Etyi Naholovona Pouna

Mo 1985, ankho ndyina vala omanima 10 etyi ovana vokuatunda ko Camboja vehika mosikola yange mo Columbus, Ohio, ko América. Umwe povana ovo, ankho wii onondaka mbehehi mbo Ingelesi. Waundapesa omalutalatu, ahimbika okumphopila omahipululo atilisa owoma konthele yovanthu vaipawa, nokumoneswa emone, navana vaya nkholo opo vahupe. Kounthiki andyilili tyina ndyisoka kovana ovo. Nahandele okuvepopila konthele Yomphangu Yombembwa, netutilo, mahi elaka liange kavelii. Namphila ankho ndyimututu, natokola okulilongesa elaka lioko Camboja, opo ndyityivile okupopila vana tulongeswa navo, konthele ya Jeova. Ankho hityii okuti etokolo olio malinkhuatesako komutwe.

Okulilongesa elaka lioko Camboja ankho katyapepukile. Ovikando vivali, nasokele okutyiyekapo, mahi Jeova waundapesa ovotate opo vamphe ondundo. Konyima, ovalongesi vange, navana tulongeswa navo, vahimbika okunthyongiliya opo ndyitavele ovilinga mavimphe onombongo ononyingi. Mahi ankho ndyihanda okukala omukokoli-ndyila, moluotyo, naholovona okulongeswa oufwisu maunkhuatesako okuvasa ovilinga viokuundapa vala komuhuka ine kekumbi. Etyi namana osikola, andyikaivisa novakokoli-ndyila vamwe. Tupu neliava opo ndyikuateseko okulongesa o Ingelesi. Etokolo olio liankhuatesako unene.

Etyi ankho ndyina omanima 16, neiva okuti ko Long Beach, Califórnia, ko América kuna otyikundyi tyelaka lio Camboja. Andyiendeko andyililongesa okutanga elaka lio Camboja. Kapakalele ehimbwe, etyi namanuhula osikola, andyikala omokokoli-ndyila, andyitulako okupopila otyili ovanthu vo Camboja popepi neumbo lietu. Etyi natuukisa omanima 18, nasoka okuilukila ko Camboja. Otyilongo otyo ankho nkhele katyikahi nawa, mahi ankho kuna ovanthu onomiliau ekwi, ovanyingi puvo nalumwe veivile onondaka onongwa Mbouhamba. Pomuvo opo, ankho kuna vala ewaneno like lina ovaivisi 13. Otyikando tyotete napita ko Camboja ankho ndyina omanima 19. Etyi palamba omanima evali ngako ndyiilukila. Andyivasi ovilinga viokuundapa vala komuhuka ine kekumbi viokupitiya nokulongesa o Ingelesi. Konyima, andyivasi omuhikuena ankho uhanda okuundapa ngaame, atulinepe. Atuho tuakala nehambu liokukuatesako ovanthu ovanyingi mo Camboja avelipakula ku Huku.

Jeova wandyavela etyi “omutima wange ankho uhanda.” (Sal. 37:4) Okuivisa, otyipuka otyiwa unene tupondola okulinga. Mokueenda kuomanima 16 ndyikahi ko Camboja, ewaneno etutu ankho liovaivisi 13 lieliyawisa pahe kuna omawaneno 12 novikundyi 4!​—Tyapopiwa na Jason Blackwell.