EISHOMO 55
Shagika Ekibiina Eki Orimu
Omu nsi yoona, obukaikuru bw’abantu nibaramya Yehova bashemereirwe omu nkumi n’enkumi z’ebibiina. Nibasiima obuhabuzi obu barikutunga, kandi nibashagika ekibiina omu miringo mingi. Nikwo orikwehurira otyo omu kibiina eki orimu?
1. Noobaasa kukoresa ota obwire bwawe n’amaani gaawe kushagika ekibiina?
Twena nitubaasa kugira ebi twakora omu kibiina. Nk’eky’okureeberaho, omu kibiina kyawe harimu abakaikwire nari abaine amagara mabi? Noobaasa kubahwera kuza omu nteerane? Nari noobaasa kubahwera omu kugura ebintu, nari okukora emirimo y’aha ka? (Shoma Yakobo 1:27.) Nitubaasa n’okuhwera omu kuboneza Ekyombeko ky’Obukama n’okukihunduuza. Tihaine orikutugyema kukora ebintu ebi. Okukunda Ruhanga n’ab’eishe-emwe nikwo kurikutuhiga ‘kwehayo twekundiire.’—Zaaburi 110:3.
Abajurizi ba Yehova ababatiziibwe nibabaasa kushagika ekibiina n’omu miringo endiijo. Ab’eishe-emwe abarikuhikiiriza ebirikwetengyesa nibabaasa kuba abaheereza, kandi haahinguraho obwire babe abareeberezi. Ab’eishe-emwe na banyaanyazi-itwe nibabaasa kushagika omurimo gw’okubuurira barikuba baapayoniya. Abajurizi ba Yehova abamwe nibabaasa kuhwera omu kwombeka emyanya y’okuramizamu, nari kuza omu bibiina ebindi ebirikwenda obuhwezi omu miringo endiijo.
2. Nitubaasa kukoresa tuta ebi twine kushagika ekibiina?
Nitubaasa ‘kuhaisa [Yehova] ekitiinisa’ turikukoresa ebintu byaitu. (Enfumu 3:9) Nitugureeba nk’omugisha kuhayo esente n’ebindi bintu kushagika ekibiina eki turimu, n’omurimo gw’okubuurira omu nsi yoona. (Shoma 2 Abakorinso 9:7.) Ebi turikuhayo nibikora n’omu kuhwera abahikirweho ebihikiirizi. Baingi nibacwamu butoosha ‘kuguma nibabiika’ esente z’okuhayo. (Shoma 1 Abakorinso 16:2.) Nitubaasa kuhayo turikukoresa obubokusi oburi omu myanya yaitu y’okuramizamu, nari kurabira aha mukura ahari donate.jw.org. Yehova naayenda tworekye ngu nitumukunda kurugiirira aha ku turikucwamu kukoresa ebintu ebi twine.
SHWIJUMA GYE
Yetegyereze emiringo emwe oku orikubaasa kushagika ekibiina.
3. Nitubaasa kukoresa ebintu byaitu
Yehova na Yesu nibakunda abantu efura abarikuhayo bashemereirwe. Nk’eky’okureeberaho, Yesu akeetegyereza omufaakazi omworo obu yaabaire ariyo naahayo. Shoma Luka 21:1-4, kubaasa kugarukamu ebibuuzo ebi:
Twine kuhayo esente nyingi shi kubaasa kushemeza Yehova?
Yehova na Yesu nibatwara bata okuhayo kwaitu twekundiire?
Kubaasa kumanya oku ebi turikuhayo birikukoresibwa, zaana VIDIYO, reero ogarukyemu ekibuuzo ekirikukurataho.
Ebirikuheebwayo nibikoresibwa bita kugasira ebibiina omu nsi yoona?
4. Nitubaasa kwehayo twekundiire kuhwera
Omu bunaku bwa Baibuli, abaheereza ba Yehova bakaba nibakora n’amaani kurinda emyanya yaabo y’okuramizamu. Kwonka eki kikaba nikitwariramu ekirikukira aha kuhayo esente. Shoma 2 Obusingye 34:9-11, kubaasa kugarukamu ekibuuzo eki:
Buri Mwisraeli akakora ki kuhwera omu kureeberera enju ya Yehova, nari omwanya gw’okuramizamu?
Kubaasa kumanya oku Abajurizi ba Yehova barikukuratira eky’okureeberaho kya ira ekyo, zaana VIDIYO, reero ogarukyemu ebibuuzo ebirikukurataho.
Ahabw’enki ni kikuru kuboneza Ekyombeko kyaitu ky’Obukama n’okukireeberera?
Noobaasa kuhwera mu miringo ki?
5. Ab’eishe-emwe nibabaasa kukununkirira obujunaanizibwa obundi
Ebyahandiikirwe nibihiga Abakristaayo abashaija kutunguuka kugira ngu bashagike ekibiina. Kubaasa kureeba eky’okureeberaho, zaana VIDIYO, reero ogarukyemu ekibuuzo ekirikukurataho.
Omu vidiyo, Ryan akakora ki kubaasa kushagika ekibiina omu bwijwire?
Baibuli neeshoboorora ebi ab’eishe-emwe baine kuhikiiriza, kubaasa kuba abaheereza nari abareeberezi. Shoma 1 Timoseo 3:1-13, kubaasa kugarukamu ebibuuzo ebi:
Ab’eishe-emwe kubaasa kuba abaheereza nari abareeberezi baine kuhikiiriza ki?
Ab’amaka gaabo baine kuba nibatwaza bata? —Reeba omushororongo 4 na 11.
Ab’eishe-emwe baateeraho kuhikiiriza ebi byona ebirikwetengyesa, buri omwe omu kibiina naagasirwa ata?
OMUNTU NAABAASA KUBUUZA ATI: “Abajurizi ba Yehova nibeemerezaho bata omurimo gwabo?”
Noobaasa kugarukamu ota?
OMU BUGUFU
Yehova naasiima munonga okuteeraho kwaitu kushagika ekibiina turikukoresa obwire bwaitu, amaani gaitu, n’ebi twine.
Okweijutsya
Nitubaasa kukoresa tuta obwire bwaitu n’amaani gaitu kushagika ekibiina?
Nitubaasa kukoresa tuta ebi twine kushagika ekibiina?
Nooyenda kushagika ekibiina mu miringo ki?
JUMBURA EBINDI
Yetegyereze ahabw’enki Ruhanga atakigambira abantu be kuhayo kimwe kya ikumi.
“Baibuli Neegamba ki Ahari Kimwe kya Ikumi?” (Eky’aha mukura)
Baibuli neeyoreka ngu obujunaanizibwa obumwe nʼobwʼabashaija. Kwonka munyaanyazi-itwe obatiziibwe yaayenda kuhikiiriza obujunaanizibwa obu naaba aine kukora ki?
Okwetegyereza Obushoboorozi omu Kibiina (Omunaara gwʼOmurinzi, Febwari 2021)
Reeba Abajurizi ba Yehova emanzi abarikwehayo kutwarira bagyenzi baabo ebitabo.
Okutwara Ebitabo Ebirikushoboorora Baibuli Omuri Congo (4:25)
Manya oku omurimo gwaitu gurikwemerezibwaho okutaana n’ebigombe by’ediini ebindi.
“Omurimo gw’Abajurizi ba Yehova Nigwemerezibwaho Guta?” (Eky’aha mukura)