Eishomo 10

Ebikorwa ebi Ruhanga Ayanga

Notwaara ota ebintu ebi Ruhanga ari kweeta ebibi? (1)

Okukora eby’omu mubonano okutahikire ni kuuha? (2)

Omukristaayo akwareebire ata okubeiha? (3) Okuteera zaara? (3) okwiiba? (3) obutemu? (4) okubandwa? (5) obusinzi? (6)

Omuntu nabaasa ata okwetaanisa n’ebikorwa bibi? (7)

1. Abaheereza ba Ruhanga nibenda ebintu birungi. Baitu kandi nibaragirwa kweega kwanga ebibi. (Zaaburi 97:10) Ekyo nikimanyisa okwetantara ebikorwa ebi Ruhanga ari kwanga. Bimwe aha bikorwa ebyo nibyo biiha?

2. Obushambani: Okukora eby’omu mubonano otakagiire mu bushweere, obushambani, okukora eby’omu mubonano n’enyamaishwa, okukora eby’omu mubonano n’omunyabuzaare, okukora eby’omu mubonano omushaija ahari mutaahi we, byoona n’ebibi by’amaani omu maisho ga Ruhanga. (Abaleevi 18:6; Abarooma 1:26, 27; 1 Abakorinso 6:9, 10) Haabaho omushaija n’omukazi batwiire hamwe bari kukora eby’omu mubonano batashwereine bashemereire kutaana, kitari ekyo bashwerane omu biragiro.—Abaheburaayo 13:4.

3. Okubeiha, Okuteera zaara, Okwiiba: Yehova Ruhanga tabaasa kubeiha. (Tito 1:2) Abantu abari kwenda kusiimwa omu maisho ge nibaragirwa kwetantara okubeiha. (Enfumu 6:16-19; Abakolosai 3:9, 10) Buri miringo yoona ey’okuteeramu zaara erimu omururu. Nahabw’ekyo Abakristaayo tibari kwejwanzya mu miringo yoona ey’okuteera zaara, katugire nk’akaruuru, empaka z’embaraasi, na chanisi. (Abaefeso 5:3-5) Kandi Abakristaayo tibari kwiiba. Tibari kugura bintu baaheza kumanya ngu n’eby’obushuma, nari kutwaara ebintu bataikiriziibwe.—Okuruga 20:15; Abaefeso 4:28.

4. Ekiniga, Obutemu: Ekiniga kyaaba kitategyekirwe kibaasa kurugamu obutemu. (Okutandika 4:5-8) Omuntu ori kukora eby’obutemu tabaasa kuba munywaani wa Ruhanga. (Zaaburi 11:5; Enfumu 22:24, 25) Ti kihikire okuhoora enzigu nari okwihura omuntu weena ekibi ahabw’ekibi.—Enfumu 24:29; Abarooma 12:17-21.

5. Okugambisa emizimu n’Okubandwa: Abantu abamwe nibakozesa amaani g’ebihangirwe eby’omwoyo, kugyezaho kutamba endwaara. Abamwe nibaroga abazigu baabo, ngu barwaare nari bafe. Amaani agari enyima y’ebyo byoona ni Sitaani. Nahabw’ekyo Abakristaayo tibashemereire kwejwanzya omu bintu nk’ebyo. (Eky’Ebiragiro 18:9-13) Okuguma haihi na Yehova, nikyo kiri kuturindira kimwe amarogo goona.—Enfumu 18:10.

6. Obusinzi: Ti kiri kibi kunywa ahari vinyo, biya, nari ebiri kusinza ebindi. (Zaaburi 104:15; 1 Timoseo 5:23) Okunywa munonga n’obusinzi, tibihikire omu maisho ga Ruhanga. (1 Abakorinso 5:11-13; 1 Timoseo 3:8) Okunywa ekirengyesereize, nikibaasa kushiisha amagara gaawe n’eka yaawe. Kandi nikibaasa kukurugiramu okurahuka kugwa omu kutegwa okundi.—Enfumu 23:20, 21, 29-35.

7. Abantu abari kukora ebintu ebi Ruhanga ari kweeta bibi, “tibarihungura bukama bwa Ruhanga.” (Abagalatia 5:19-21) Ku oraabe buzima nokunda Ruhanga, kandi noyenda kumushemeza nobaasa kwetantara ebikorwa ebyo ebibi. (1 Yohaana 5:3) Yega okwanga ekyo, eki Ruhanga ari kweeta kibi. (Abarooma 12:9) Kwatanisa n’abantu abaine emicwe y’okutiina Ruhanga. (Enfumu 13:20) Abakristaayo bagyenzi baawe abaakuzire omu by’omwoyo, nibabaasa kuba entandikiriro y’obuhweezi. (Yakobo 5:14) Okukira byoona yegamira obuhweezi bwa Ruhanga noraba omu kushaba.—Abafilipi 4:6, 7, 13.

[Ebishushani ebiri aha rupapura 20]

Ruhanga nayanga obusinzi, okwiiba, okuteera zaara, n’ebikorwa eby’obutemu