Okuti Ohi Maihanyuako?

Tyipondola hamwe weivile-ale okuti Ombimbiliya ipopia okuti ouye mauya okuhanyuako. (1 Suau 2:17) Okuti otyo tyilekesa okuti ovanthu aveho mavakahanyuako? Okuti mouye kamamukakala vali ovipuka vina omuenyo, ine ohi maikahanyuako?

OMBIMBILIYA IKUMBULULA OMAPULO OO EVALI OKUTI, AU!

**Oityi Matyihakahanyuako?**

OVANTHU AVEHO

Etyi Ombimbiliya ipopia: Huku “kalingile Ohi opo ikale vala ngotyo, weitunga opo mukale ovanthu.” — ISAÍAS 45:18.

OHI

Etyi Ombimbiliya ipopia: “Ombuto ei yovanthu yenda, ombuto onkhuavo iya, mahi ohi itualako apeho.” — ECLESIASTES 1:4.

OTYO TYILEKESA-TYI: Ombimbiliya ipopia okuti ohi kamaihanyuako iya apeho mamukala ovanthu. Naina, oityi onthyulilo youye?

SOKA KUETYI: Ombimbiliya yeeleka onthyulilo youye uno, netyi tyaendeleko pononthiki mbomunthu umwe ankho utiwa o Noe. Pomuvo opo, ohi ankho “yeyula oungangala.” (Gênesis 6:13) Mahi Noe ankho ulinga ovipuka oviwa. Mokonda yotyo Huku ahupisa Noe nombunga yae, mahi ahanyeko ovanthu valinga ovipuka ovivi nombila imwe onene. Konthele yetyi tyaendelepo pononthiki ombo, Ombimbiliya ipopia okuti: “Ovipuka ovio viahanyeneko ovanthu vo pomuvo opo, otyo tyaendeleko puetyi ohi aiho yepuila momaande.” (2 Petulu 3:6) Otyo ankho onthyulilo youye una. Mahi oityi tyahanyenueko? Hahiko yahanyenueko mahi ovanthu ankho valinga ovipuka ovivi. Naina tyina Ombimbiliya ipopia onthyulilo youye kaikahi nokupopia okuti ohi maiya okuhanyuako. Mahi ikahi nokupopia okuti ovanthu vana valinga ovipuka ovivi kumwe novipuka vatunga maveya okuhanyuako.

**Oityi Matyikapwa?**

OVITATEKA NOVIVI

Etyi Ombimbiliya ipopia: “Apa katutu onondingavivi kamambukakala-ko vali. Mokatala pana ankho mbukala, mahi kukembuvasa-po vali. Mahi, vana vokulinga ovipuka oviwa mavakapiñgana ohi, iya avakakala nombembwa onene.” — SALMO 37:10, 11.

Omalutalatu: 1. Onongangala mbelihika motyipala mbutundilila movenda mbavaka ovipuka. 2.Omulume ukahi nokuavela omulume omukuavo opasita yeyula onombongo.

OTYO TYILEKESA-TYI: Ombila Onene yo pomuvo wa Noe kayahanyene-ko ovivi pala apeho. Konyima Yombila oyo, mouye amukala vali ovitateka mokonda yovanthu valinga ovivi. Mahi apa katutu Huku meya okumanako ovivi, ngetyi o Salmo 37, yapopia okuti: “Onondingavivi kamambukakala-ko vali.” Huku makamanako ovivi pokati Kouhamba wae. Ouhamba oo, outumini uli keulu maukatumina ovanthu aveho pano pohi vetavela Huku.

SOKA KUETYI: Okuti ovatumini va pano pohi mavetavela Ouhamba wa Huku? Ombimbiliya ipopia okuti au. Mavatyitukilapo Ouhamba wa Huku. (Salmo 2:2) Oityi matyitundililako? Ouhamba wa Huku maukahanyako omauhamba atyo aeho iya “ngao ukakalako apeho.” (Daniel 2:44) Mahi omokonda yatyi ovatumini vesukisila okuhanyuako?

OITYI TUESUKISA IYA OMOKONDA YATYI — Okuhatuminwa vali novanthu

Etyi Ombimbiliya ipopia: “Ovanthu vetupu epondolo liokuhongolela onomphai mbavo.” — JEREMIAS 10:23.

Ovanthu vekahi nokulamba potyimato pamatwa ono papeli mbuna omalutalatu ovatumini.

OTYO TYILEKESA-TYI: Ovanthu kavatungilwe opo velitumine ovo muene. Kavetyivili okutumina vakuavo nii okumanako ovitateka viovanthu vatumina.

SOKA KUETYI: Omukanda umwe wapopia okuti ovatumini kavetyivili okumanako “oluhepo, nondyala, nomauvela, novinimawe novilwa noungangala.” Nkhele aupopi vali okuti: “Vamwe . . . vasoka okuti inkha tuatumininwe vala nomutumini wike mouye auho, ñgeno wamanako ovitateka ovio.” Mahi nankho otyo tyimoneka-po no ngotyo ouye mautuminwa vala novanthu ovakuankhali, vehetyivile okumanako ovitateka tuapopia. Ouhamba wa Huku oo vala outumini utyivila okumanako pala apeho ovitateka viovanthu aveho.

Naina ngetyi Ombimbiliya ipopia ovanthu vana valinga ovipuka oviwa, kavesukisile okutila owoma wonthyulilo youye uno. Onthyulilo otyipuka otyiwa, mokonda ouye uno mauya okuhanyuako, mahi Huku aetako ouye omupe ukahi vali nawa!

Onalupi ouye omupe mauya? Onthele ilandulako maikumbulula epulo olio