Eishomo 9

Abaheereza ba Ruhanga Nibaragirwa Kuba Abeecumi

Ahabw’enki tushemereire kuba abeecumi omu miringo yoona? (1)

Nikimanyisa ki okuba abeecumi omu by’omwoyo? (2)

abeecumi omu micwe? (3) abeecumi omu biteekateeko? (4) abeecumi aha mubiri? (5)

Ni migambire ya muringo ki etashemeire ei tushemereire kwetantara? (6)

1. Yehova Ruhanga n’omweecumi kandi naayera. Nayenda abari kumuramya bagume bari abeecumi—omu by’omwoyo, omu micwe, omu biteekateeko, n’omu mubiri. (1 Petero 1:16) Nikyetengyesa kwehayo kuguma turi abeecumi omu maisho ga Ruhanga. Tutwiire omu nsi etashemeire. Niturwaana n’emicwe yaitu eri kutureetera kukora ebitahikire. Kwonka titushemereire kuhwa amaani.

2. Abeecumi omu by’Omwoyo: Twaaba nitwenda kuheereza Yehova tituri kwiija kuremera aha nyegyesa nari emicwe yoona y’ediini ey’ebishuba. Nituragirwa kuruga omu diini yoona ey’ebishuba n’okutagishemba omu miringo yoona. (2 Abakorinso 6:14-18; Okushuuruurirwa 18:4) Ku turi kuheza kweega amazima agari kukwaata ahari Ruhanga nituragirwa kwegyendesereza okutahabisibwa abari kweegyesa eby’ebishuba.—2 Yohaana 10, 11.

3. Obweecumi omu Micwe: Yehova nayenda abari kumuramya batwaaze nk’Abakristaayo ab’amazima obwiire bwoona. (1 Petero 2:12) Nareeba buri ki turi kukora kyoona n’obu haakuba aheekiikire. (Abaheburaayo 4:13) Tushemereire kwerinda eby’obushambani n’emicwe endiijo yoona etashemeire ey’ensi egi.—1 Abakorinso 6:9-11.

4. Obweecumi omu Biteekateeko: Ku turi kwijuza ebiteekateeko byaitu n’ebintu ebishemeire, ebirungi, n’emicwe yaitu neija kuba eshemeire. (Abafiripi 4:8) Kwonka ku turi kuta ebiteekateeko byaitu aha bintu ebitashemeire nikiija kuturugiramu ebikorwa ebibi. (Matayo 15:18-20) Tushemereire kwetantara emiringo y’okushemeza, eri kubaasa kushiisha ebiteekateeko byaitu. Nitubaasa kwijuza ebiteekateeko byaitu, n’ebintu ebirungi twaaba nitushoma Ekigambo kya Ruhanga.

5. Obweecumi bw’Omubiri: Ahabw’okuba nibajwekyera Ruhanga Abakristaayo bashemereire okurinda emibiri yaabo n’ebijwaaro byaabo bigume byeecumire. Tushemereire kunaaba engaro twaruga omu kihoronyo, kandi hoona tuzinaabe nituza kurya, nari tutakakwatsire by’okurya. Waaba otaine ahari kwejunisibwa nk’ekihoronyo, oburofa bwoona bushemereire kuziikwa. (Eky’Ebiragiro 23:12, 13) Okurinda emibiri yaitu eri emyeecumi nikitureetera kuguma n’amagara marungi. Eka y’Omukristaayo eshemereire kweecuma omunda n’aheeru. Eshemereire kuba eky’okureeberaho kirungi omu kicweeka.

6. Okugamba Okweecumi: Abaheereza ba Ruhanga nibaragirwa kugamba amazima buri kanya. Ababeihi tibaritaaha mu Bukama bwa Ruhanga. (Abaefeso 4:25; Okushuuruurirwa 21:8) Abakristaayo tibari kwejunisa rurimi rubi. Tibari kuhurikiza ebitahikire nari kugamba ebitashemeire. Ahabw’emigambire yaabo eshemeire n’ab’omutaano aha murimo, nari aha ishomero, n’ahari abo abu batwiire nabo.—Abaefeso 4:29, 31; 5:3.

[Ebishushani ebiri aha rupapura 19]

Abaheereza ba Ruhanga nibaragirwa kuba abeecumi omu miringo yoona