Ebintu Bibi Biri Buri Hamwe!

Smita,a omukazi w’emyaka 35 omuri Dhaka, Bangladesh, akaba naamanywa nk’omuntu orikufayo kandi orikukunda abantu. Abantu bakaba nibamumanya nk’omukazi orikushemererwa kandi omukozi orikukunda kuhwera abandi kumanya ebirikukwata ahari Ruhanga. Abanyabuzaare bakagwerwa akagwe, Smita ku yaatungire endwara eyaamwitsire omu bunaku obutarikuhika na saabiiti!

James n’omukazi we ab’emyaka nka 30 nabo bakaba baine emitwarize nk’eya Smita. Eizooba rimwe ku baagiire kutaayaayira banywani baabo omu Burengyerwa izooba bwa United States, tibaragarukire muka owaabo omuri New York. Bakatunga butandu baafa, ekyareeteire abanyabuzaare baabo, banywani baabo n’abu barikukora nabo obusaasi bwingi.

Tikirikwetengyesa kuza hare kubaasa kukimanya ngu hariho obubi n’okubonabona obunaku obu. Abantu baingi abaabutoosha n’abanyamahe nibafeera omu ntaro. Obushaarizi n’okuhenda ebiragiro nibireetera abantu abataine rubanja kubonabona. Butandu n’endwara nibihika aha bantu boona abato n’abakuru. Ebihikiirizi nibihika aha buri kicweka omu nsi. Okushoroora omu mahanga n’obutari buringaaniza biijwire omu nsi. Obundi noobaasa kushanga ngu naiwe ebintu nk’ebyo birakuhikireho.

Buzima ni kiba kihikire kubuuza ebibuuzo nk’ebi:

• Ahabw’enki ebintu bibi nibihika aha bantu barungi?

• Mbwenu shi Ruhanga niwe arikureetaho ebintu ebyo?

• Mbwenu shi ebihikiirizi nibyereeta nari nibireetwaho abantu?

• Ebibi ebi omuntu yaakozire enyima nibyo birikumureetera kubonabona?

• Ku haraabe hariho Ruhanga ow’obushoboorozi bwona, ahabw’enki atarikurinda abantu barungi kutahikwaho kabi?

• Obubi n’okubonabona biryahwaho?

Okutunga eby’okugarukamu by’ebibuuzo ebyo, twine kwetegyereza ebintu bibiri ebi: Ahabw’enki twena nituhikwaho ebibi, kandi Ruhanga naija kukora ki?