Abantu Barungi Nibahikwaho Ebibi Ahabw’enki?

Ahabw’okugira ngu Yehova Ruhangaa niwe yaahangire ebintu byona kandi niwe w’obushoboorozi bwona, abantu nibabaasa kugira ngu niwe arikureetaho buri kimwe ekirikubaho omu nsi otwariiremu n’ebintu bibi. Kwonka, yetegyereze eki Baibuli erikugamba ahari Ruhanga ow’amazima:

• “MUKAMA n’ohikiriire omu mitwarize ye yoona.”​—Zaaburi 145:17.

• “Emitwarize ye yoona n’ey’oburyo. Ni Ruhanga ow’okwesigwa, otagira kutahikiirira; n’ow’amazima, kandi ohikiriire.”2​—Eky’Ebiragiro 32:4.

• ‘Yehova aine embabazi nyingi n’okusaasira.’​—Yakobo 5:11.

Ruhanga tiwe arikureetaho ebintu bibi. Mbwenu shi niwe arikureetera abantu abandi kukora ebintu bibi? Ngaaha. Ebyahandiikirwe nibigira ngu “omuntu weena ku araayohibwe, arekye kugira ati: Naayohibwa Ruhanga.” Ahabw’enki? “Ahakuba Ruhanga tabaasa kwohibwa kibi, kandi nawe tayosya muntu.” (Yakobo 1:13) Ruhanga tarikubaasa kureetera muntu weena kwohibwa nari kumugyeza arikumureetera kutwaza kubi. Ruhanga tarikureetaho bintu bibi kandi tiwe arikureetera abantu kubikora. Mbwenu shi n’oha oshemereire kuteebwaho orubanja ahabw’ebintu bibi ebirikubaho?

OKUBA OMU MWANYA MUBI OMU BWIRE BUBI

Baibuli erikworeka emwe aha nshonga ahabw’enki abantu nibabonabona, neegira eti: “Boona bahikwaho obunaku n’ebihikiirizi.” (Omubuurizi 9:11) Butandu nari ebintu bibi ebi omuntu arikuba ateetebeekanisiize ku birikubaho, yaaba yaahikwaho akabi nari kataamuhikaho, okukira munonga nikirugiirira aha mwanya ogu arikuba arimu. Emyaka nka 2,000 ehingwire, Yesu Kristo akagamba ahari butandu eyaabaireho obu omunaara gwagwera abantu 18 gukabaita. (Luka 13:1-5) Abantu abo tibarafiire ahabw’okugira ngu baine omuringo ogu baabaire nibatwazamu kubi kwonka bakafa ahabw’okugira ngu bakaba bari ahansi y’omunaara obu gwagwa. Enyimaho, omutsitsa gukateera Haiti omu Jenwari 2010; gavumenti y’omuri Haiti ekagira ngu abantu abarikurenga 300,000 bakafa. Omutsitsa ogwo gukaita abantu abo gutarikutoorana. Kandi endwara nizibaasa kubaho eshaaha yoona.

Abamwe nibabaasa kubuuza bati: ‘Kwonka shi Ruhanga we tarikubaasa kuzibira ebintu bibi nk’ebyo kubaho? Mbwenu shi tarikubaasa kurinda abantu abarungi kutahikwaho bihikiirizi?’ Ruhanga kubaasa kukora ekyo, nikiba nikimanyisa ngu aine kuba naamanya ebirikukwata aha bintu bibi nk’ebyo bitakabaireho. N’obu Ruhanga araabe naabaasa kumanya ebirikwija kubaho omu bwire bw’omumaisho, ekibuuzo eki tushemereire kwebuuza n’eki: Mbwenu shi naacwamu kutakoresa amaani ge agataine bugarukiro kutamanya ebintu nk’ebyo bitakabaireho?​—Isaaya 42:9.

Ebyahandiikirwe nibigira biti: “Ruhanga waitu ari omu iguru, akora eki arikwenda kyona.” (Zaaburi 115:3) Yehova naakora eki arikureeba ngu nikyo kirikwetengyesa kukorwa kwonka kitari buri kimwe eki arikubaasa kukora. Nikyo kimwe n’aha ku arikukoresa obushoboorozi bwe bw’okumanya ebiraabeho omu biro by’omumaisho. Nk’eky’okureeberaho, obubi ku bwayeyongyeire kuba bwingi omu ndembo za ira Sodoma na Gomora, Ruhanga akagambira Abrahamu ati: ‘Naaza kushuuma hati, nkareeba kwo, ku baraabe bakozire nk’okutaka kw’abarikubarega, oku mpuriire, oku kuri; nari ku kiraabe kitari kityo, nakyo nkimanye.’ (Okutandika 18:20, 21) Kumara akiire, Yehova akaba acwiremu kutamanya obwingi bw’obubi obwabaire buri omu ndembo ezo. Hatariho kubanganisa, Yehova naabaasa kucwamu kutamanya ebiraabeho. (Okutandika 22:12) Kwonka eki tikirikumanyisa ngu Ruhanga n’otahikiriire nari ngu aine obweremwa. Ahabw’okugira ngu “omurimo gwe guhikire,” Ruhanga naaringaaniza okubaasa kwe kw’okumanya eby’omumaisho arikukuhikaanisa n’ebigyendererwa bye kandi tarikugyema bantu kumworobera.b (Eky’Ebiragiro 32:4) N’ahabw’ekyo, nitubaasa kugira ngu tihaine ekirikugyemesereza Ruhanga kukoresa obushoboorozi bwe bw’okumanya ebiraabeho omu biro by’omumaisho kandi niwe arikucwamu obu araabukorese.

MBWENU SHI ABANTU NIBO BARIKUREETAHO OBUBI?

Bumwe aha bubi oburikubaho abantu nibo barikubureetaho. Yetegyereza oku Baibuli erikworeka oku omuntu arikubaasa kuhika aha kukora ebintu bibi. “Omuntu weena ayohibwa yaabeihwabeihwa okwetenga kwe, kwamwosyosya. Bwanyima okwetenga okwo ku kuheza kutwara enda, kuzaara ekibi; n’ekibi ku kikura, kizaara okufa.” (Yakobo 1:14, 15) Abantu ku barikukuratira ebyetengo byabo bibi, nari bakagira omururu, ekirikurugamu nibatunga oburemeezi. (Abarooma 7:21-23) Nk’oku ebyafaayo birikworeka, abantu bakozire ebintu bibi munonga kandi eki kireetsireho okubonabona kwingi. Kandi abantu babi nibareetera abandi kuba abashomankuzi, ekirikwongyera kureetaho obubi.​—Enfumu 1:10-16.

Mbwenu shi Ruhanga aine kutaaha omu nshonga akazibira abantu kukora ebintu bibi? Yetegyereze oku omuntu yaahangirwe. Ebyahandiikirwe nibyoreka ngu Ruhanga akahanga omuntu omu nshusha ye. Ekirikumanyisa ngu abantu nibabaasa kworeka emitwarize nk’eya Ruhanga. (Okutandika 1:26) Abantu baine obugabe kwecweramu kandi nibabaasa kucwamu kukunda Ruhanga bakaguma bari abeesigwa ahari we barikukora ebi arikukunda. (Eky’Ebiragiro 30:19, 20) Ku ogire ngu Ruhanga naagyema abantu kukora ebi arikwenda, ekyo kikaayorekire ngu ekiconco ky’obugabe bw’okwecweramu tikiine mugasho. Ku ogire ngu nikwo kyabaire kiri, abantu bakaabaire bari nka rooboti erikukora ebi eraagiirwe kukora byonka. Nikyo kimwe ekyakubaireho ku ogire ngu buri kimwe kikateerwaho obunaku bwakyo obu kiriije kubaho omu magara g’omuntu. Ka nikitushemeza kumanya ngu Ruhanga naatuha obugabe kwecweramu eki turikwenda kukora! Kwonka eki tikirikumanyisa ngu obusaasi oburikureetwaho enshobe z’abantu n’okucwamu kubi nibiija kugumizamu nibihika aha bantu.

MBWENU SHI EBIBI EBY’ENYIMA NIBYO BIRIKUREETAHO OKUBONABONA?

Waabuuza Ababuda nari Abahindu ekibuuzo ekiri aha magaziini egi, nibabaasa kugarukamu bati: “Ebintu bibi nibihika aha bantu barungi ahabw’okugira ngu hariho ebi baakozire enyima ebirikubareetera kubonabona. Nibaba bariyo nibashashurira ebintu bibi ebi baakozire enyima.”c

Aha bikwatiraine n’enyikiriza erikugira ngu abantu nibabonabona ahabw’ebibi byabo eby’enyima, ni kikuru kumanya eki Baibuli erikugamba aha kufa. Omu musiri Edeni, ahu abantu boona baakomookire, Omuhangi akagambira omuntu w’okubanza ati: “Omuti gwona ogw’omu kibanja noikirizibwa kuryaho nk’oku orikwenda. Kwonka omuti gw’okumanya oburungi n’obubi otariguryaho, ahabw’okuba eizooba eri origuryaho, buzimazima oryafa.” (Okutandika 2:16, 17) Ku ogire ngu Adamu taragomiire Ruhanga, akaabaire naagumaho ebiro byona. Okufa kukaijaho nk’ekifubiro ahabw’okugomera Ruhanga. Ku baazaire abaana, ‘okufa kwabuga omu bantu boona.’ (Abarooma 5:12) N’ahabw’ekyo, nitubaasa kugira ngu “ebihembo by’ekibi n’okufa.” (Abarooma 6:23) Baibuli nayo neeshoboorora eti: “Ofiire aba atakitegyekwa kibi.” (Abarooma 6:7) Ekirikumanyisa ngu bwanyima y’okufa abantu tibarikuguma nibashashurira ebibi byabo.

Abantu nyamwingi obunaku obu nibagira ngu ekirikureeta okubonabona n’ebibi ebi abantu barikuba baakozire enyima. Omuntu oine emiteekateekyere nk’egyo okubonabona okurikumuhikaho n’okurikuhika aha bandi tukurikumwerarikiriza. Kwonka emiteekateekyere nk’egyo terikutuha matsiko goona ngu okubonabona nikwija kuhwaho. Ekirikuhuumuriza abantu b’enyikiriza egyo, n’okuteekateeka ngu omuntu ku arikufa naahindukamu ekindi kintu kisya, kandi ngu naba aine n’okumanya kw’omutaano. Kwonka emiteekateekyere egi neetaanira kimwe n’eki Baibuli erikwegyesha.d

OBUKOMOOKO BUKURU OBW’OBUBI

Obukomooko bukuru bw’obubi ti bantu. Omu kubanza Sitaane Omuregi akaba ari maraika wa Ruhanga omwesigwa, kwonka “taragumiire mu mazima” kandi niwe yaareetsireho ekibi omu nsi. (Yohaana 8:44) Akatandikaho obugomi omu musiri Edeni. (Okutandika 3:1-5) Yesu Kristo akamweta “omubi” kandi “omutegyeki w’ensi egi.” (Matayo 6:13;Yohaana 14:30) Abantu abarikukira obwingi nibakuratira ebishuba bya Sitaane beehuzya emisingye ya Yehova. (1 Yohaana 2:15, 16) ‘Ensi yoona eri omu butegyeki bw’Omubi ogwo,’ nikwo 1 Yohaana 5:19 harikugira. Hariho ebihangirwe eby’omwoyo ebindi ebyacwiremu kukuratira Sitaane. Baibuli neeyoreka ngu Sitaane na baadaimoni be ‘nibagobeza ensi yoona,’ kandi nibareetaho enaku omu nsi. (Okushuuruurwa 12:9, 12) N’ahabw’ekyo, Sitaane Omuregi niwe arikureetaho obubi.

Hatariho kubanganisa, Ruhanga tiwe arikureetaho ebibi ebirikuhika aha bantu kandi tiwe arikubabonabonesa. Kwonka we naaturaganisa kwihaho obubi nk’oku ekicweka ekirikukurataho kirikworeka.