Yohaana Omubatizi Akaba Ari Oha?
Eki Baibuli erikugarukamu
Yohaana Omubatizi akaba ari nabi wa Ruhanga. (Luka 1:76) Akazaarwa ekyasha ky’okubanza Y.A. kitakahendeire, kandi yaabaho omu kyasha ky’okubanza Y.A.K. Ruhanga akamutuma kutebeekanisa omuhanda gwa Mesia nari Kristo. Eki Yohaana akakikora arikugambira Abayudaaya bagyenzi be obutumwa bwa Ruhanga ngu bahindure emitima yaabo bagarukire Ruhanga.—Mako 1:1-4; Luka 1:13, 16, 17.
Obutumwa bwa Yohaana bukaba nibwija kuhwera abacureezi kumanya ngu Yesu owa Nazareesi niwe yaabaire ari Mesia owaaraganisiibwe. (Matayo 11:10) Yohaana akahiga abu yaabaire naabuurira kweteisa ebibi byabo, reero babatizibwe kworeka ngu beeteisize. (Luka 3:3-6) Ahabw’okugira ngu Yohaana akabatiza abantu baingi, naayetwa Omubatizi nari Omubatiza. Okubatiza kukuru kwa Yohaana n’obu yaabatiza Yesu.a—Mako 1:9.
Omu kicweka eki
Niki ekyareeteire Yohaana kuba ow’omutaano?
Omurimo gwe gukagambwaho kare: Yohaana akahikiiriza obunabi bwa Yehova oburikukwata aha ntumwa kurabira omu murimo gwe gw’okubuurira. (Malaki 3:1; Matayo 3:1-3) Niwe yaakozire omurimo ‘gw’okutebeekanisiza [Yehova] abantu abeeteekateekire’, ekirikumanyisa okutebeekanisiza Abayuda bagyenzi be omuhanda gw’okwikiriza obutumwa bw’omujwekyerwa mukuru owa Yehova Ruhanga, Yesu Kristo.—Luka 1:17.
Ebi Yaakozire: Yesu akagira ngu “tihakabahoga n’omwe orikukira Yohaana Omubatizi obukuru, kwonka omuto omu bukama bw’omu iguru naamukira.” (Matayo 11:11) Ahabw’okugira ngu Yohaana akaba atari nabi kyonka beitu ‘n’entumwa’ eyaaraganisiibwe, tihaine omuheereza wa Ruhanga owaamubandiize owaabaire naatwarwa nk’orikumukira. Kandi ebigambo bya Yesu nibyoreka ngu Yohaana tarikwija kuza omu Bukama bw’omu iguru.b Nabi omwesigwa ogu akafa, obu Yesu yaabaire atakabaasiise abantu kutunga omugisha gw’okuza omu iguru. (Abaheburaayo 10:19, 20) Kwonka, Yohaana naija kutegyekwa Obukama bwa Ruhanga atungye amagara agatahwaho omu Paradiso omu nsi.—Zaaburi 37:29; Luka 23:43.
Ni baahi abaazaire Yohaana Omubatizi?
Abazaire ba Yohaana bakaba bari Zekaria na Elizaabeesi. Zekaria akaba ari Omuyudaaya omunyamurwa. Yohaana akazaarwa omu muringo gw’eky’okutangaaza, nyina akaba ari engumba, nari atarikubaasa kuzaara abaana. Kandi, Elizaabeesi na Zekaria “bakaba bakuzire munonga.”—Luka 1:5-7, 13.
Ni baahi abaareeteire Yohaana kwitwa?
Omugabe Heroode Antipa akaragiira ngu omutwe gwa Yohaana gutemweho. Eki akakikora ahabw’okugyemeserezibwa omukazi we Herodia. Akaba naayanga Yohaana ahabw’okugira ngu akaba agambiire Heroode ngu obushwere bwe na Herodia bukaba butahikire omu biragiro by’Ekiyudaaya.—Matayo 14:1-12; Mako 6:16-19.
Yohaana na Yesu bakaba nibaharangatana shi?
Tihariho na kakye omu Baibuli ekirikworeka ngu bakaba nibaharangatana. (Yohaana 3:25-30) Nangwa, Yohaana akakyoreka gye ngu akaba aine obujunaanizibwa bw’okutebeekanisa omuhanda gwa Mesia, beitu kutari kuhayahayana nawe. Yohaana akagira ati: “Nkaija nimbatiza n’amaizi, ngu abone kushuuruurirwa Abaisraeli.” Reero akongyeraho ati: “Ogwo n’Omwana wa Ruhanga.” (Yohaana 1:26-34) N’ahabw’ekyo Yohaana akaba naashemererwa kuhurira obusinguzi bwa Yesu omu buheereza.
a Yesu “we tarakozire kibi.” (1 Petero 2:21, 22) N’ahabw’ekyo akabatizibwa, ti ahabw’okugira ngu akaba aine kweteisa, beitu ahabw’okugira ngu akaba ariyo naayehayo kukora ebi Ruhanga arikukunda. Eki kikaba nikitwariramu Yesu okuhayo amagara ge ahabwaitu.—Abaheburaayo 10:7-10.
b Reeba ekicweka “Ni Baahi Abarikuza omu Iguru?”