OSAPI YOKONDYE | OKUTI HUKU UKUTEHELELA?
Huku Upondola Okukupameka
“Huku wokuungumanesa vana vasoya, wetuungumanesa.”—2 CORÍNTIOS 7:6.
“Omona wa Huku . . . una oluembia na ame nokueliava mokonda yange.”—GÁLATAS 2:20
OMOKONDA YATYI VAMWE VENA ONDIMA: Ovanthu vamwe tyina vesukisa ombatelo, velitehela okuti katyaviukile okuita ku Huku opo eveamene nokuvekuatesako opo vetyivile okufinda ovitateka viavo. Omukai umwe utiwa Raquel, wati: “Tyina ndyitala ovitateka ovinene ovanthu ovanyingi mouye vekahi nokumona, omasukalalo ange ngoti kaesilivila, ndyilikondola okuita ombatelo ku Huku.”
ETYI ONDAKA YA HUKU ILONGESA: Huku wafuapo pala okuamena ovanthu nokuvekuatesako. Kese umwe kombanda yohi wapiñgana onkhali, ngotyo nawike utyivila okufuisapo nawa-nawa ovitumino via Huku. Mahi, Huku “wakala noluembia nonthue iya atumu Omona wae [Jesus Kristu] opo alinge otyilikutila tyokuevela ononkhali mbetu.” (1 João 4:10; Okatoi) Menyina liotyilikutila tyononkhia mba Jesus, Huku walinga atyiho opo aevele ononkhali mbetu, nokusukula omutima wetu, nokutukuatesako opo tukamone omuenyo uhapu mouye omupe wombembwa.a Mahi okuti otyilikutila otyo tyalingilwa vala ovanthu aveho ine tyilekesa okuti Huku wesuka nove?
Tala apostolu Paulu. Oe walundwa notyilikutila tya Jesus okuhoneka okuti: “Ame ndyityinda omuenyo nekolelo Momona wa Huku, una oluembia na ame nokueliava mokonda yange.” (Gálatas 2:20) Tyotyili, Jesus wankhia etyi Paulu nkhele ehenekale Omukristau. Anthi, Paulu wetyimona okuti otyilikutila otyo otyiawa tya Huku palae.
Tupu otyilikutila tyononkhia mba Jesus otyiawa tya Huku pala ove. Otyo tyilekesa okuti ove wakolela unene ku Huku. Otyo tyipondola okukuavela “eungumaneso lihapu nekevelelo ewa,” iya ngotyo “pamenei muaviho oviwa mulinga nevi mupopia.”—2 Tessalonicenses 2:16, 17.
Mahi, Jesus waava omuenyo wae momanima 2.000 konyima. Oityi tyilekesa okuti alo hono Huku ukahi nokukuovola?
a Opo ulilongese vali konthele yotyo tala o kapitulu 5, komukanda Oityi Ombimbiliya Tyili Ilongesa? walingua no Nombangi mba Jeova.