Okuteebereza aha Biro by’Omumaisho

Oreebuurizeho ebiro by’omumaisho ebi oraagire n’eka yaawe? Nooreeba ngu omu biro by’omumaisho nihaija kuba hariho obugaiga, obukyene, okukundana, nari okugira eihamba? Noija kuhangaara, nari noija kufa kitaraariire? Abantu batwire nibateebereza aha bibuuzo ebi kumara emyaka mingi.

Obunaku obu abahangu abarikucondooza aha mbeera z’ensi nibateebereza aha biro by’omumaisho. N’obu kumwe aha kuteebereza kwabo kubaasize kuhikiirira, okumwe tikubaasize kuhikiirira. Nk’eky’okureeberaho, omuri 1912, Guglielmo Marconi, owaajumbwire tereguraafu etarikukoresa waaya, akateebereza ati: “Ahabw’okugira ngu turiyo nituza omu bunaku bw’ebyoma ebitarikukoresa waaya, eki nikiija kuremesa entaro kubaho.” Kandi omujwekyerwa w’ekitongore kya Decca ekirikukwata amaraka, owaabaire naayanga abeeshongozi ba Beatles omuri 1962, akaba naikiriza ngu abeeshongozi abarikuteera endongo bari haihi kuhanguura.

Abamwe nibeebuuza aha baraguzi kubagambira ekiraabeho omu biro by’omumaisho. Abandi nibeebuuza aha barikuraguza enyonyoozi, nibareeba obumanyiso oburikukira kwikiriza omu mpapura z’amakuru barikuteekateeka ngu nibuhikaana n’okuzaarwa kwabo. Abamwe nibeebuuza aha barikuragura ebiraabeho nari abarangi, abarikugira ngu nibabaasa kumanya ebiraakubeho eby’omumaisho barikukoresa bwakaada, engisha, nari barikureeba emisitaari y’omu ngaro.

Omu kuteeraho kwabo kumanya ebiro by’omumaisho, abamwe ira bakaba nibeebuuza aha barangi b’ebishuba abarikureeta obutumwa obu barikugira ngu niburuga ahari ruhanga ou barikujwekyera. Nk’eky’okureeberaho, nikigambwa ngu Omugabe Croesus owa Lydia akoohereza ebiconco by’omuhendo kubiha omurangi omuri Delphi, eya Bugriika, reero yaamushaba kumugambira ekiraarugyemu yaarwana na Kuuro owa Peresi. Omurangi ogu akagira ngu Croesus akaba naija kucwekyereza “obugabe kirimaani” yaataahirira Kuuro. Croesus aine obuhame ngu naaza kusingura, akagyenda yaataahirira Kuuro kwonka obugabe kirimaani obwacwekyereziibwe bukaba buri obwe!

Okuteebereza oku nabi atarashobooroire gye, kukaba kuri okw’ekishobobo, ahakuba orubaju rwona orwakubaasize kusingura, kukaba nikwija kureebeka nk’okuhikire. Croesus akafeerwa buri kintu eki yaabaire aine ahabw’okugambirwa ebitashobooroirwe gye ebyamurugiiremu akabi. Mbwenu shi obunaku obu abarikwebuuza aha barikuteebereza aha biro by’omumaisho nibatunga akarungi koona?