Lilongesa Ondaka Ya Huku

Oityi Tuesukisila Okuundapesa Enyina Lia Huku?

Onthele ei ipopia omapulo hamwe ove wasukalala nao, nokulekesa opi upondola okuvasa omakumbululo Mombimbiliya yove. Onombangi mba Jeova vena ehambu liokutomphola nove omakumbululo oo.

1. Omokonda yatyi Huku eliavelela enyina?

Tyotyili, ove uhanda okuihanwa enyina liove muene tyipona okuihanwa vala okuti, “mulume,” “mukuendye,” “muhikuena,” ine “mukai.” Enyina likuatesako okuimbuka omunthu. Huku wihanua omanyina enkhimano okuti “Ohamba Tatekulu,” “Huku Wepondolo Aliho,” no “Mutungi Omunene.” (Gênesis 15:2; 17:1; Eclesiastes 12:1) Mahi oe tupu, weliavela enyina opo tyitukuateseko okukala noupanga omuwa nae. Molunyaneka enyina lia Huku o Jeova.—Tanga Isaías 42:8.

Namphila ovapitiyi ovanyingi Vombimbiliya penyina lia Huku vapingiyapo “Huku” na “Tatekulu,” enyina olio livasiwa movihonekwa viotete Viombimbiliya vio Hebreu ovikando 7.000. Tyilityili, Huku uhanda enyina liae linoñgonokwe.—Tanga Isaías 12:4.

2. Omokonda yatyi okunoñgonoka enyina lia Huku tyakolela?

Okunoñgonoka enyina lia Huku hakulitumbula vala, tyihangununa okukala noupanga omuwa nae. Enyina Jeova lihangununa okuti “Oe Ufuisapo Etyi Ahanda.” Otyo tyituavela onthumbi yokuti Huku makala etyi ahanda opo afuisepo evangelo liae. Moluotyo, okunoñgonoka enyina lia Huku tyakutikinya okutavela okuti Huku makafuisapo omilao viae. (Salmo 9:10) Ovanthu vanoñgonoka enyina lia Huku, nokuliundapesa, vena ekolelo livelunda okuyumba onthumbi mu Jeova, nokumupaka tete momuenyo wavo. Huku maamena ovanthu ovo.—Tanga Salmo 91:14.

3. Oityi Huku ahandela enyina liae linoñgonokwe?

Huku uhanda ovanthu vemunoñgonoke kenyina mokonda tyiveetela ouwa. Otyo tyivekuatesako okukala omapanga a Huku, nekevelelo liomuenyo wahapu. Tyotyili, Jeova uhanda tunoñgonokese enyina liae!—Tanga João 17:3; Romanos 10:13, 14.

Jesus wanoñgonokesile enyina lia Huku pokulongesa ovanthu konthele yonondyila mba Huku, novitumino Viae, nomilao Viae. Hono, ovalanduli va Jesus vatualako novilinga viokunoñgonokesa enyina lia Huku movilongo aviho. Vetyilinga tyelikuata okapandi, mokonda “ovanthu vaihanwa enyina lia [Huku].”—Tanga Atos 15:14; João 17:26.

4. Oñgeni Huku mankhimaneka enyina liae?

Jeova Huku uhanda okunkhimaneka enyina liae mokonda likahi nokuundulwa. Mongeleka, ovanthu vamwe vapopia okuti haeko watunga ovipuka vina omuenyo, iya katuesukisile okumutavela. Vakuavo vapopia okuti Huku kesukile nonthue, iya oe ukahi nokuetako ononkhumbi. Ovanthu ovo vapenyesa enyina lia Huku. Mahi kamavatualako nokutyilinga. Huku makahanyako vana vehena onthilo nenyina liae.—Tanga Salmo 83:17, 18.

Jeova makankhimaneka enyina liae tyina Ouhamba wae wameya okumanako omautumini aeho ovanthu, nokuetela ovanthu ombembwa nepamo. (Daniel 2:44) Apa katutu, aveho mavanoñgonoka okuti Jeova oe Huku yotyotyili.—Tanga Ezequiel 36:23; Mateus 6:9.

Oityi wesukisa okulinga? Fuena ku Huku pokulilongesa Ondaka yae, nokuliwaneka novanthu vena ohole nae. Tyina Jeova amankhimaneka enyina liae, mahinangela ovaumbili vae vekolelo.—Malaquias 3:16.

Opo unoñgonoke vali konthele oyo, tala okapitulu 1 komukanda ou, walingua no Nombangi mba Jeova. Oityi Ombimbiliya Tyili Ilongesa?

[Olutalatu pefo 10]

Enyina lia Huku movihonekwa viotete vio Hebreu