Ruhanga Naija Kwihaho Obubi

Baibuli neeyoreka gye eki Yehova n’omwana we Yesu Kristo barikwija kukora aha bikwatiraine n’okubonabona oku Sitaane Omuregi yaaretsireho. Baibuli neegira ngu “nikyo omwana wa Ruhanga yaayorekirwe kuhwerekyereza emirimo ya Sitaane.” (1 Yohaana 3:8) Ensi egi eijwire omururu, obwangani n’ebikorwa bibi neija kucwekyerezibwa. Yesu akaraganisa ngu “omutegyeki w’ensi egi” Sitaane omuregi, “naija kubingwa.” (Yohaana 12:31) Ensi ku eraihwemu ebikorwa bya Sitaane, neija kuba omwanya ogurimu obusingye.​—2 Petero 3:13.

Kandi shi abo abarikwanga nkana kuhindura aha mitwarize yaabo barikugumizamu nibakora ebintu bibi? Teekateeka aha kuraganisa oku: “Ab’emitima egororokire nibo barituura omu nsi, n’abeesigwa bakagigumamu. Kwonka ababi baryamarwaho omu nsi, kandi abarikureebya baryagikuurirwamu kimwe.” (Enfumu 2:21, 22) Tiharigaruka kubaho abantu babi kubeihabeiha abandi. Omu mbeera nk’ezo ez’obusingye, abantu abeesigwa mporampora nibaija kuba abahikiriire.​—Abarooma 6:17, 18; 8:21.

Omu nsi ensya, Ruhanga naija kwihaho ata obubi? Tarikwija kwihaho abantu obugabe bwabo bw’okwecweramu arikubareetera kutwaza nka rooboti. Kureka, naija kwegyesa abantu abeesigwa ebi arikwenda, arikubahwera kuhindura emiteekateekyere yaabo n’ebikorwa byabo bibi.

Kandi shi ebihikiirizi byo Ruhanga naija kubikorera ki? Naaraganisa ngu Obukama bwe buri haihi kutandika kutegyeka ensi. Ruhanga atooraine Yesu Kristo kuba Omugabe w’Obukama obwo, kandi aine amaani g’okukiza endwara. (Matayo 14:14) Yesu aine obushoboorozi bw’okuzibira ebihikiirizi kubaho. (Mako 4:35-41) N’ahabw’ekyo, okubonabona okurikureetwaho “obunaku n’ebihikiirizi” nikwija kuba kutakiriho. (Omubuurizi 9:11) Ahansi y’obutegyeki bwa Kristo tiharikwija kugaruka kubaho bihikiirizi ebiriteganisa abantu.​—Enfumu 1:33.

Kandi shi abantu abeesigwa nyamwingi abaafiire ahabwa butandu? Yesu atakazoire munywani we Laazaaro, akagira ati: “Niinye kuzooka n’amagara.” (Yohaana 11:25) Buzima, Yesu aine amaani g’okuzoora abaafiire.

Ku oraabe nooyenda kutuura omu nsi ei abantu barungi bariba batarikuhikwaho bubi, teeraho kumanya ebirikukwata ahari Ruhanga hamwe n’ebigyendererwa bye orikwega Baibuli. Abajurizi ba Yehova abari omu kicweka eki orikutuuramu nibaija kukuhwera kubaasa kutunga okumanya okwo. Nitukushaba kuhika ahari abo abari omu kicweka kyawe nari kuhandiikira abaateire magaziini egi.