OMAPULO ALINGWA NOVATANGI

Jesus wapopilile ova Sanduseu okuti vana mavatutiliswa “kamavanepe iya kamavanepwa.” (Lucas 20:34-36) Okuti Jesus ankho ukahi nokupopia konthele yetutilo lia vana mavakakala pano pohi?

Epulo olio liakolela unene, haunene inkha una ankho welinepa nae wankhia. Vokuasiwapo hamwe vahanda unene okukelivasa mouye omupe nomukai wae ine omulume wae tyina amatutiliswa. Omukuatate umwe wasiuapo nomukai wae, wati: “Ame nomukai wange ankho katuhande okuliyapuka. Ankho ehando lietu okutualako okufenda kumwe Huku apeho. Kuame olusoke olo kaluapilulukile.” Okuti pena etyi tyilekesa okuti vana mavatutiliswa opo vakakale pano pohi mavekelinepa? Katupondola okupopia natyike konthele yotyo.

Mokueenda kuomanima omanyingi, omikanda vietu vihole okupopia okuti onondaka mba Jesus konthele yetutilo, nokunepa mbupondola okupopia etutilo pano pohi. Tupu vipopia okuti vana mavakatutiliswa mouye omupe tyipondola kamavakanepa ine okunepwa.a (Mat. 22:29, 30; Mar. 12:24, 25; Luc. 20:34-36) Mahi, okuti onondaka mba Jesus mbupopia etutilo lio vokuenda keulu? Tutalei etyi Jesus apopia.

Tala oñgeni tyaenda. (Tanga Lucas 20:27-33.) Ova Sanduseu, ankho vehetavela metutilo, vaovolele okuyondya Jesus etyi vemupula konthele yetutilo, nokulinepa pounawa.b Jesus evepopila okuti: “Ovanthu vomouye uno vanepa nokunepwa, mahi vana vatokala okukatutiliswa mouye omupe iya avakakala nomuenyo, kamavakanepa ine okunepwa. Tyotyili, kavapondola vali okunkhia mokonda mavakakala ngo noandyu, iya mavakakala ovana va Huku mokonda vatutiliswa.”​—Luc. 20:34-36.

Omokonda yatyi omikanda vietu vipopila okuti tyafuile Jesus ankho ukahi nokupopia konthele yetutilo liavana mavakakala pano pohi? Pena omahunga evali. Tete, etyi ova Sanduseu vapopia na Jesus tyafuile ankho vekahi nokupopia etutilo liavana mavakakala pano pohi. Ngotyo, tyaviuka okusoka okuti etyi Jesus evekumbulula ankho ukahi nokupopia konthele yetutilo liavana mavakakala pano pohi. Vali, Jesus pokumanuhula ekumbululo liae, wapopia konthele ya Abraiau, na Isake, na Jako. Ovalume ovo vekolelo mavakatutiliswa opo vakale pano pohi.​—Luc. 20:37, 38.

Mahi, tyipondola hamwe Jesus ankho ukahi nokupopia etutilo lio vokuenda keulu. Omokonda yatyi tupopila ngotyo? Tutalei onondaka mba Jesus etyi akumbulula ova Sanduseu.

“Vana vatokala . . . okukatutiliswa.” Ovalembulwa vekolelo “vatokala okutambula Ouhamba wa Huku.” (2 Tes. 1:5, 11) Mokonda yotyilikutila tyofeto yeyovo, Huku utala ovalembulwa ngatyina ovaviuki. Tyina vamankhi, Huku uvetala ngatyina vayovolwa konkhali. (Rom. 5:1, 18; 8:1) Ovalembulwa vapopiwa okuti “vena ehambu iya ovasukuki,” iya vatalwa ngatyina vatokala okututiliswa opo vaye keulu. (Rev. 20:5, 6) Mahi puvana mavatutiliswa opo vakale pano pohi, muakutikinya vana “vehevaviuki.” (Atos 24:15) Okuti tupondola okuvepopia okuti “vatokala” okututiliswa?

“Kavapondola vali okunkhia.” Jesus kapopile okuti: “Kamavakankhia vali.” Mahi wati: “Kavapondola vali okunkhia.” Onombimbiliya ononkhuavo mbupitiya onondaka ombo okuti, “ovo kamavakatuminwa vali nononkhia,” iya “ononkhia mbutupu vali epondolo kuvo.” Ovalembulwa vatualako nekolelo vatutiliswa opo vaye keulu. Otyo tyilekesa okuti kavapondola vali okunkhia, iya vapewa omuenyo uhevilwa vali okuhanyuako. (1 Cor. 15:53, 54) Ononkhia mbutupu vali epondolo kuvana vatutiliswa opo vaye keulu.c

Okutalela kuetyi tuelilongesa, etutilo patyi Jesus ankho ekahi nokupopia? Tuelilongesa okuti Jesus hamwe ankho ukahi nokupopia etutilo lio vokuenda keulu. Inkha ongotyo, tuanoñgonoka ovipuka vitatu konthele yavana vatutiliswa opo vaye keulu: (1) Kavakanepa, (2) kavapondola okunkhia, iya (3) vakala ngetyi tyikahi onoandyu keulu. Mahi, inkha Jesus ankho ukahi nokupopia etutilo lia vana vaya keulu, omapulo alandulako esukisa okukumbululwa.

Tete, inkha ova Sanduseu ankho vekahi nokusoka konthele yetutilo liavana mavakakala pano pohi, omokonda yatyi Jesus apopila etutilo lio vokuenda keulu? Jesus ankho ha apeho ukumbulula onondyale mbae monkhalelo ankho vekahi nokusoka. Mongeleka, etyi ova Judeu vamwe vaitile ku Jesus opo alinge ehuviso, Jesus wati: “Hanyeipo ondyuo ei ya Huku, iya mandyiipindulapo mononthiki ononthatu.” Jesus ankho utyii okuti ova Judeu vekahi nokusoka kondyuo ina ankho veete, “mahi Jesus ankho ukahi nokupopia olutu lwae.” (João 2:18-21) Tyafuile Jesus ankho usoka okuti kesukisile okukumbulula ova Sanduseu, mokonda ankho havakuatyiliko, iya kavetavela okuti kuna etutilo nonoandyu. (Pro. 23:9; Mat. 7:6; Atos 23:8) Mahi, Jesus hamwe ankho uhanda okukuatesako ovalongwa vae ovakuatyili opo vanoñgonoke nawa konthele yetutilo lio vokuenda keulu. Mokonda ovalongwa ovo ovakuatyili navo ankho vena ekevelelo liokuenda keulu.

Vali, omokonda yatyi Jesus pokumanuhula etompho liae apopila konthele ya Abraiau, na Isake, na Jako, mavatutiliswa opo vakale pano pohi? (Tanga Mateus 22:31, 32.) Puetyi nkhele ehenepopie konthele yovalume ovo vekolelo, Jesus wahimbika okupopia okuti, “konthele yetutilo lio vokuankhia.” Onondaka ombo mbupondola okulekesa okuti ankho wapilulula etompho. Ankho kekahi vali nokupopia etutilo lio vokuenda keulu, mahi ankho ukahi nokupopia etutilo liava mavakakala pano pohi. Jesus ankho utyii okuti ova Sanduseu vetavela kuetyi Moisesi ahonekele, moluotyo, wapopile etyi Jeova apopilile Moisesi puetyi ekahi potyinkhondo tyatema. Jesus ankho uhanda ova Sanduseu vanoñgonoke okuti Huku uhanda okututilisa ovanthu.​—Êxo. 3:1-6.

Tatu, inkha Jesus ankho ukahi nokupopia etutilo lio vokuenda keulu, okuti otyo tyilekesa okuti vana mavatutiliswa opo vakale pano pohi mavakanepa, nokunepwa? Ondaka ya Huku kayaavela ekumbululo liayandyuluka nawa konthele yepulo olio. Inkha Jesus ankho ukahi nokupopia konthele yetutilo lio vokuenda keulu, ngotyo onondaka mbae kambuhangununa inkha vana mavatutiliswa opo vakale pano pohi mavakanepa, nokunepwa mouye omupe.

Ondaka ya Huku ipopia nokuayandyuluka okuti ononkhia onthyulilo yotyinepo. Ngotyo, inkha ou muelinepa nae unkhia, kuesukisile okulivela onombei inkha utokola okunepa ine okunepwa vali. Otyo tyitei ku kese omunthu. Nawike upondola okupopia omapita omunthu uhanda okunepa ine okunepwa vali.​—Rom. 7:2, 3; 1 Cor. 7:39.

Tyotyili, hamwe tuna omapulo omanyingi konthele yoñgeni matukakala mouye omupe. Mahi, tuhafuanyekei, tukevelelei vala opo tutyimone. Mahi tupondola okukala nonthumbi yokuti: Vana vetavela ku Huku, mavakakala nehambu, mokonda Jeova uvehandela ouwa iya mekeveavela atyiho vesukisa.​—Sal. 145:16.