Tushemereire Kutiina Sitaane?

Nk’omwoya ogurikwetwa carbon monoxide, Sitaane nawe tarikureebwa, tikirikworobera abantu kumumanya, kandi n’ow’akabi munonga. Kwonka Ruhanga atuhaire obuhwezi. Toshemereire kutiina Sitaane waaba nookoresa gye ebiconco ebi Ruhanga atuhaire ebirikworekwa ahaifo.

Obushoboorozi bw’okucwamu. Yakobo 4:7 nihagira hati: “Murwanise Sitaane, aryabahunga.” N’obu Sitaane araabe aine amaani, tarikubaasa kukugyema kukora ebintu ebi otarikwenda kukora. Noobaasa kwecweramu. Petero y’okubanza 5:9 nihagira hati: “Mumurwanise [Omuregi], muhamire, omu kwikiriza.” Ijuka ngu Sitaane akareka Yesu bwanyima y’okumwangira emirundi eshatu arikumugyeza. (Matayo 4:11) Naiwe noobaasa kucwamu kwangira emitego ya Sitaane.

Omukago na Ruhanga. Yakobo 4:8 nihatuhiga kwirira “haihi Ruhanga.” Yehova naakweta kugira omukago nawe. Noobaasa kukikora ota? Omuringo murungi gw’okukikora, n’okwega bingi ebirikumukwataho kuruga omu Baibuli. (Yohaana 17:3) Ebirikukwata ahari Yehova ebi orikwega, nibiija kukureetera kumukunda n’okukora ebi arikukunda. (1 Yohaana 5:3) Ku orayirire haihi Tataitwe ow’omu iguru, naija kukora ki? Yakobo naayongyera agira ngu Ruhanga naija ‘kukwirira haihi.’

Naakuraganisa kukurinda. Enfumu 18:10 nihagira hati: “Eiziina rya MUKAMA n’omunaara gugumire, ohikiriire ku aguhungiramu, aguma ari buhooro.” Kwonka, eki tikirikumanyisa ngu eiziina rya Ruhanga n’eky’okukoresa kureetera abantu emigisha. Kureka, nikimanyisa ngu abo abarikuriha ekitiinisa nibabaasa kumushaba kubaha oburinzi eshaaha yoona.

Eky’okureeberaho ekirikwegyesa. Ebyakozirwe 19:19 nihatugambira ahari abo abaabaire bahindukire Abakristaayo basya omuri Efeso hati: “Baingi aharibo abaabaire bakora eby’obufumu baateeranira hamwe ebitabo byabo, eby’okuragura babyokyeza omu maisho g’abantu boona; baabibariirira obuguzi bwabyo baashanga nibuhika ebicweka by’efeeza obukumi butano.”a Abakristaayo abo bakacwekyereza buri kintu kyona ekyabaire kiine akakwate n’eby’obufumu n’obu biraabe byabaire biri eby’obuguzi bwingi. Eky’okureeberaho eki nikibaasa kutuhwera obunaku obu. Ensi egi eijwiremu eby’obufumu n’okubandwa. Kandi ebintu ebiine akakwate n’eby’obufumu hamwe n’emigyenzo ebirikureebeka nk’ebitari by’akabi, nibibaasa kureetera omuntu kutaahirirwa baadaimoni. Ni kikuru kweihaho ebintu nk’ebyo n’obu byakuba biri eby’obuguzi bwingi.​—Eky’Ebiragiro 18:10-12.

Rogelio, orikugambwaho omuri kimwe aha bicweka ebiri omu munaara ogu, kumara emyaka 50 akaba atarikwikiriza ngu Omuregi ahariho. Kwonka akahindura emiteekateekyere ye. Ahabw’enki? “Nkarugaho naatunga Baibuli,” Rogelio nikwo yaagizire. “Ebyahandiikirwe bikampamiza ngu omuregi ariho. Kandi okumanya ekyo na hati nikimpwera kwetantara emitego ye.”

Oine ekihika ky’okureeba obunaku obu Sitaane araabe atakiriho? Buzima noobaasa. Ebyahandiikirwe nibigamba aha bwire obu Omuregi, orikubeihabeiha baingi, araanagwe “omu nyanja y’omuriro n’obuganga bw’ekibiriiti.” (Okushuuruurwa 20:10) Buzima, omuriro n’obuganga bw’ekibiriiti tibirikubaasa kucwekyereza ekihangirwe ekyo eky’omwoyo. N’ahabw’ekyo, enyanja y’omuriro neemanyisa okucwekyerereza kimwe. Sitaane naija kuba atakiriho. Obwo nibwija kuba obwire bw’okushemererwa ahari abo abarikukunda Ruhanga.

Ekyo kitakabaireho, gumizamu orikwega ahari Yehova n’emihanda ye.b Kiteekateekeho, obu oribaasa kugira ngu, “Sitaane tariho.”