“Ankho Ndyimukalavi”

OMUENYO WANGE KOHALE:

Nekulila mombunga yahamonene mepundaumbo lio Turku. Tate ankho utyihole unene tyokulwa, iya ankho petupu ou umutilisa, ame, nondenge yange tupu ankho tutyihole. Kosikola ankho ndyikalela vala okulwa. Etyi nekula vali katutu, andyihimbika okueenda novifuanga, andyikala novitateka ovinyingi. Tupu andyihimbika okuimba o heavy metal, iya andyisoko okuti mandyinkhimana.

Andyilande ovipuka vimwe viokuhika, andyionganeka ovanthu vamwe opo tuimbe. Pakala vala katutu, andyikala onkhalamutwe yavakuetu. Ankho tyina ndyiimbila komutwe wovanthu ndyipiluka unene. Ovanthu ankho vetuhole, mokonda ankho tuvakalavi, nokupiluka unene. Atuhimbika okuimbila ovanthu ovanyingi, atungalavala oviimbo vimwe, iya viokuehulililako ovanthu avevipande unene. Menima lio 1980, atuende ko Estados Unidos opo tunkhimane vali. Atuimbila ko Nova York noko Los Angeles, iya atupopi na vamwe vetyivila vali okuimba tyina nkhele tuehenekondoke ko Finlândia.

Namphila ankho tyokuimba ndyityihole, ankho nahanda okukala nomuenyo una esilivilo. Ankho hahambukilwe vali notyituwa otyivi tyovanthu aveho vokuimba, tupu, andyinumana nonkhalelo yomuenyo wange. Ankho ndyilitehela okuti ndyimukalavi, iya ankho ndyina owoma wokukayokua moifelunu. Naovolele omakumbululo amwe momikanda aviho vionongeleya. Tupu andyilikuambela unene opo Huku ankhuateseko, namphila ankho ndyilitehela okuti himetyivili okumuhambukiswa.

OÑGENI OMBIMBILIYA YAPILULULA OMUENYO WANGE:

Opo ndyilitekule, naundapa moseketa imwe yokutuma omikanda. Onthiki imwe, nanoñgonoka okuti umwe ankho tuundapa nae Ombangi ya Jeova. Andyimulingi omapulo omanyingi. Andyipande onkhalelo ankhumbulula Novihonekwa, moluotyo, andyitavela okulilongesa nae Ombimbiliya. Etyi nelilongesapo vala onosimano mbumwe, ame navana tuimba navo atuihanwa opo tukangalavale oviimbo vimwe ko Estados Unidos. Nasoka okuti oyo omphitilo ongwa ankho tuna.

Andyipopila Ombangi ankho undongesa okuti tyotyili nahanda okungalavala vala oviimbo vimwe, iya konyima yotyo andyihimbika okulandula nawa onondonga Mbombimbiliya. Ahapopi natyike, andyiti vala ndyitange onondaka mba Jesus mu Mateus 6:24. Mbati: “Nawike upondola okukala omupika wovahona vevali.” Etyi nanoñgonoka etyi tyihangununa onondaka mba Jesus, andyihanunuka. Mahi etyi palamba ononthiki mbumwe, wokundongesa Ombimbiliya, nae ahanunuka! Nemupopila okuti, mokonda nahanda okulandula Jesus, nayekapo okuimba!

Ombimbiliya ankho yelifwa notyilivandyelo tyindekesa apa nakambesa okuviukisa. (Tiago 1:22-25) Namona okuti ankho ndyimukalavi: Ankho ndyina omalityindailo, nokupeleya ovipuka ovinyingi. Ankho ndyina omupopio wasila, ndyilwa, nokusipa, nokunwa unene. Etyi nanoñgonoka okuti onkhalelo yomuenyo wange kayelikuatele nonondonga Mbombimbiliya, andyilinumanena. Namphila tyahapepukile, ankho nafuapo pala okulinga omapiluluko.—Efésios 4:22-24.

Haunene ponthyimbi, ankho nalemenwa novivi nalingile kohale. Mahi Ombangi wokundongesa wankhuatesileko unene. Wandekesile etyi Ombimbiliya ipopia mu Isaías 1:18: “Namphila ononkhali mbenyi mbakuhuka unene ngonguvo ikuhuka, mambuyeleswa ambutundu too ngongandyi.” Oversikulu oyo Yombimbiliya, nononkhuavo vali mbankhalesa nonthumbi yokuti Tate yetu keulu una okankhenda, iya uhanda okuvelula ovipute viavana velivela ovivi valingile.

Etyi nanoñgonoka nawa Jeova nokukala nohole nae, nasoka okulipakula kwe. (Salmo 40:8) Nambatisalwa mo 1992 motyonge tyovilongo ovinyingi tyo Nombangi mba Jeova tyalingililwe ko São Petersburgo ko Rússia.

OUWA PATYI NAPOLAKO:

Ndyina omapanga omanyingi omawa puvana vafenda Jeova. Pamwe tuliongiya opo tuimbe oviimbo oviwa, nokuhambukilwa otyiawa otyo tuapewa na Huku. (Tiago 1:17) Ondyambi onene vali napewa, omukai wange ndyihole, Kristina. Ndyimuhipululila ovipuka ovinyingi, ovitateka, noñgeni ndyilitehelela, nehambu liange.

Ankho hakalele Ombangi ya Jeova, ñgeno hono ndyitupu vali omuenyo. Kohale ankho apeho ndyilipaka movitateka ovinyingi. Mahi, pahe ndyina omuenyo omuwa, iya ndyilitehelela okuti ovipuka aviho vikahi nokueenda nawa.