Puetyi ovanthu ankho vatuminwa na Huku, ovipuka aviho keulu na pano pohi ankho vikahi vala nawa
Omokonda Yatyi Tuesukisila Ouhamba wa Huku?
Omutungi wetu utiwa o Siovaa. Oe ankho utumina ovipuka aviho etyi atunga ovo Andau na Eva. Ankho utumina nawa. Oñgeni tutyii? Wevepakele pohika ikahi nawa ankho itiwa o Endene, eveavela okulia okunyingi. Tyihe-otyo vala, eveavela ovilinga vikahi nawa. (Gênesis 1:28, 29; 2:8, 15) Inkha ovanthu vetavelele ku Huku, ñgeno na hono vena omuenyo omuwa.
Andau na Eva vaanyene okutuminwa na Huku
Ombimbiliya ipopia okuti pena oandyu imwe yatyitukilapo Huku. Oandyu oyo, konyima aiya okuihanwa okuti o Satanasi Eliapu. Satanasi wapopia okuti ovanthu mavakala vala nawa inkha kavatuminwa na Huku. Ovo tate yetu Andau na Eva avetavela komatutu a Satanasi, navo avatyitukilapo outumini wa Huku. — Gênesis 3:1-6; Eholololo 12:9.
Etyi Andau na Eva veliwaneka na Satanasi, ongatyina vapopia okuti kavahande okutuminwa na Huku. Mo Endene avataatwa-mo, avapumbwa omuenyo uhapu. (Gênesis 3:17-19) Otyipuka otyo valinga tupu tyaetela ovana vavo ovitateka. Ombimbiliya ipopia okuti kombanda ya Andau, “onkhali yanyingila mouye iya onkhali yaeta ononkhia.” (Ova Loma 5:12) Tupu, onkhali yaeta vali otyitateka otyikuavo. Ombimbiliya yati: “Omunthu utumina omunthu mukuavo pala okumumonesa ononkhumbi.” (Eclesiastes 8:9) Onondaka ombo mbulekesa okuti, pana omunthu atumina, apeho pakala ovitateka.
OVANTHU VAHIMBIKA OKUTUMINA VAKUAVO
Nirode waanyene okutuminwa na Huku
Omunthu wo tete wapopiwa mo Mbimbiliya okuti ankho omutumini, utiwa o Nirode. Ankho omphuki, ankho ketavela Siovaa Huku. Tunde opo ovanthu vokutumina vehole okulinga vakuavo onya. Ohamba imwe itiwa o Salomau yaliko kohale, yapopia okuti: “Namona ononkhuka mba vana vamoneswa emone, otyo vehena ou uveuungumanesa. Vetupu omuungumanesi mokonda vamoneswa emone novatumini.” — Eclesiastes 4:1.
No onthue hono, tuhole okumona etyi Salomau apopia. Mo 2009, eongano limwe litiwa Nações Unidas liati: “Pahe tyayandyuluka nawa okuti ovitateka ovinyingi tuna-vyo hono, vihole okutuka kovanthu vatumina omapita.”
OMUVO WOMAPILULUKO WEHIKA-PO!
Ovanthu vatumina-ale tunde kohale, mahi tyitupu. Otyo tyilekesa nawa okuti tuesukisa okutuminwa nomutumini ukahi nawa. Ngwe otyo umwe Omutungi wetu alaa okukalinga!
Tunde kohale, ovatumini kavekahi nokutyivila okumanako ovitateka viovanthu, atee umwe ovatumini vana vokuhandela vakuavo oviwa
Huku wavialeka Outumini umwe mauya okupinga-ko omautumini ovanthu, “ngao [vala] ukakalako apeho.” (Daniel 2:44) Tyina ovanthu velikuambela okuti “Ouhamba wove uye,” ngotyo vekahi nokupopia Outumini oo. (Mateusi 6:9, 10) Mahi Huku haeko matumina Mouhamba wae. Wavialeka omunthu umwe weile pano pohi. Olie omunthu oo?