Huku Ukueete

OMOKONDA YATYI VAMWE VENA ONDIMA: Elilongeso limwe lialingwa omanima okualamba lialekesa okuti eulu eli muna ono planeta (ikahi ngohi) ono mbiliau 100. Okutala eulu liahandyuka unene ovanthu ovanyingi velipula okuti: ‘Oityi Omutungi Omukulami esukila nokutala etyi ovanthu valinga meheke eli etutu?’

ETYI ONDAKA YA HUKU ILONGESA: Huku ketuavelele vala Ombimbiliya iya ehesuku nonthue. Anthi, Jeova utupopila okuti: “Mandyikuavela onondonga neiho liange litala kuove.”​—Salmo 32:8.

Tala Agar, omukai umwe omu Egitu kotyita 20 P. K. E. Agar wakalele tyihena onthilo nomuhona wae Sara, ngotyo Sara emutaata meumbo, iya Agar ehimbika okuenda-enda vala momaluhandya. Mokonda Agar walinga etyi tyapenga, okuti Huku kesukile nae? Ombimbiliya yati: “Oandyu ya Jeova yemuvasa.” Oandyu oyo aipameka Agar, aiti: “Jeova wiivite omaluyave ove.” Agar apopila Jeova okuti: “Ove, ove Huku weetepo.”​—Gênesis 16:4-13.

“Huku weetepo” nove ukueete. Mongeleka: Ina yovana una oluembia, haunene usuka nomona wae omututu, mokonda nkhele omututu, wesukisa okulingwa vali nawa novohe. Tyelifwa notyo, Huku nae ututala atuho tyina tuasoya, natyina tuna ovitateka. Jeova wati: “Ame ndyikala keulu, komphangu ikola, mahi tupu ndyikahi kumwe na vana vaihamenwa, vena omutima weliola, opo ndyipameke omutima wo vokueliola, nomutima wa vana vekahi nokumoneswa emone.”​—Isaías 57:15.

Mahi, ove upondola okulipula okuti: ‘Oñgeni Huku anthala? Okuti unkhoyesa vala okutalela kuetyi ndyikahi, ine unthala nawa etyi ndyikahi momutima nokwi nawa ame amelie?’