Akabokisi k’Ebibuuzo

◼ Nitubaasa kuhamya tuta ngu Ekyombeko ky’Obukama kiine oburinzi?

Nk’oku turi omu biro by’akabi kaingi tushemereire kufayo munonga aha bikwatiraine n’oburinzi bw’Ekyombeko ky’Obukama. Nk’oku turikufayo ngu amaka gaitu gagire oburinzi burikumara, nikwo tushemereire kufayo n’aha Byombeko by’Obukama. Abareeberezi nibo baine obujunaanizibwa kureeba ngu buri Kyombeko ky’Obukama kyagira oburinzi. Oburinzi nibwetengyesa nk’oku turikureeba abarikuhenda ebiragiro barikushiisha ebintu by’abandi n’okwiba kurikubaho aha byombeko bingi omu bicweka bitari bimwe na bimwe.

Ekyombeko ky’Obukama kubaasa kugira oburinzi, bwanyima y’enteerane, geeti, enyigi n’amadirisa biine kukingwa. Ab’eishe-emwe abarikubaasa baine kuheebwa obujunaanizibwa kureeba ngu burikuheeza kukoresa Ekyombeko ky’Obukama kyakingwa gye. Eki nikitwariramu n’obu ekyombeko ky’obukama kirikubamu emikoro endiijo etari nteerane eza butoosha nka, emikoro y’okugaita nari kyaba nikibonezibwa.

Ekyombeko ky’Obukama kyaba kiine ah’okwemereza ebiiruka, ni kirungi kutaho amataara omu mwabazyo. Ekyo nikiija kutuubya aha kushiisha ebiiruka hamwe n’okuhutaza ab’eishe-emwe na banyaanyazi-itwe baaba nibaruga omu Kyombeko ky’Obukama. Ebibiina ebimwe bishangire ngu n’eky’oburyo omu bwire bw’enteerane kugira ab’eishe-emwe abaaguma nibataana embu kushohora aheeru kureeba ngu hatagira owaiba ebiiruka nari akabishiisha.

Omu bibiina ebimwe, emiryango neeba eine kukingwa baaba bari omu nteerane. Omu mbeera nk’egyo, abarikwakiira abantu baine kuguma aha muryango obwire bwona kureeba abarikutaahamu. Akakiiko k’abareeberezi kaine kucwamu kukoresa oburinzi oburi kuhikaana n’ebiragiro ebirikukwata aha kurinda emyanya erikukira kweteeraniramu abantu baingi. Entebeekanisa nk’egi yaateebwaho, ab’omu kibiina baine kumanyisibwa ngu omuryango gw’Ekyombeko ky’Obukama nigwija kuba nigukingwa.

Nitwenda ngu ab’eishe-emwe hamwe n’abarikwija omu nteerane aha Kyombeko ky’Obukama kuba baine oburinzi kandi n’ebintu ebiri aha Kyombeko ky’Obukama bitaibwa nari bikashiishwa. N’ahabw’ekyo abareeberezi omu bibiina byona baine kumanya embeera eziriho omu kicweka kyanyu kugira ngu Ekyombeko ky’Obukama kyarindwa hamwe n’abarikuba bari omu nteerane.