EISHOMO 14
Nitubaasa Kuramya Tuta Ruhanga nk’Oku Arikusiima?
Nk’oku kirikworekwa omu ishomo ery’enyima, ti buri diini yoona ngu neeshemeza Ruhanga. Kwonka nitubaasa kuramya Omuhangi waitu omu muringo ogurikumushemeza. Ni ‘diini’ ki [nari okuramya] okurikumushemeza? (Yakobo 1:27) Yetegyereze eki Baibuli erikwegyesa.
1. Okuramya kwaitu kwine kuba nikwegamira ahari ki?
Okuramya kwaitu kwine kuba nikwegamira ahari Baibuli. Yesu akagira Ruhanga ati: “Ekigambo kyawe nigo mazima.” (Yohaana 17:17) Ediini ezimwe nizeehuzya amazima agari omu Kigambo kya Ruhanga, Baibuli. Nibagahaanisa n’enyegyesa z’abantu n’emigyenzo yaabo. Kwonka Yehova tarikusiima abarikwehuzya “ebiragiro” bye. (Shoma Mako 7:9.) Kureka, nitumushemeza twahamira aha biri omu Baibuli kandi tukakuratira obuhabuzi bwayo.
2. Tushemereire kuramya tuta Yehova?
Yehova Omuhangi waitu niwe twine kwemariraho wenka. (Okushuuruurwa 4:11) Eki nikimanyisa ngu niwe twine kukunda kandi tukaramya wenka, tutarikukoresa ebishushani, nari ebibaizirwe.—Shoma Isaaya 42:8.
Okuramya kwaitu kwine kuba ‘okurikwera, kandi okurikusiimwa’ Yehova. (Abarooma 12:1) Ekirikumanyisa ngu twine kworobera emitindo ye ey’emicwe. Nk’eky’okureeberaho, abarikukunda Yehova nibagyendera aha mitindo ye erikukwata aha bushwere. Kandi nibeetantara ebikorwa by’akabi, nk’okukoresa etaabe, okukoresa kubi emibazi, nari amaarwa.a
3. Ahabw’enki twine kuramya Yehova turi n’ab’eishe-emwe?
Enteerane zaitu eza buri saabiiti nizitubaasisa kuhimbisiza Yehova omu kibiina. (Zaaburi 111:1, 2) Omuringo gumwe ogu turikukora eki n’okweshongora ebyeshongoro by’okuhimbisa Ruhanga. (Shoma Zaaburi 104:33.) Yehova naayenda ngu tuze omu nteerane ahabw’okugira ngu naatukunda, kandi naamanya ngu niziija kutuhwera kwesiimira amagara ebiro byona. Twateeranira hamwe kugumyana, niitwe turikugasirwa.
SHWIJUMA GYE
Manya ahabw’enki Yehova atarikwenda ngu tukorese ebishushani omu kuramya. Yetegyereze emiringo mikuru ei turikubaasa kuhimbisamu Ruhanga.
4. Titwine kukoresa ebishushani omu kuramya
Nitumanya tuta ngu okukoresa ebishushani omu kuramya nikigwisa kubi Ruhanga? Zaana VIDIYO, kubaasa kugarukamu ekibuuzo ekirikukurataho.
Hakabaho ki ira obu bamwe aha baheereza ba Ruhanga baakoresa ekishushani omu kuramya?
Abamwe nibateeraho kwirira haihi Ruhanga barikukoresa ebishushani omu kuramya. Kwonka shi eki tikirikumwiriza hare nabo? Shoma Okuruga 20:4-6 na Zaaburi 106:35, 36, kubaasa kugarukamu ebibuuzo ebi:
Ni bintu ki nari bibaizirwe ki ebi orikureeba abantu nibakoresa omu kuramya?
Yehova naayehurira ata omuntu yaakoresa ebishushani omu kuramya?
Nooreeba ota okukoresa ebishushani omu kuramya?
5. Okuramya Yehova wenka nikutucungura enyegyesa zigwire
Yetegyereze oku okuramya Yehova omu muringo ogu arikusiima kirikutucungura enyegyesa zigwire. Zaana VIDIYO.
Shoma Zaaburi 91:14, kubaasa kugarukamu ekibuuzo eki:
Yehova naaturaganisa ki twamukunda tukaba niwe twaramya wenka?
6. Nituramya Ruhanga turi omu nteerane z’ekibiina
Nituhimbisa Yehova kandi twombekana turikweshongora kandi turikugira eki twagarukamu omu nteerane z’ekibiina. Shoma Zaaburi 22:22, kubaasa kugarukamu ebibuuzo ebi:
Nookunda kuhurira ebi abandi barikugarukamu omu nteerane?
Nooyenda kutebeekanisa kugira ngu naiwe ogarukyemu?
7. Yehova naashemererwa twagambira abandi aha bi turikwega
Hariho emiringo mingi ei turikubaasa kugambira abandi amazima ga Baibuli. Shoma Zaaburi 9:1 na 34:1, kubaasa kugarukamu ekibuuzo eki:
Oyegire ki omu Baibuli eki orikwenda kugambiraho omuntu ondiijo?
ABAMWE NIBAGIRA NGU: “Tikirikubaasika kushemeza Ruhanga.”
Iwe nooteekateeka ki?
OMU BUGUFU
Nitushemeza Omuhangi waitu twaba niwe twaramya wenka, twamuhimbisiza omu nteerane z’ekibiina, kandi tukagambiraho abandi ebi twegire.
Okweijutsya
Nitubaasa kwega tuta kuramya Ruhanga omu muringo ogu arikusiima?
Ahabw’enki twine kuramya Yehova wenka?
Ahabw’enki twine kuramya Ruhanga turi n’abandi abarikwenda kumushemeza?
JUMBURA EBINDI
Shoma oreebe ahabw’enki omukazi omwe ashemereirwe ahabw’okwecwa aha kuramya ebishushani.
“Tinkiri Muhuuku w’Ebishushani” (Omunaara gw’Omurinzi, Gyuraayi 1, 2011)
Manya ekirikubaasa kukuhwera kugarukamu omu nteerane z’ekibiina.
“Himbisa Yehova omu Nteerane” (Omunaara gw’Omurinzi, Jenwari 2019)
Reeba oku omutsigazi omwe yaagasiirwe omu nteerane z’ekibiina n’obu kiraabe kyabaire kitarikumworobera kuzizamu.
Abantu baingi nibateekateeka ngu omusharaba n’akamanyiso k’Obukristaayo, mbwenu shi twine kugukoresa omu kuramya?
“Ahabw’enki Abajurizi ba Yehova Batarikukoresa Omusharaba omu Kuramya?” (Eky’aha mukura)
a Ebikorwa ebi nibiza kugambwaho omu mashomo ag’omumaisho.