Toorana eby’Okweshemeza Ebirikusiimwa Yehova

Yehova ni ‘Ruhanga orikwesiima.’ (1 Timoseo 1:11) Naayenda ngu naitwe tushemererwe, kandi twesiimire omu kugira amagara. Nikimushemeza twahuumura aha mirimo yaitu kweshemeza. Omu ishomo eri, nituza kureeba oku turikubaasa kukoresa obwire bwaitu bw’okuhuumuraho omu miringo mirungi, erikureeta okumarwa, kandi erikushemeza Yehova.

1. Twine kwijuka ki twaba nitutoorana eby’okweshemeza?

Nooyenda kukora ki omu kweshemeza? Abamwe nibakunda kweshemeza barikuguma omuka kugira eki baashoma, nari kuhurikiza ebyeshongoro, nari kureeba vidiyo, nari kuza aha Intaneeti. Abandi nibakunda kugyenda na banywani baabo kurambura, kwibira, nari kuzaana omuzaano. Eby’okweshemeza byona ebi turikutoorana, nituhamya ngu ‘n’ebirikusiimwa Mukama.’ (Abaefeso 5:10) Twine kwetegyereza gye enshonga egi, ahabw’okuba eby’okweshemeza ebirikukira obwingi nibiba birimu ebikorwa ebi Yehova arikwanga, nk’obushaarizi, ebihagaro by’obushambani, n’obufumu. (Shoma Zaaburi 11:5.) Niki ekirikubaasa kutuhwera kutoorana gye eby’okweshemeza?

Twatoorana abanywani abarikukunda Yehova, nibabaasa kutuhwera kutwaza gye, n’okutoorana eby’okweshemeza ebirungi. Nk’oku twegire enyima, ‘orikugyenda n’abanyabwengye, nawe naahinduka omunyabwengye.’ Kwonka, twaba nitukira kushashaanuka n’abantu abatarikukunda emitindo ya Yehova, nitwija kugwerwa akagwe.—Enfumu 13:20.

2. Ahabw’enki ni kikuru kupima obwire obu turikumara omu by’okweshemeza?

N’obu twakutoorana eby’okweshemeza ebirungi, twine kwegyendesereza kutabimaramu obwire bwingi. Kitari ekyo, nitubaasa kutatunga obwire burikumara obw’okwejumba omu bintu ebikuru. Baibuli neetuhiga kukoresa gye obwire.—Shoma Abaefeso 5:15, 16.

SHWIJUMA GYE

Manya oku orikubaasa kutoorana gye eby’okweshemeza.

3. Yetantare eby’okweshemeza ebitashemeire

Ahabw’enki twine kwegyendesereza omu kutoorana eby’okweshemeza? Zaana VIDIYO, kubaasa kugarukamu ebibuuzo ebirikukurataho.

VIDIYO: Ni by’Okweshemeza ki Ebi Ndikubaasa Kutoorana? (4:39)

• Emizaano y’omuri Rooma eya ira ekaba neeshushana eta n’eby’okweshemeza ebya hati?

• Omu vidiyo egi, Danny akeegyera ki aha by’okweshemeza?

Shoma Abarooma 12:9, kubaasa kugarukamu ekibuuzo eki:

• Ekyahandiikirwe eki nikibaasa kukuhwera kita omu kutoorana eby’okweshemeza?

Ni bintu ki ebimwe ebi Yehova arikwanga? Shoma Enfumu 6:16, 17 na Abagalatia 5:19-21. Bwanyima y’okushoma buri kyahandiikirwe, garukamu ekibuuzo eki:

• Ebyahandiikirwe ebi nibigamba ahari bintu ki ebirikukira kuba biri omu by’okweshemeza eby’obunaku obu?

Oku orikubaasa kutoorana gye eby’okweshemeza

Yebuuze ebibuuzo ebi:

• Niki? Birimu ebintu ebi Yehova arikwanga?

• Ryari? Nibiteganisa emirimo erikukira obukuru?

• Baahi? Ninkira kubyejumbamu ndi n’abantu abatarikukunda Yehova?

Nk’oku kiri eky’oburinzi kwirira hare n’akabi, nikwo twine n’okwirira hare eby’okweshemeza ebitaboneire

4. Koresa gye obwire bwawe

VIDIYO: Niki Ekirikutwara Obwire Bwawe? (2:45)

• N’obu ow’eishe-emwe omu vidiyo araabe yaabaire atarikureeba ebintu bibi, kwonka akaba aine buremeezi ki?

Shoma Abafilipi 1:10, kubaasa kugarukamu ekibuuzo eki:

• Ekyahandiikirwe eki nikibaasa kutuhwera kita kucwamu obwire obu turaamare omu by’okweshemeza?

5. Toorana eby’okweshemeza ebirungi

N’obu eby’okweshemeza ebimwe biraabe bitarikushemeza Yehova, hariho bingi ebi arikusiima. Shoma Omubuurizi 8:15 na Abafilipi 4:8, kubaasa kugarukamu ekibuuzo eki:

• Ni by’okweshemeza ki ebishemeire ebi orikukunda?

OMU BUGUFU

Yehova naayenda ngu tutoorane eby’okweshemeza ebirungi tube nibyo twayejumbamu.

Okweijutsya

• Abakristaayo baine kwetantara by’okweshemeza ki?

• Ahabw’enki twine kwegyendesereza kutamara obwire bwingi omu by’okweshemeza?

• Ahabw’enki nooyenda kutoorana eby’okweshemeza ebirikusiimwa Yehova?

JUMBURA EBINDI

N’oha oine obujunaanizibwa bw’okututooranira eby’okweshemeza?

“Abajurizi ba Yehova shi Tibarikwikiriza Vidiyo Ezimwe, Ebitabo, Nari Ebyeshongoro?” (Eky’aha mukura)

Manya oku orikubaasa kucwamu gye aha bikwatiraine n’okweshemeza n’obwire bw’okweruhuura.

“Eby’okweshemeza Byawe Biine Omugasho?” (Omunaara gw’Omurinzi, Okitoba 15, 2011)

Omu byafaayo, “Nkasingura n’Okushoroora Kwangye,” reeba ahabw’enki omushaija yaarekire eby’okweshemeza ebi yaabaire naakunda.

“Baibuli Neehindura Emitwarize y’Abantu” (Omunaara gw’Omurinzi, Febwari 1, 2010)

Yetegyereze oku nyina abaana omunyabwengye arikwetantara eby’okweshemeza ebirimu ebitebyo ebirikukwata aha mwoyo gw’ensi.

Yetantare eby’Okweshemeza Ebirimu eby’Obufumu (2:02)