Okuteebereza Okwingi Tikurikuhikiirira

Nooyenda kumanya ebirikukwata aha biro by’omumaisho? Baingi nikwo barikwebuuza. Baingi nibateebereza aha biro by’omumaisho kwonka ebi barikuteebereza ebimwe nibibaho ebindi tibirikubaho. Yetegyereze eby’okureeberaho ebi ahaifo:

• ABAASAYANSI nibakoresa tekinologiya hamwe n’esente nyingi kuteebereza aha bintu bingi nk’okugira ngu emyika mibi neija kushiisha ensi nari aha kugwa kw’enjura.

• ABAHANGU OMU KUTEEBEREZA nibateebereza ebiraabeho omu by’obushuubuzi hamwe n’eby’obutegyeki. Warren Buffett, omwe aha bagaiga omu nsi yoona naateebereza gye aha by’obushuubuzi ekirikureetera bamwe kumweta omurangi. Nate Silver, omuhangu ondiijo omu kuteebereza, naateebereza ebirikukwata aha by’obutegyeki omuri U.S. reero aba Hollywood film bamuha ebiconco.

• EBIHANDIIKO BYA IRA abantu abamwe nibabigambaho nk’obunabi. Ebiriyo nibibaho obunaku obu abamwe nibateekateeka ngu nibihikaana n’ebiri omu bihandiiko bya Michel de Nostredame (Nostradamus) ebi yaahandiikire omu kyasha kya 16. Karenda ya Maya eyaahendeire Desemba 21, 2012, abamwe nibagigambaho nk’erikworeka empindahinduka y’akabi erikuza kubaho omu biro by’omumaisho.

• ABEEBEMBEZI B’EDIINI abamwe nibateebereza aha birikubaho omu nsi kurabura abakuratsi baabo. Nabi orikuranga aha kucwekyerera orikwetwa Harold Camping hamwe n’abakuratsi be, bakaranga ngu ensi ekaba neija kucwekyerera 2011. Kwonka na hati ensi ekiriho.

• ABAFUMU nibateekateeka ngu baine amaani g’omutaano kubaasa kumanya ebiraabeho omu biro by’omumaisho. Edgar Cayce na Jeane Dixon bombi bakateebereza aha byabaire nibiza kubaho omu kyasha kya 20. Kandi bakagaruka baayoreka n’ebitarahikiriire. Nk’eky’okureeberaho, Dixon akaranga ngu hakaba nihaija kubaho orutaro rwa kashatu orw’ensi yoona omuri 1958, kandi Cayce we akaranga ngu orurembo New York rukaba nirwija kutobera omu nyanja ahagati y’emyaka ya 1970.

Hariho omuringo ogurikwesigwa ogu turikubaasa kumanyamu ebiro by’omumaisho? Ekibuuzo eki ni kikuru munonga. Waaba noomanya ekiraabeho omu biro by’omumaisho, nikibaasa kukuhwera kumanya oku oshemereire kutwaza n’ebi oraacwemu.