Moisesi​—Ankho Una Ekolelo

EKOLELO OITYI?

Ombimbiliya ipopia okuti “ekolelo” liakutikinya okutavela nonthumbi otyipuka tyimwe okuti otyotyili, namphila nkhele wehetyeete. Omunthu wokuna ekolelo mu Huku una onthumbi yokuti makafuisapo omilao Viae.

OÑGENI MOISESI ALEKESILE OKUTI UNA EKOLELO?

Moisesi walingile omatokolo alekesile okuti ankho una onthumbi momilao via Huku. (Gênesis 22:15-18) Ankho wakalele nomphitilo yokukala nomuenyo omuwa mo Egitu, mahi asipo omphitilo oyo, “aholovonapo okutekulwa onya kumwe novanthu va Huku, tyipona okukala nehambu lionkhali lihasete okupwa.” (Hebreus 11:25) Okuti walingile etokolo olio tyahasokele nawa, iya konyima elivele? Au, mokonda Ombimbiliya ipopia okuti Moisesi “watuaileko nekolelo ngatyina eete Una uhamoneka komaiho.” (Hebreus 11:27) Moisesi kelivelele mokonda yomaholovono alingile mokonda ankho una onthumbi momilao via Huku.

Moisesi wakuatesileko vakuavo okukala nekolelo liapama mu Huku. Mongeleka, tala etyi tyamonekele etyi ova Isilayeli ankho vekahi pokati komafualali a Farao Nelunga Enkhuhu, atyikala ngoti mavaipawa. Mokonda ova Isilayeli ankho vatila unene owoma, veliyavele ku Jeova noku Moisesi. Oñgeni Moisesi akumbululile?

Tyafuile Moisesi ankho ketyii okuti Huku mayapula pokati Elunga Enkhuhu, opo ova Isilayeli vakuatemo, avayovoka. Mahi, Moisesi ankho una onthumbi yokuti Huku malingi tyimwe opo ayakulile ovanthu Vae. Iya Moisesi ankho uhanda ova Isilayeli navo vakale nonthumbi oyo. Mombimbiliya tutangamo okuti: “Moisesi wapopila ovanthu okuti: ‘Muahatilei nowoma. Kalei tyapama amutale oñgeni Jeova metuyovola hono.’” (Êxodo 14:13) Okuti Moisesi wakuatesileko umwe ova Isilayeli okukala nekolelo liapama? Yoo, mokonda Ombimbiliya ipopia konthele ya Moisesi nova Isilayeli ovakuavo okuti: “Mokonda yekolelo, vayaukile Elunga Enkhuhu ngatyina ohi yakukuta.” (Hebreus 11:29) Ekolelo lia Moisesi, hae vala liaetelele ouwa, mahi tupu navana ankho vena ekolelo mu Jeova.

OTYO TYITULONGESA TYI?

Tupondola okuhetekela Moisesi nokulinga omatokolo alekesa okuti tuna onthumbi muetyi Huku etulaa. Mongeleka, Huku walaa okuti inkha tupaka tete momuenyo wetu efendelo liae metuavela atyiho tuesukisa. (Mateus 6:33) Tyotyili, tyipondola okutupuiya okuhapake tete momuenyo omalumono, mokonda ovanthu ovanyingi hono otyo valinga. Mahi, tupondola okukala nonthumbi yokuti tyina tulinga ononkhono opo tuahatalukwe novipuka ovinyingi, atupake efendelo lietu tete momuenyo, Jeova utuavela atyiho tuesukisa. Jeova utulaa okuti: “Himekuyeke nalumwe, himekusipo nalumwe.”—Hebreus 13:5.

Tupu tulinga ononkhono mbokukuatesako vakuetu opo vakale nekolelo liapama. Mongeleka, ovohe ovanongo vaimbuka okuti vesukisa okukuatesako ovana vavo okukala nekolelo mu Huku. Alo umwe tyina ovana nkhele ovatutu, ovohe vesukisa okuvelongesa okuti kuna Huku utulongesa okupunga etyi tyaviuka netyi tyapenga. Tupu, ovohe vesukisa okukuatesako ovana vavo okutavela nokunoñgonoka okuti okulandula ovitumino via Huku tyakolela unene momuenyo. (Isaías 48:17, 18) Ovohe, vaavela ovana vavo otyipuka tyakolela unene tyina vevekuatesako okukala nekolelo liokuti Huku “oko ekahi, iya uyamba vana vaovola okumunoñgonoka vali nawa.”—Hebreus 11:6, Nova Tradução na Linguagem de Hoje.