Ove Upondola Okulinga Tyimwe Opo Ewaneko Lietu Lioukristau Lipama​—Ñgeni?

1. Oñgeni ovilinga via Huku ankho vilingwa tunde kohale?

JEOVA na Jesus vena ewaneko tunde apa ovipuka viehimbika okutungwa. Jeova watunga Jesus etyi ehenetunge ovipuka ovikuavo. Konyima, Jesus aundapa kumwe na Jeova, “ankho ukahi ponthele yae ngomesene yovilinga.” (Provérbios 8:30) Tupu kohale ankho ovaumbili va Jeova vaundapela kumwe movilinga valinga. Mongeleka, Noe watungile owato kumwe nombunga yae. Ova Isilayeli navo vaundapele kumwe pokutunga ekaka liefendelo, no pokulitungulula, avekelitunga vali pomphangu onkhuavo. Mondyuo ya Huku, ankho vaimba, nokuhikila kumwe opo vahivilike Jeova noviimbo oviwa. Ovanthu va Jeova vetyivila okulinga ovipuka ovio aviho mokonda vaundapela kumwe.​—Gênesis 6:​14-16, 22; Números 4:​4-32; 1 Crônicas 25:​1-8.

2. (a) Ovakristau potyita tyo tete ankho vaundapa ñgeni? (b) Omapulo patyi matulilongesa?

² Ovakristau potyita tyo tete navo ankho vaundapela kumwe. Apostolu Paulu wahangununa okuti namphila ankho vena ounongo novilinga vielikalela, ankho vena ewaneko. Aveho ankho valandula Onkhalamutwe yavo, Jesus Kristu. Paulu weveeleka nolutu luna ononthele mbelikalaila mahi mbuundapela kumwe. (Tanga 1 Coríntios 12:4-6, 12.) Iya hono? Oñgeni tupondola okuundapela kumwe movilinga viokuivisa, no mewaneno, no mombunga?

OKUUNDAPELA KUMWE MOVILINGA VIOKUIVISA

3. Emonekelo patyi apostolu João akalele nalio?

³ Kotyita tyo tete, apostolu João wamuene emonekelo lio noandyu epandu vali ankho mbukahi nokuhika ononkhwino. Etyi oandyu ya tano yahika onkhwino, João amono “onthungululu yatunda keulu aitokela pohi.” “Onthungululu” oyo aiikula nosapi pepito lietoto limwe liaya kohi, lianthikovela. Tete, amutundu omuihi omunthikovei, iya konyima momuihi oo amutundu ovimphunia. Mahi ovimphunia ovio avihali omiti ine ovifo, aviutukila ovanthu “vehena enyingilikilo lia Huku monombamba mbavo.” (Revelação 9:1-4) João ankho utyii okuti ovimphunia ovio vipondola okunyona unene; ngetyi vialingile ko Egitu pomuvo wa Moisesi. (Êxodo 10:12-15) Ovimphunia João amuene vilekesa Ovakristau ovalembulwa vekahi nokuivisa onondaka mbakolela unene konthele yonongeleya mbomatutu. Iya ovanyingi vena ekevelelo liokukakala pano pohi veliwaneka kumwe navo. Aveho, veliwaneka movilinga ovio viokuivisa. Ovilinga ovio vikahi nokukuatesako ovanthu ovanyingi okutunda mo nongeleya mbomatutu, nokuyovoka koutumini wa Satanasi.

4. Otyilinga patyi ovanthu va Huku hono valinga iya onkhalelo patyi yaviuka pala okutyilinga?

⁴ Tuna otyilinga tyokuivisa “onondaka onongwa” kovanthu mouye auho tyina onthyulilo iheneye. Otyilinga tyimwe otyinene! (Mateus 24:14; 28:19, 20) Tukahi nokukonga aveho vena “ohunga” opo vanwe “omaande omuenyo”; ngotyo tuesukisa okulongesa aveho vahanda okunoñgonoka otyili tyikahi Mombimbiliya . (Revelação 22:17) Mahi tupondola vala okulinga ngotyo inkha “tuliwaneka,” atuundapela kumwe na vakuetu mewaneno.​—Efésios 4:16.

5, 6. Oñgeni ovilinga viokuivisa vituavela ewaneko?

⁵ Opo tuvase ovanthu ovanyingi, tuesukisa okuonganeka nawa ovilinga vietu viokuivisa. Ehongolelo tupewa newaneno lietu litukuatesako okutyilinga. Tyina tuameliongiya opo tuende movilinga viokuivisa, tukapopia novanthu konthele yo nondaka onongwa Mbouhamba. Tupu tuavela ovanthu omikanda viapolwa Mombimbiliya. Ngotyo, tuhole okuava omikanda ominyingi mouye auho. Pamwe tuhole okuitwa opo tulinge okambanya pokuivisa. Tyina wamalingi ovilinga ovio, ukahi nokuliwaneka novanthu ovanyingi ouye auho vekahi movilinga ovio! Tupu ukahi nokuundapa kumwe no noandyu, mbukuatesako ovanthu va Huku okuivisa onondaka onongwa.—Revelação 14:6.

⁶ Tuhambukwa tyina tutanga mo Anuário, atumono okuti ovilinga viokuivisa vikahi nokuliyawisa ouye auho! Tupu soka oñgeni tuliwaneka kumwe tyina tukonga ovanthu opo veye kovionge vietu. Movionge ovio atuho tutehelela vala onondaka mbuike. Omalongomona, no nondalama, nomalekeso etupameka okuavela Jeova atyiho tuvila. Tupu tuliwaneka kumwe novakuatate vetu no nomphange ouye auho tyina tuenda Kehinangelo omanima aeho. (1 Coríntios 11:23-26) Tyina tuliongiya atuho monthiki 14 ya Nisan tyina ekumbi liamanyingila opo tulekese okuti tuapandula etyi Jeova etulingila nokutavela otyitumino tya Jesus. Iya mo no simanu mbumwe tyina Ehinangelo lihenehikepo, tuundapela kumwe okukonga ovanthu ovanyingi opo veye okukala nonthue monthiki oyo yakolela.

7. Mokonda tuundapela kumwe tyitukuatesako okulinga ovilinga patyi?

⁷ Otyimphunia tyike vala katyityivili okunyona ovipuka ovinyingi. Tupu omunthu wike ketyivili okuivisa ovanthu aveho. Mahi mokonda tuundapela kumwe, tutyivila okupopila ovanthu ovanyingi konthele ya Jeova iya tukuatesako vamwe okumunkhimaneka.

KUUNDAPELA KUMWE MEWANENO

8, 9. (a) Ongeleka patyi Paulu apopia, ilongese Ovakristau okukala newaneko? (b) Oñgeni tupondola okuundapela kumwe newaneno?

⁸ Paulu wapopilile Ovakristau ko Efesu oñgeni ewaneno liaonganekwa, iya apopi okuti aveho mewaneno vesukisa “okukula movipuka aviho.” (Tanga Efésios 4:​15, 16.) Paulu waundapesa ongeleka yolutu opo ahangunune okuti kese Omukristau ukuatesako ewaneno opo litualeko newaneko, okulandula Jesus Onkhalamutwe yewaneno. Paulu wapopia okuti ononthele ambuho “mbolutu mbuundapela kumwe” pala okulinga etyi tuhanda. Ngotyo tyilinge tuvakuendye tyilinge tuvakulu, oityi munthu na munthu ena okulinga?

⁹ Jesus waholovona ovakulu vewaneno opo vahongolele ewaneno, iya uhanda tukale nonthilo navo, atulandula ehongolelo vetuavela. (Hebreus 13:7, 17) Hapeho tyapepuka. Mahi tupondola okuita Jeova opo etukuateseko. Ospilitu sandu yae ipondola okutukuatesako okutavela kese hongolelo ovakulu vewaneno vetuavela. Tupu soka oñgeni matyikuatesako ewaneno lietu inkha tuliola omutima, atuundapela kumwe novakulu vewaneno. Ewaneno lietu malikala newaneko, ohole yetu na vakuetu mailiyawisa.

10. Oñgeni ovakuatesiko vovakulu vakuatesako ewaneno okukala newaneko? (Tala olutalatu pana pehimbikila onthele.)

¹⁰ Ovakuatesiko vovakulu vewaneno ewaneno okukala newaneko. Vaundapa unene opo vakuateseko ovakulu vewaneno, iya tupandula unene atyiho valinga. Mongeleka, ovakuatesiko vovakulu vewaneno vatala inkha pena omikanda vituuka matukaundapesa movilinga viokuivisa, tupu valiepesa ovaenda veya komaliongiyo etu. Vaundapa unene opo vaviukise Ondyuo Yomaliongiyo nokuisukula. Tyina tuundapela kumwe novakuatate ovo, tukala newaneko iya tuumbila Jeova monkhalelo yaongana nawa.​—Tyieleka na Atos 6:​3-6.

11. Oityi ovakuendye vena okulinga vakuateseko ewaneno okukala newaneko?

¹¹ Ovakulu vewaneno vamwe vekahi nokuundapa unene mewaneno momanima omanyingi. Mahi hamwe pahe kavapondola vali okuundapa unene mokonda vakulupa. Ovakuatate ovakuendye vapondola okuvekuatesako. Inkha valongeswa, vapondola okukala novilinga mewaneno. Iya tyina ovakuatesiko vovakulu vewaneno vaundapa unene, komutwe vapondola okukala ovakulu vewaneno. (1 Timóteo 3:1, 10) Ovakuendye vamwe ovakulu vewaneno vekula vali motyili. Pahe ovatalelipo vomawaneno iya vakuatesako ovakuatate no nomphange momawaneno omanyingi. Tupandula unene tyina ovakuendye veliava opo vaundapele ovakuatate no nomphange.​—Tanga Salmo 110:3; Eclesiastes 12:1.

OKUUNDAPELA KUMWE MOMBUNGA

12, 13. Oityi tyipondola okukuatesako aveho mombunga veliwaneke kumwe?

¹² Oñgeni tupondola okukuatesako vo mombunga yetu opo tuundapele kumwe? Efendelo liombunga ono simanu ambuho lipondola okutukuatesako. Tyina o vohe novana vakala kumwe opo velilongese konthele ya Jeova, ohole yavo kese umwe na mukuavo ipama. Mokueenda kuomuvo oo, vapondola okulilongesa etyi mavakapopia movilinga viokuivisa, iya otyo matyikuatesako aveho okulipongiya nawa. Iya tyina kese umwe atehelela mukuavo tyina apopia konthele yotyili, nokutala okuti aveho mombunga vehole Jeova, iya vahanda okumunkhimaneka, oupanga wavo upama.

¹³ Ongeni ovalinepi vapondola okuundapele kumwe? (Mateus 19:6) Tyina ovalinepi aveho vehole Jeova iya avaundapela kumwe, mavakala nehambu iya otyinepo tyavo atyikala newaneko. Tupu mavalekesa okuti velihole kese umwe na mukuavo, ngo vo Abrau na Sara, Isake na Rebeka, na Elkana na Ana. (Gênesis 26:8; 1 Samuel 1:5, 8; 1 Pedro 3:5, 6) Tyina ovalinepi valinga ngotyo, vakala newaneko kese umwe na mukuavo iya oupanga wavo na Jeova upama.​—Tanga Eclesiastes 4:12.

14. Ankho ou muelinepa nae kaumbila Jeova, oityi una okulinga opo otyinepo tyenyi tyitualeko tyapama?

¹⁴ Ombimbiliya ipopia nokuayandyuluka okuti, katupondola okulinepa nomunthu uhafende Jeova. (2 Coríntios 6:14) Mahi, kuna ovakuatate no nomphange velinepa na una uhe Mbangi ya Jeova. Vamwe vanoñgonoka otyili etyi velinepale, iya umwe puvo ahakala Ombangi ya Jeova. Ovakuavo velinepa na una ufenda Jeova iya konyima omulume ine omukai atundu mewaneno. Motyitateka ngotyo, Omukristau ulinga atyiho evila opo atualeko okupameka otyinepo tyae mokulandula onondonga Mbombiliya. Mahi otyo katyapepukile! Mongeleka, Maliya nomulume wae David, ankho vaumbila aveho Jeova. Mahi konyima David ayekepo okuenda komaliongiyo. Mahi Maliya atualako okukala omukai ukahi nawa nokulekesa ovituwa Vioukristau. Tupu alongesa ovana vae epandu konthele ya Jeova iya avatualako okuenda komaliongiyo no kovionge. Konyima yomanima omanyingi, etyi ovana vae vekula avatundu meumbo, Maliya atualako okuumbila Jeova alo umwe tyina ankho tyihapepukile. Mahi konyima, David ahimbika okutanga omikanda ankho Maliya emuetela. Mokueenda kuomuvo, ahimbika vali okuenda komaliongiyo amwe. Omutekula wavo womanima epandu, apeho ankho umupakela otyipundi keliongiyo, iya inkha David keya, tyina amemuvasi keumbo emuti “hono nekukevelakeliongiyo, Vavo.” David akondoka ku Jeova etyi palamba omanima 25, iya pahe kumwe nomukai wae vena ehambu liokuumbila vali aveho Jeova.

15. Oñgeni ovalinepi ovakulu vapondola okukuatesako ovalinepi ovape?

¹⁵ Satanasi hono ukahi nokunyona onombunga. Ovalinepi vaumbila Jeova vesukisa okuundapela kumwe. Katyisukisa omuvo ulifuepi muelinepa, soka oityi upondola okupopia ine okulinga opo upameke otyinepo tyove. Inkha muelinepale kohale, mupondola okuavela ongeleka ongwa ovalinepi ovape. Hamwe upondola okukonga ovalinepi ovape opo veye pefendelo lienyi liombunga. Mavatale okuti namphila ovanthu velinepale kohale, nkhele vena okulekesa okuti velihole iya vena ewaneko.​—Tito 2:3-7.

“TULONDEI KOMPHUNDA YA JEOVA”

16, 17. Tyina ovaumbili va Huku vaundapela kumwe mavakamona komutwe?

¹⁶ Tyina ankho ova Isilayeli venda kovipito viavo ko Jelusalei, vaundapela kumwe na vakuavo. Ankho vapongiya ovipuka aviho mavesukisa moungendi. Tupu, vaendela kumwe otyo velikuatesako. Mondyuo ya Huku, aveho vahivilika kumwe Jeova. (Lucas 2:41-44) Hono, tukahi nokulipongiya pala okuenda mouye omupe, tuesukisa okukala newaneko, nokulinga atyiho tuvila opo tuundapele kumwe na vakuetu. Upondola okusoka omononkhalelo patyi upondola okuundapa vali?

¹⁷ Ovanthu mouye uno velipatana nokulwa konthele yovipuka ovinyingi. Mahi onthue tupandula Jeova utukuatesako okukala nombembwa nokunoñgonoka otyili! Ovanthu va Jeova ouye auho vemufenda monkhalelo ahanda. Haunene kononthiki mbuno mbonthyulilo, ovanthu va Jeova vena okukala vali newaneko tyipona kohale. Ngetyi Isaia na Mikeia vaulile, tukahi nokulonda “komphunda ya Jeova” atuho. (Isaías 2:2-4; tanga Miquéias 4:2-4.) Komutwe wandyila tyina ovanthu aveho kombanda yohi “vamakala newaneko” avaundapela kumwe okufenda Jeova matukahambukwa unene!