Abandi Nibakwegaho Ki?
1. Abeegi ba Yesu bakamwegaho ki?
1 Yesu akagira ati: “Mwekorere omugamba gwangye, muunyegyereho.” (Mat. 11:29) Buzima akeegyesa abandi arikubateeraho eky’okureeberaho kirungi beitu bitari mu bigambo bye byonka. Teekateeka aha eki entumwa zaayegire ahabw’okureeba oku Yesu yaabaire naatwaza. Akaba ari omucureezi, aine embabazi na rukundo. (Mat. 8:1-3; Mak. 6:30-34) Buzima akaba ari omucureezi. (Yoh. 13:2-5) Obu baabaire baba nibabuurira nawe, entumwa bakareeba ngu akaba ari omukozi owaabaire naakora n’amaani kandi arikubuurira gye abandi amakuru marungi. (Luk. 8:1; 21:37, 38) Abandi nibakwatwaho bata ku barikureeba oku turikutwaza omu kubuurira?
2. Emitwarize yaitu mirungi n’enjwara nungi nibibaasa kukwata bita aha bu turikubuurira?
2 Abu Turikubuurira: Enjwara nungi, emicwe mirungi, n’okufa aha bandi nibibaasa kukwata munonga aha bu turikubuurira. (2 Kor. 6:3; Fil. 1:27) Nibareeba ngu butoosha nitukoresa Baibuli. Abandi nikibashemeza okureeba ngu nitufayo kubahurikiza baaba nibagamba. Guma noijuka ngu okuteeraho abandi eky’okureeberaho kirungi omuri ebyo nikibaasa kubahwera kwikiriza amakuru marungi g’Obukama.
3. Ab’eishe-emwe bagyenzi baitu nitubaasa kubahwera tuta?
3 Ab’eishe-emwe Bagyenzi Baitu: Teekateeka n’aha ku turikubaasa kuhwera ab’eishe-emwe bagyenzi baitu. Twaba nitubuurira n’omujinya nikibaasa kuhwera n’abandi kugira omujinya. Nk’oku ekyoma kityaza ekindi, nikwo n’enyanjura zaitu zaaba zitebeekanisiibwe gye zirikuhiga abandi kwongyera kubuurira gye. (Enf. 27:17) Okuteeraho kuhandiika abo abarikworeka ngu nibenda kumanya ebirikukiraho kandi tukateeraho kugarukayo kubataayaayira ahonaaho, nikihiga abu turikubuurira nabo kukora nikyo kimwe. Twakora tutyo, nitwija kuhwera ababuurizi bagyenzi baitu omu kubuurira kwaitu.—2 Tim. 4:5.
4. Ahabw’enki butoosha ni kirungi okushwijuma oku turikutwaza?
4 Ni kirungi butoosha okushwijuma ebi orikukora n’ebi orikugamba n’oku eky’okureeberaho kyawe kirikukwata aha bandi. Eky’okureeberaho kyaitu kirungi nikaija kushemeza Yehova kandi nitubaasa kugamba ebigambo nk’ebya entumwa Paulo ebi: “Mukuratire emitwarize yangye, nk’oku naanye nkuratira Kristo.”—1 Kor. 11:1.