñgonoka okuti vatambulisa omauvela ovanthu ovanyingi tyina vayama kotyivimbi avahakoho omaoko. Eongano Liekongoko Mouye, lipopia okuti okukoha omaoko “onkhalelo ongwa yokulityilika okutambulisa omauvela.” Iya konthele yokuyapula vana vena otyilundu ine omauvela omakuavo? O Jornale Saudi Medical yati: “Tyina ouvela umwe uhimbika okuipaa ovanthu, pamwe onkhalelo yaviuka yokutalameka ouvela oo, okupaka ovanthu vena ouvela oo kokule navakuavo.”
OITYI OVE USOKA? Okuti ukevelela omukanda omukuavo omukulu ukola ulikuate kumwe nounongo wouye hono? Ine Ombimbiliya vala?
[Onondaka Mbavilapo pefo 6]
“Tyihuvisa unene okutanga onondonga konthele yousukuki mbaavelwe pomuvo wa Moisesi.”—OMUKANDA MANUAL OF TROPICAL MEDICINE, WA DRS. ALDO CASTELLANI NA ALBERT J. CHALMERS