Oburyarya! Nibwija Kuhwaho?

PANAYIOTA akakurira aha kirwa ky’enyanja Mediterranean. Obu yaabaire akiri omunyeeto, akaba naakunda eby’obutegyeki. Bwanyima akaba omuhandiiki w’ekibiina ky’eby’obutegyeki omu kyaro kyabo. Akaba agyenda enju aha nju arikushorooza sente z’ekibiina ekyo. Ku haahingwireho obwire, Panayiota akahwamu amaani. Ekibiina ekyo kikaba kiijwiremu okwendeza abanyabuzaare, ebigyendererwa bibi, obwangani, n’eitima, n’obu baraabe baabaire nibeetana abanywani.

Daniel akakurira omu ka eyaabaire neekunda munonga eby’ediini omuri Ireland. Kwonka eky’obusaasi, naijukira kimwe ngu abeebembezi b’ediini bakaba bari endyaryarya barikunywa amaarwa maingi, barikuteera zaara, barikwiba esente ezi barikushorooza, kandi obwo barikwegyesa ngu ababi nibaija kwokibwa omu muriro ogutaraara.

Jeffery akamara obwire bwingi arikukora omu kitongore ekirikushuubuza ebintu omu mahanga maingi eki bakama baakyo baabaire baine ofiisi omuri United Kingdom na United States. Naijuka ngu emirundi mingi abakozi b’ekitongore ekyo n’ab’eby’obushuubuzi abandi bakaba bakoresa ebishuba baaba nibakoragana n’abakuru ba gavumenti. Omu buryarya, bakaba baba bamaririire kugamba ebishuba kugira ngu gavumenti ekoragane nabo.

Eky’obusaasi, aba tibo bonka abaine oburyarya. Oburyarya bukanyire munonga omu by’obutegyeki, ediini, n’omu by’obushuubuzi. Ekigambo “endyarya” nikiruga omu kigambo ky’Orugriika ekirikumanyisa omugambi nari orikuzaana emizaano ajwaire akakookoro. Bwanyima, kikaija kumanyisa buri omwe orikwehindura eki atari kubeiha abandi nari orikuba aine ebigyendererwa bibi.

Abantu abu oburyarya burikuteganisa nibabaasa kuba enshaarizi, kugira ekiniga, nari enziika. Abantu nkabo nibabaasa kwebuuza bati: “Oburyarya! Nibwija Kuhwaho?” Ekirungi, Ekigambo kya Ruhanga nikituha obuhame ngu nibwija kuhwaho.

OKU RUHANGA N’OMWANA WE BARIKUREEBA OBURYARYA

Kurugiirira ahari Baibuli, oburyarya tiburatandikiire omu bantu, kureka bukatandikira aha kihangwa eky’omwoyo ekitarikureebwa. Ira, Sitaane Omuregi akakoresa enjoka nk’akakookoro, yaayehindura nka murungi yaabeiha omukazi w’okubanza Haawa. (Okutandika 3:1-5) Kuruga obwo, abantu baingi batwire nibeehindura ekintu eki batari, kandi eki nibakikora kubeiha abandi n’ahabw’okweyendeza.

Obu Israeli eya ira yaagwa omu mutego gw’okuramya kw’ebishuba n’oburyarya bw’eby’omwoyo, Ruhanga akabarabura emirundi mingi ekyabaire nikiza kuruga omu buryarya bwabo. Kurabira omuri nabi Isaaya, Yehova akagira ati: “Abantu aba nibaanyirira haihi, bampa ekitiinisa n’akanwa kaabo n’eminwa yaabo, kwonka emitima yaabo endi hare.” (Isaaya 29:13) Eihanga eryo ku ryayangire kuhurikiza, Ruhanga akaikiriza Abababulooni omuri 607 n’Abarooma omu gwa 70 kucwekyereza Yerusaalemu na hekalu. Buzima, Ruhanga tarikubaasa kwikiriza oburyarya kugumaho ebiro byona.

Kwonka, Ruhanga n’omwana we, Yesu, nibasiimira kimwe abantu abataine buryarya abarikugamba amazima. Nk’eky’okureeberaho, obu Yesu yaabaire ari omu nsi, omushaija orikwetwa Nasanaeli akaija ahu ari. Yesu ku yaamureebire, Yamugira ati: “Reeba Omwisraeli kashushu, otaine buryarya.” (Yohaana 1:47) Nasanaeli, kandi orikwetwa Batolomayo, akahinduka omwe aha ntumwa za Yesu 12.​—Luka 6:13-16.

Yesu akaba amara obwire n’abakuratsi be, kandi akaba abeegyesa emiteekateekyere n’emihanda ya Ruhanga. Abakuratsi ba Yesu tibaine kuba endyaryarya. Yesu akooreka ngu naayangira kimwe oburyarya bw’abeebembezi b’amadiini ab’obwire obwo. Yetegyereze emwe aha mitwarize yaabo.

Bakaba bakora “eby’okuhikiirira” byabo kweyoreka. Yesu akagambira abaabaire bamuhurikiize ati: “Mwerinde murekye kukorera eby’okuhikiirira byanyu omu maisho g’abantu ngu babareebe . . . murekye kuba nk’endyarya.” Akagaruka yaabagambira kuhayo ebiconco by’embabazi “omu mubonano.” Bakaba bashemereire kushaba bari omu mubonano, beitu kutari kwetandarika ngu bareebwe bandi. Obwo nibwo okuramya kwabo kwabaire nikuza kuba okuhikire kandi okurikusiimwa Ishe.​—Matayo 6:1-6.

Bakaba barahuka kucwera abandi orubanja. Yesu akagira ati: “Iwe ndyarya ‘we! banza oyekize empimbi eri omu riisho ryawe, obone kureeba gye oku oraatokoore mugyenzi waawe.” (Matayo 7:5) Omuntu yaata omutima aha nshobe z’abandi kandi obwo we aine ez’amaani, naaba naayehindura ekintu eki atari. Ahakuba buzima, “boona bakashiisha, kandi tibarikuhika aha kitiinisa kya Ruhanga.”​—Abarooma 3:23.

Bakaba baine ebigyendererwa bitahikire. Eizooba rimwe, abeegi b’Abafarisaayo n’abashagiki ba Heroode, bakaija ahari Yesu baamubuuza ekibuuzo ekikwatiraine n’omushoro. Barikumutega, bakamugira bati: “Mwegyesa, nitumanya ku ori ow’amazima, ku oyegyesa omuhanda gwa Ruhanga omu mazima.” Batyo baamutega nibamubuuza bati: “Ebiragiro nibiikiriza kuha Kaisaari omushoro, nari tikwo?” Yesu akabagarukamu ati: “Nimuntegyera ki, imwe ndyarya ‘mwe?” Yesu ahonaaho akabeeta endyarya, ahabw’okuba buzima bakaba batarikwenda ky’okugarukamu ky’ekibuuzo kyabo, kureka bakaba nibateeraho ‘kumutega omu kugamba kwe.’​—Matayo 22:15.

Bwanyima y’ekibiina Ekikristaayo kutandikaho aha Pentekoote omu gwa 33, hakabaho embeera eyaabaasiise amazima n’obwesigwa kukanya. Abakristaayo ab’amazima bakateeraho munonga kweihamu omutwarize gw’oburyarya. Nk’eky’okureeberaho, Petero, omwe aha ntumwa 12, akahiga Abakristaayo bagyenzi be kuba ‘abarikworobera amazima, ngu babone kukunda ab’eishe-emwe batarikuryarya.’ (1 Petero 1:22) Entumwa Paulo akeeshengyereza bagyenzi be kugira ‘okukunda okurikuruga aha mutima ogushemeire n’omwoyo ogutarikweshinja n’okwikiriza okutarimu buryarya.’​—1 Timoseo 1:5.

AMAANI G’EKIGAMBO KYA RUHANGA

Ebi Yesu n’entumwa ze baayegyeise, ebirikushangwa omu Baibuli, biine amaani obunaku obu nk’oku byabaire biri omu kyasha ky’okubanza. Niyo nshonga ahabw’enki entumwa Paulo yaahandiikire ati: “Ekigambo kya Ruhanga kiine amagara n’amaani, kiine obwogi bwingi okukira rurara yoona ey’amoogi abiri, nikicumita kihika ahu kitaanisiza amagara n’omwoyo, engingo n’omushokooro, kandi kirahuka kucaaka ebi omuntu arikuteekateeka n’ebi amaririire omu mutima gwe kukora.” (Abaheburaayo 4:12) Okumanya ebi Baibuli erikwegyesa n’okuteeraho kubigyenderaho kihwereire baingi kuruga omu buryarya bakagira amazima n’obwesigwa. Yetegyereze abantu bashatu abaagambwaho aha kutandika.

Panayiota obu yaikiriza kuza omu nteerane aha Kyombeko ky’Obukama eky’Abajurizi ba Yehova, nibwo yaahindura emiteekateekyere ye. Tarareebireyo bantu abaine oburyarya bw’okweyoreka nk’abahikiriire kwenda kushemeza abandi. Naagira ati: “Nkareebayo rukundo eyaabuzima, abantu barikworeka ngu nibafayo aha bandi, ekintu eki naabaire ntakareebahoga emyaka yoona ei naamazire omu by’obutegyeki.”

Panayiota akatandika kwega Baibuli yaatunguuka yaabatizibwa. Egyo n’emyaka 30 enyima. Naagira ati: “Nkagira ekigyendererwa ekyabuzima ku naatandikire kubuurira aha Bukama bwa Ruhanga ngu nibwo bwonko oburaareeteho oburingaaniza omu nsi, okutashushana n’obu naabaire ngyenda enju aha nju kumanyisa abantu ebirikukwata aha kibiina ky’eby’obutegyeki.”

Daniel akatunguuka omu kibiina Ekikristaayo yaaheebwa n’obujunaanizibwa. Bwanyima y’emyaka mikye, akakora enshobe reero omuntu we w’omunda yaatandika kumushiinja. Akagira ati: “Ahabw’oburyarya obu naabaire ndeebire omu kanisa, nkareeba ngu kihikire kufeerwa obujunaanizibwa bwangye bw’okuheereza. Nkaba ntarikubaasa kwikiriza ngu Abakristaayo bagyenzi bangye bagume nibantwara oku ntari.”

Ekirikushemeza, ku haahingwireho obwire, Daniel akagaruka yaaheereza atarikweshiinja, kandi yaikiriza n’okugaruka kuheebwa obujunaanizibwa. Obwesigwa nk’obwo nibworeka ngu abantu baine kuheereza Ruhanga bataine buryarya. Nibeega ‘kweyiha empimbi’ omu maisho gaabo batakaihire ‘akatokoozi’ omu maisho g’ab’eishe-emwe bagyenzi baabo.

Jeffery owaamazire obwire bwingi omu by’obushuubuzi, akagira ati: “Ku naagumire nintunguuka omu kumanya Baibuli, nkamanya ngu tinkiri omuntu orikubeihabeiha abandi kubaasa kukoragana nabo omu by’obushuubuzi. Omuntu wangye w’omunda akakwatwaho Ebyahandiikirwe nk’Enfumu 11:1, aharikugira ngu ‘eminzaani y’oburyarya n’ekirikunugwa ahari’ Yehova.” Buzima, okutashushana n’abo abaabuurize Yesu aha by’omushoro, Jeffery akeega kukoragana n’ab’eishe-emwe n’abatari b’eishe-emwe ataine bigyendererwa bibi.

Obukaikuru bw’Abajurizi ba Yehova omu nsi yoona nibateeraho kugyendera aha bi beegire omu Baibuli. Nibakora kyona ekirikubaasika kujwara “omuntu ondiijo omusya, owaahangirwe omu nshusha ya Ruhanga omu kuhikiirira n’okwera okw’amazima.” (Abaefeso 4:24) Nitukuhiga kumanya ebirikukwata aha Bajurizi ba Yehova, ebi barikwikiriza, n’oku barikubaasa kukuhwera kwega ebirikukwata aha nsi ensya ei Ruhanga arikuraganisa. Ensi egyo neija kuba erimu “okuhikiirira” kandi terikwija kuba erimu oburyarya.​—2 Petero 3:13.