EISHOMO 59
Noobaasa Kugumisiriza Waahiiganisibwa
Juba nari nyentsya, Abakristaayo boona nibaija kuhakanisibwa nari kuhiiganisibwa. Mbwenu shi eki kishemereire kututiinisa?
1. Ahabw’enki nitumanya ngu nitwija kuhiiganisibwa?
Baibuli neegamba butunu eti: ‘[Boona] abamaririire kumara ebiro by’amagara gaabo byona omuri Yesu nibatiina Ruhanga nibaija kuhiiganisibwa.’ (2 Timoseo 3:12) Yesu akahiiganisibwa ahabw’okugira ngu akaba atari w’ensi ya Sitaane. Naitwe tituri b’ensi, n’ahabw’ekyo tikirikututangaaza twahiiganisibwa gavumenti z’ensi egi n’ebigombe by’ediini.—Yohaana 15:18, 19.
2. Nitubaasa kwetebeekanisiza tuta okuhiiganisibwa?
Hati twine kuhamya obwesigye obu twine omuri Yehova. Buri izooba gira obwire bw’okumushaba n’okushoma Ekigambo kye. Guma nooza omu nteerane otarikwosha. Ebi byona nibiija kukubaasisa kugira amaani n’obumanzi bw’okwemera okuhiiganisibwa, n’obu kwakuba nikuruga omu ka yaawe. Entumwa Paulo owaabaire naakira kuhiiganisibwa, akagira ngu Yehova ‘niwe muhwezi wangye, tindikwija kutiina.’—Abaheburaayo 13:6.
Nitubaasa n’okwongyera aha bumanzi bwaitu turikubuurira butoosha. Okubuurira nikutuhwera kwesiga Yehova n’okusingura okutiina abantu. (Enfumu 29:25) Waagira obumanzi bw’okubuurira hati, noija kuba oyetebeekaniise gye kugumizamu noobuurira n’obu gavumenti yaakuteeraho kuturemesa kubuurira.—1 Abatesalonika 2:2.
3. Nitugasirwa tuta twagumisiriza omu kuhiiganisibwa?
Buzima, titurikubaasa kwesiimira omu kuhiiganisibwa, kwonka twagumisiriza kandi tukasingura, okwikiriza kwaitu nikuhama. Nitwirira haihi na Ruhanga ahakuba nitureeba oku arikutuhwera twaba nituteekateeka ngu titurikubaasa kugumizamu. (Shoma Yakobo 1:2-4.) Nikigwisa kubi Yehova yaareeba nitubonabona, kwonka naashemererwa twagumisiriza. Baibuli neegira eti: “Ku murikukora gye, mwabonabonesibwa, mukagumisiriza, ekyo nikyo kirikusiimwa ahari Ruhanga.” (1 Petero 2:20) Boona abarikugumisiriza omu bwesigwa, Yehova naija kubaha amagara agatahwaho, omu nsi eraabe etarimu abarikuhakanisa okuramya okw’amazima.—Matayo 24:13.
SHWIJUMA GYE
Yetegyereze ahabw’enki nitubaasa kuhamira ahari Yehova omu kuhiiganisibwa, n’ebirungi ebirikurugamu.
4. Noobaasa kugumisiriza okuhakanisibwa kw’ab’eka yaawe
Yesu akakyoreka gye ngu ab’eka zaitu nibabaasa kwanga kutushagika twacwamu kuramya Yehova. Shoma Matayo 10:34-36, kubaasa kugarukamu ekibuuzo eki:
Niki ekirikubaasa kubaho omuntu yaacwamu kuheereza Yehova?
Kubaasa kureeba eky’okureeberaho, zaana VIDIYO, reero ogarukyemu ekibuuzo ekirikukurataho.
Noobaasa kukora ki omunyabuzaare nari omunywani yaateeraho kukuremesa kuheereza Yehova?
Shoma Zaaburi 27:10 na Mako 10:29, 30. Bwanyima y’okushoma buri kyahandiikirwe, garukamu ekibuuzo eki:
Okuraganisa oku nikubaasa kukuhwera kuta waaba noohakanisibwa ab’eka yaawe nari abanywani?
5. Gumizamu nooramya Yehova n’obu waakuba noohiiganisibwa
Nikyetengyesa obumanzi kuheereza Yehova obwo abandi barikuteeraho kuturemesa. Zaana VIDIYO, kubaasa kugarukamu ekibuuzo ekirikukurataho.
Abarikworekwa omu vidiyo egi baakuhwera bata kugira obumanzi?
Shoma Ebyakozirwe 5:27-29 na Abaheburaayo 10:24, 25. Bwanyima y’okushoma buri kyahandiikirwe, garukamu ekibuuzo eki:
Ahabw’enki ni kikuru munonga kugumizamu nooramya Yehova n’obu okubuurira n’enteerane byakuba bizibiirwe?
6. Yehova naija kukuhwera kugumisiriza
Abajurizi ba Yehova ab’emyaka etarikwingana n’obukomooko butarikushushana, bakagumizamu nibamuheereza n’omu kuhiiganisibwa. Kubaasa kureeba ekyabahweraire, zaana VIDIYO, reero ogarukyemu ekibuuzo ekirikukurataho.
Omu vidiyo egi, niki ekyahweraire Abajurizi ba Yehova abo kugumisiriza?
Shoma Abarooma 8:35, 37-39 na 2 Abakorinso 4:7. Bwanyima y’okushoma buri kyahandiikirwe, garukamu ekibuuzo eki:
Ekyahandiikirwe eki nikikuhamiza kita ngu noobaasa kugumisiriza omu kuhiiganisibwa?
Shoma Matayo 5:10-12, kubaasa kugarukamu ekibuuzo eki:
Ahabw’enki noobaasa kushemererwa na waaba noohiiganisibwa?
Abajurizi ba Yehova baingi munonga babaasize kuba abasinguzi omu bwire bw’okuhakanisibwa. Naiwe noobaasa kusingura!
ABAMWE NIBAGIRA NGU: “Tindikubaasa kwemera okuhiiganisibwa.”
Ni byahandiikirwe ki ebirikubaasa kubahwera kugira obumanzi?
OMU BUGUFU
Yehova naasiima okuteeraho kwaitu kumuheereza n’obu twakuba nituhiiganisibwa. Ahabw’obuhwezi bwe, nitubaasa kugumisiriza tusingure okuhiiganisibwa!
Okweijutsya
Ahabw’enki Abakristaayo nibamanya ngu nibaija kuhiiganisibwa?
Noobaasa kukora ki hati kwetebeekanisiza okuhiiganisibwa kukuraabeho?
Niki ekirikubaasa kukuhamiza ngu noija kugumizamu nooheereza Yehova n’obu waakugyezibwa ota?
JUMBURA EBINDI
Reeba ow’eishe-emwe muto arikushoboorora oku Yehova yaamuhweraire kugumisiriza obu yaakomwa ahabw’okuteejwanzya omu rwanju rw’ensi.
Yetegyereze ekyahweraire omushaija n’omukazi we kuheereza Yehova omu bwesigwa kumara emyaka mingi, n’obu baraabe baabaire nibahakanisibwa.
Yega oku orikubaasa kugira obumanzi waaba noohiiganisibwa.
“Yetebeekanisize Okuhiiganisibwa Hati” (Omunaara gw’Omurinzi, Gyuraayi 2019)
Twine kutwaza tuta twaba nituhakanisibwa ab’eka zaitu, kandi nitubaasa kusingura tuta oburemeezi oburikurugamu?
“Amazima Tigarikureeta, ‘Busingye, Kureka Rurara’” (Omunaara gw’Omurinzi, Okitoba 2017)