Omapulo Ovatangi

Mo Salmo 61:8, David wati ankho mahilivika enyina lya Huku “pala apeho.” Okuti otyipuka otyo apopia otyili umwe?

Yoo otyili umwe. David ankho uli umwe nokupopia otyili.

Tutalei ovipuka ovikwavo apopia mono velesikulu ononkhuavo mbelifwa nei. Wati: “Ame mandyiimbi oviimbo vihilivika enyina liove apeho tyina ononthiki ambuho ndyifwisapo etyi napopile.” “Siovaa Huku yange mandyikuhilivika nomutima wange auho, mandyihilivika enyina liove apeho.” “Mandyihilivika enyina liove apeho-apeho.” — Sal. 61:8; 86:12; 145: 1, 2.

Onondaka ombu kambulekesa okuti David ankho usoka okuti kamankhia-nkhia vali. Mahi David ankho utyii okuti ovanthu vankhia tupu omokonda ovakuankhali. Tupu nae ankho utyii okuti omukuankhali. (Gên. 3:3, 17-19; Sal. 51:4, 5) Ankho utyii okuti atee umwe ovanthu vapandwa na Huku, ngetyi o Ambalayau na Isake na Sakoo, vankhile. Mwene David nae ankho utyii umwe okuti nthiki imwe nae mankhi. (Sal. 37:25; 39:4) Mahi etyi apopia tyivasiwa mo Salmo 61:8, tyilekesa okuti ankho uhanda okutualako okuhilivika Huku pala apeho momuvo ankho ena omwenyo. — 2 Sam. 7:12.

Mo Salmo 18, 51, 52, Ohamba David wapopia ovipuka viaendaile momuenyo wae. Mo Salmo 23, David wapopia Siovaa okuti omunthita uhongolela nawa onongi mbae, umbuavela okulia iya umbuyakulila. David ankho omunthita. Iya David ankho uhanda okuumbila Siovaa ononthiki ambuho mbomuenyo wae. — Sal. 23:6.

Tupu wahalimbweko okuti Siovaa oe watumine David opo ahoneke onondaka ombo. David tupu wahonekele omaulo ankho maakafwiswa-po vala komutwe wandyila. Mongeleka, mo Salmo 110, David wapopia omuvo ankho Tatekulu yae “makapumphama kokulio kwa Huku keulu” apewa outumini. Opo alinge-tyi? Opo akoyese onondyale mba Huku “aongela omphela ovanthu vovilongo pano pohi.” Mu David omo mwatukile Mesiya, una ankho matumina keulu iya akala “omunakwa pala apeho.” (Sal. 110:1-6) Sesusi walekesa okuti eulo livasiwa mo Salmo 110 ankho oe lipopia. Eulo olio ankho malifwiswapo umwe nawa. — Mat. 22:41-45.

Naina Siovaa watumine Daviti ahoneke etyi ena okulinga pomuvo ena omwenyo, netyi ha makalinga tyina amakatutiliswa ahilivika Siovaa pala apeho. Tyipopia o Salmo 37:10, 11, 29, tyafwisilwepo umwe kohale pomuvo wova Isilayele, mahi tupu matyikafwiswapo komutwe wandyila. Tala opalangalafu 8 monthele yati: “Ove Mokakala Naame Momphangu Yombembwa” Momutala ou Womulavi.

O Salmo 61:8, nono velesikulu ononkhuavo mbelifwa nooyo, mbulekesa okuti David ankho uhanda okuhilivika Siovaa mo Isilayeli yokohale tyina ankho nkhele ehenenkhie. Mahi tupu ono velesikulu ombo mbupopia etyi David ha makalinga tyina Siovaa amemututilisa.