“Amiina” Yaawe ni Nkuru Ahari Yehova
OKURAMYA kwaitu ni kukuru ahari Yehova. ‘Naahurira’ abaheereza be kandi naabafaho nangwa n’ebikorwa bikye eby’okumuhimbisa, naabireeba. (Mal. 3:16) Nk’eky’okureeberaho, teekateeka aha kigambo “amiina” ekirikukira kugambwa emirundi mingi. Mbwenu shi ekigambo kikye eki Yehova naakitwara nk’eky’omugasho? Eego! Okumanya obukuru bwakyo, ka tureebe eki kirikumanyisa n’oku kirikukoresibwa omu Baibuli.
‘ABANTU BOONA NIBAIJA KUGARUKAMU NGU AMIINA’
Ekigambo “amiina” nikimanyisa ngu “kibe nikwo kyaba,” nari “eego buzima.” Nikiruga omu kigambo ky’Oruheburaayo ekiine amakuru “g’okuba omwesigwa,” nari “okuba ow’amazima.” Obumwe kikaba kikoresibwa omu kucwa emanja. Omuntu ku yaabaire aheza kurahira, akaba agira ngu “amiina” kuhamya ngu ebi yaagamba byaba bihikire, kandi ngu naza kwikiriza ebiraarugye omu bi yaagamba. (Kub. 5:22) Ku yaabaire akigamba omu maisho g’abantu, kikaba kyongyera kumuha omuhimbo gw’okukora eki yaagamba.—Neh. 5:13.
Eky’okureeberaho ekirikushemeza eky’okukoresa ekigambo “amiina” n’ekiri omu Eky’Ebiragiro eshuura 27. Bwanyima y’Abaisraeli kutaaha omu Nsi Eyaaraganisiibwe, boona bakaba baine kuguma nibateeranira aha gati y’Orushozi Ebali n’Orushozi Gerizimu kuhurira Ebirango nibishomwa. Bakaba batarikuzayo kuhurikiza kwonka, beitu n’okugamba butunu ngu nibaikiriza Ebiragiro ebyo. Bakakora eki barikugarukamu ngu “amiina” baaheza kushomerwa ebibi ebirikuruga omu kugoma. (Bir. 27:15-26) Teekateeka aha iraka ry’abashaija, abakazi, n’abaana baingi barikugarukamu! (Yos. 8:30-35) Buzima tibarayebirwe ebigambo ebyagambirwe eizooba eryo. Kandi Abaisraeli abo bakakora ebi baagambire, ahakuba ekyahandiikirwe nikigira kiti: ‘Abaisraeli bakaheereza [Yehova] omu biro byona ebya Yoshua, n’omu biro byona eby’abakuru abaatsigaireho yaafiire, abaabaire nibamanya ebi [Yehova] yaakoreire Abaisraeli.’—Yos. 24:31.
Yesu nawe akakoresa ekigambo “amiina” kuhamya ngu ebi yaabaire naagamba bihikire, kwonka we akakikora omu muringo gw’omutaano. Omu mwanya gw’okukoresa ekigambo “amiina” nari “buzimazima” yaaba naagarukamu, akaba akikoresa kwanjura enshonga ezirikukwata aha mazima. Obumwe akaba ahamiiriza enshonga arikugira ngu “buzimazima.” (Mat. 5:18; Yoh. 1:51) N’ahabw’ekyo akahamiza abamuhurikiize ngu ebigambo bye bikaba biri amazima agatarimu kubangaanisa. Yesu akaba naabaasa kugamba aine obuhame obwo, ahakuba niwe yaahairwe obushoboorozi bw’okuhikiiriza ebi Ruhanga yaaraganiise.—2 Kor. 1:20; Kush. 3:14.
‘ABANTU BAKAGIRA NGU AMIINA BAAHIMBISA’ YEHOVA
Kandi Abaisraeli bakakoresa ekigambo “amiina” obu baabaire nibahimbisa Yehova barikumushaba. (Neh. 8:6; Zab. 41:13) Abaabaire bahurikiize bakagamba ekigambo ekyo bwanyima y’okushaba, kworeka ngu bakaba nibaikirizana n’ebyashabwa. Boona bakagarukamu, kyayongyera aha burungi bw’omukoro ogwo. Eki nikyo kyabaireho obu Omugabe Daudi yaareeta Eshanduukye y’endagaano omuri Yerusaalemu. Aha mukoro gw’okushemererwa ogwakuratsireho, akashaba kuruga aha mutima omu kyeshongoro ekiri omu 1 Obusingye 16:8-36. Abaabaire bariho bakakwatwaho ebigambo bye reero “boona baagira bati: Amiina; baahimbisa” Yehova. Buzima okugarukamu kwabo boona hamwe, kikoongyera aha kushemererwa kw’eizooba eryo.
Omu kyasha ky’okubanza Abakristaayo nabo bakakoresa ekigambo “amiina” barikuhimbisa Yehova. Abahandiiki ba Baibuli obwire obwingi bakaba bakikoresa omu mabaruha gaabo. (Rom. 1:25; 16:27; 1 Pet. 4:11) Kandi ekitabo ky’Okushuuruurwa nikigamba aha bihangirwe by’omwoyo birikuhimbisa Yehova birikugira ngu, “Amiina, Haleluya!” nari himbisa Yehova. (Kush. 19:1, 4) Abakristaayo b’okubanza bakaba nibakira kugira ngu “amiina” bwanyima y’okushaba omu nteerane zaabo. (1 Kor. 14:16) Kwonka bakaba batarikufa kugarukamu ekigambo ekyo batabandize kuteekateeka.
EKIRIKUREETERA “AMIINA” YAAWE KUBA NKURU
Bwanyima y’okureeba oku ekigambo “amiina” kyabaire nikikoresibwa ira, nitubaasa kureeba ahabw’enki ni kikuru kukikoresa aha muheru gw’okushaba. Twakigamba aha muheru gw’okushaba kwaitu, nitworeka ngu nitumanyisa ebi twaheza kugamba. Kandi twagira ngu “amiina” omuntu yaaba atujwekyeire omu kushaba, n’obu twakukigambira aha mutima, nitworeka ngu nitwikirizana n’ebi yaagamba. Yetegyereze enshonga ezindi ahabw’enki “amiina” eri nkuru.
Nituba tutaire omutima aha kuramya kwaitu. Nituramya Yehova omu kushaba ti ahabw’ebi turikugamba byonka beitu n’oku turikutwaza. Okugira ngu “amiina” nikibaasa kutuhwera kuguma twine emiteekateekyere mirungi n’okuguma tutaire omutima aha kushaba.
Twine obumwe omu kuramya. Omuntu yaatujwekyera omu kushaba twena omu kibiina nituba tutaire omutima aha bi arikugamba. (Byak. 1:14; 12:5) Twagarukamu hamwe n’ab’eishe-emwe na banyaanyazi-itwe, nitwongyera kugira obumwe. Yaaba tugira ngu “amiina” omu iraka eririkuhurirwa nari tukakigambira aha mutima, nikireetera Yehova kugarukamu eki twamushaba.
“Amiina” yaitu neeyongyera aha kuhimbisa Yehova
Nituba nituhimbisa Yehova. Yehova naareeba buri kimwe eki turikukora omu kumuramya. (Luk. 21:2, 3) Naareeba ebigyendererwa byaitu n’ebiri omu mitima yaitu. N’obu twakuba nituhurikiza enteerane kurabira aha simu, nituba twine obuhame ngu “amiina” yaitu Yehova naagihurira. Twagira ngu “amiina” nituba twayegaita aha bari omu ruteerane omu kuhimbisa Yehova.
Okugira ngu “amiina” nikibaasa kureebeka nk’ekitari ky’omugasho, kwonka buzima ni kikuru. Nk’oku ekitabo kimwe ekirikushoboorora aha Baibuli kirikugira, abaheereza ba Ruhanga “baakoresa ekigambo kimwe eki,” nibooreka “obuhame, okusiima kw’amaani, n’amatsiko maingi agari omu mitima yaabo.” N’ahabw’ekyo buri “amiina” ei turikugamba eine kuba neeshemeza Yehova.—Zab. 19:14.