ESHUURA 8
Nimbaasa Kutunga Nta Abanywani Barungi?
“Naaba nyine ekiniga, nimba niinyenda ow’okugamba nawe. Naaba ntashemereirwe nimba niinyenda ow’okungambira ngu ebintu nibiza kuba gye. Naaba nshemereirwe, nimba ninyenda ow’okushemererwa nawe. Ningira ngu ni kikuru kugira abanywani.”—Brittany
Baingi nibagira ngu abaana bato nibaba nibenda ab’okuzaana nabo, kwonka ngu eminyeeto nibaba nibenda abanywani. Entaaniso n’eha?
Ow’okuzaana nawe n’omuntu orikukuhwera kutagira eihamba.
Omunywani n’omuntu ou orikushushanisa nawe ebi orikukunda.
Kandi Baibuli neegira ngu “munywani w’omuntu amukunda ebiro byona, kandi ow’eishe-emwe azaarirwa okuhwera abantu omu bihikiirizi.” (Enfumu 17:17) Ekyahandiikirwe ekyo nikigamba aha mukago ogurikukira ogw’abaana abarikuzaana hamwe.”
Amazima: Waaguma nookura, nooba nooyenda abanywani
1. Abaine emitwarize mirungi
2. Abarikugyendera aha mitindo erikusiimwa
3. Abarikukuhwera kwongyera kutwaza gye
Ekibuuzo: Noobaasa kutunga ota abanywani abari nk’abo? Ka tugambe enshonga emwe aha ndiijo.
Enshonga y’Okunywana #1—Emitwarize Erikukundwa
Eki oine kumanya. Bamwe abarikweyeta banywani baawe ti banywani abaabuzima. Baibuli neegira ngu, “emikago mingi esheenya eka.” (Enfumu 18:24) Ekyo nikibaasa kureebeka nk’ekigumire kwikiriza. Kwonka teekateeka ahari eki: Oragizireho ‘omunywani’ owaabaire naakukunda ahabw’ebi oine? Nari owaagyenzire naakugambuura arikujanjaza ebishuba ahariiwe? Waahikwaho ekintu nk’ekyo, nikibaasa kukugumira kwesiga abantu.a Ijuka ngu kyahika aha banywani, ni kikuru kugira abanywani bakye abaabuzima okukira okugira abanywani baingi abeekishobobo!
Eki orikubaasa kukora. Toorana abanywani abaine emitwarize ei orikwenda kugira.
“Abantu baingi baine emiteekateekyere mirungi ahari munywani wangye Fiona. Nanye ninyenda kugambwaho ebirungi. Niinyenda kugira eiziina rirungi nkawe. Ningira ngu ekyo n’ekintu kirungi.”—Yvette, 17.
Gyezaho kukora ebi.
1. Shoma Abagalatia 5:22, 23.
2. Yebuuze oti: “Banywani bangye baine emitwarize y’omwoyo gurikwera?”
3. Handiika ahaifo amaziina ga banywani baawe ab’aha mara. Ahari buri iziina, handiika omutwarize ogu munywani waawe ogwo arikukira kugira.
Eiziina
․․․․․
Omutwarize
․․․․․
Ekiraakuhwere: Waateekateeka aha mitwarize mibi yonka, teeraho kusherura abanywani abarungi.
Enshonga y’Okunywana #2—Emitindo Erikusiimwa
Eki oine kumanya. Waaba noosherura abanywani orikurahukiriza, noobaasa kutunga abanywani babi. Baibuli neegira eti: ‘Orikugyenda n’abanyabwengye, nawe naahinduka omunyabwengye, kwonka mugyenzi w’abashema naija kukizira.’ (Enfumu 13:20) Ekigambo ‘abashema’ tikirikumanyisa abatarikukora gye aha ishomero nari abataine bwengye. Kureka nikimanyisa abo abarikwanga kuhaburwa bakeejumba omu bikorwa bibi. Abo nibo banywani abu oine kwetantara!
Eki orikubaasa kukora. Omu mwanya gw’okunywana buri omwe, oine kwegyendesereza omu kutoorana emikago yaawe. (Zaaburi 26:4) Kwonka ekyo tikirikumanyisa ngu oine kushoroora abantu kurugiirira aha ihanga nari oruganda rwabo. Kureka nikimanyisa okwega “kutaanisa abahikiriire n’ababi, abarikukorera Ruhanga n’abatarikumukorera.”—Malaki 3:18.
“Ninsiima abazaire bangye ahabw’okumpwera kutunga abanywani, ab’orwingano rwangye kwonka barikukora gye omu by’omwoyo.”—Christopher, 13.
Garukamu ebibuuzo ebi:
Naaba ndi na banywani bangye, nimba ntiinire ngu nibaza kuteeraho kungyemesereza kukora ekintu eki ndikumanya ngu kigwire?
□ Eego
□ Ngaaha
Nintiina kworeka abazaire bangye banywani bangye, ahabw’okugira ngu nibabaasa kutabakunda?
□ Eego
□ Ngaaha
Ekiraakuhwere: Waagarukamu ngu eego ebibuuzo ebyo, sherura abanywani abarikugyendera aha mitindo mirungi, nibo Bakristaayo abarikutaho eky’okureeberaho kirungi.
Enshonga y’Okunywana #3—Abanywani Barungi
Eki oine kumanya. Baibuli neegira eti: “Mutabeihwabeihwa; ekigombe kibi kishiisha emicwe mirungi.” (1 Abakorinso 15:33) Omunyeeto orikwetwa Lauren naagira ati: “Abu ndikushoma nabo bakaba batarikunkunda okwihaho naakora eki bandagiira kukora. Nkaba nyine eihamba, n’ahabw’ekyo nkacwamu kutwaza nkabo kubaasa kugira abanywani” Lauren akeetegyereza ngu waakora ebi abandi barikukugambira kukora nooba waaba nk’eky’okuzaanisa eki omuntu arikukoresa oku arikwenda n’obu arikwenda. Eki tikyo kikushemereire!
Eki orikubaasa kukora. Yecwe aha bantu abarikukugyemesereza kuhindura emitwarize yaawe kugira ngu otwaze nkabo. Waakora otyo, noobaasa kugira abanywani bakye, kwonka nooza kugira okushemererwa, kandi nooza kugira obwire bw’okusherura abanywani abarungi, abarikukuhwera kugira emitwarize mirungi.—Abarooma 12:2.
“Munywani wangye Clint tarikurahuka kugira ekiniga, kandi aine embabazi, n’ahabw’ekyo abaasize kungaruramu amaani.”—Jason, 21.
Yebuuze ebibuuzo ebi:
Nimpindura oku ndikujwara, oku ndikugamba, nari nintwaza omu muringo mubi kubaasa kushemeza banywani bangye?
□ Eego
□ Ngaaha
Ninyeshanga omu myanya mibi ei naakubaire ntarikuzamu kuri ntari na banywani bangye?
□ Eego
□ Ngaaha
Ekiraakuhwere: Waagarukamu ngu eego ebibuuzo ebyo, shaba abazaire baawe nari ondiijo muntu mukuru obuhabuzi. Waaba ori omwe aha Bajurizi ba Yehova noobaasa kugamba n’omureeberezi omu kibiina omushabe kukuhwera kutoorana abanywani abaraakuhwere kutwaza gye.
SHOMA EBIRIKUKIRAHO AHA NSHONGA EGI OMU KATABO 2, ESHUURA 9
Munywani waawe, nari omutima gwawe nigukugyemesereza kukora ebintu bibi? Manya oku orikubaasa kubyangira!
[Obugambo obw’Ahansi]
a Buri omwe naashobya. (Abarooma 3:23) N’ahabw’ekyo munywani waawe yaakushobeza kwonka akashaba okusaasirwa ayihire aha mutima, ijuka ngu ’okukunda nikushweka ebibi bingi.’—1 Petero 4:8.
EKYAHANDIIKIRWE KIKURU
’Hariho omunywani w’omuntu okira owa nyina owaazairwe nawe.’—Enfumu 18:24.
AKAKORYO
Gyendera aha mitindo ehikire, reero abandi abarikuteeraho kukora nikyo kimwe, nibabaasa kukusherura. Nibaija kukubeera abanywani barungi!
EKI WAABA NOOKIMANYA . . .
Ruhanga tarikushoroora, kwonka naayegyendesereza kyahika aha bu arikwikiriza kuba abagyenyi ‘omu ihema rye.’—Zaaburi 15:1-5.
EKI NYETEEKATEEKIRE KUKORA!
Kubaasa kutunga abanywani barungi, ninyiija ․․․․․
Bamwe abarikunkira abu ndikwenda kumanya nibatwariramu ․․․․․
Eki ndikwenda kubuuza abazaire bangye aha nshonga egi ni ․․․․․
NOOTEEKATEEKA KI?
● Ni mitwarize ki eki orikwenda ngu munywani waawe abe aine, kandi ahabw’enki?
● Ni mitwarize ki ei oine kukoraho kubaasa kuba omunywani murungi?
[Ebigambo ebitoorainwe]
Abazaire bangye bakanzibira kuba na bamwe aha banywani bangye. Nkaba ninyehurira ngu abo nibo bonka abu naabaire niinyenda kuba nabo. Kwonka obuhabuzi bw’abazaire bangye bukaba buri burungi, bwanyima nkabaasa kwetegyereza ngu hariho abanywani baingi barungi.—Cole
[Akabokusi]
Gyezaho Obuhabuzi Obu
Gaaniira n’abazaire baawe aha bikwatiraine n’abanywani. Babuuze abanywani abu baabaire baine obu baabaire baine emyaka nk’eyaawe. Nibeefuuza ahabw’abanywani abu baatooraine? Ku baraabe nibeefuuza, ahabw’enki? Babuuze oku orikubaasa kwetantara bumwe aha buremeezi obu baatungire.
Banywani baawe baanjurire abazaire baawe. Ku oraabe nooyeziringa kukikora, yebuuze, ‘Ahabw’enki kiri kiti?’ Haine eki orikumanya ekirikukwata ahari banywani baawe eki abazaire baawe batarikwija kusiima? Ku kiraabe kiriho, nikibaasa kukwetengyesa kutoorana gye banywani baawe.
Ba omuhurikiza murungi. Fayo kumanya ebirikukwata ahari banywani baawe n’embeera ezi barikurabamu.—Abafilipi 2:4.
Ba orikusaasira. Otateekateeka ngu bahikiriire. ’Twena nitushobya omuri bingi.’—Yakobo 3:2.
Munywani waawe muhe obwikizo. Tikirikwetengyesa kwehatika ahari banywani baawe. Abanywani abaabuzima nibaba bariho obu orikubenda.—Omubuurizi 4:9, 10.
[Ekishushani]
Waakora ebi abandi barikukuragiira kukora noohinduka eky’okuzaanisa eki omuntu arikukoresa oku arikwenda n’obu arikwenda