Oñgeni Tueya Kouye?

Monondaka mbehehi, omukanda wotete Wombimbiliya, Gênesis, uhangununa oku kuatuka ovipuka aviho, wati: “Ponthyimbi Huku watunga eulu nohi.” (Gênesis 1:1) Etyi atunga omiti novinyama, walinga Andau na Eva. Ankho velikalela novinyama mokonda ovanthu valingwa novituwa vimwe via Huku, okukutikinyamo epondolo liokuliholovonena. Ngotyo, ankho ovo muene vena okuholovona etyi vahanda okulinga. Inkha vetavelele onondonga mba Huku, ñgeno ovo vatetekela okupola ouwa kehando lia Huku liokukala nombembwa nomuenyo wahapu pano pohi.

Mahi, oandyu imwe, yaovola omphitilo yokuundapesa ovanthu opo ilinge etyi ankho ihanda. Oandyu oyo aikala Satanasi, tyihangununa okuti “Ondyale.” Satanasi waundapesa onyoka opo apopie na Eva, emupopila okuti makala nomuenyo omuwa inkha ketavela ehongolelo lia Huku. Andau na Eva valandula Satanasi, avayekepo oupanga ankho vena Nomutungi wavo. Mokonda vaholovona omapita, Andau na Eva vapumbwa omuenyo wahapu, moluotyo atuho tuapiñgana onkhali, nononkhia.

Liwa-liwa Huku apopi etyi malingi opo atetulule otyitateka otyo, nokuikula ondyila opo ovana va Andau vakale nomuenyo wahapu. Huku wapopile okuti “ombuto,” omunthu umwe wakolela, makahanyako Satanasi, nokumanako ononkhumbi ambuho mbaetuako na Satanasi, na Andau na Eva. (Gênesis 3:15) Ankho olie makala “ombuto” oyo? Ankho matyikamoneka komutwe.

Putyina omuvo oo nkhele wehenehikepo, Satanasi ankho apeho wovola okutalameka ehando ewa lia Huku. Mahi, onkhali novivi vieliyawisa liwa. Iya Huku atokola okuhanyaunako onondingavivi nombila onene. Waavelele onondonga omulume omuviuki Noe opo atunge owato, opo ayovole ombunga yae nae muene, novinyama apopililwe opo evipake mowato.

Palamba enima tunde etyi Ombila Onene yahimbika, iya etyi Noe nombunga yae vatunda mowato ohi ankho yasukuka nawa. Mahi “ombuto” ankho nkhele kainemoneke.

​—Yapolwa mu Gênesis ovikapitulu 1-11; Judas 6, 14, 15; Revelação 12:9.