EMINYEETO NIBABUUZA
Ahabw’enki Nikyetengyesa Kuza omu Nteerane aha Kyombeko ky’Obukama?
Abajurizi ba Yehova nibagira enteerane emirundi ibiri buri saabiiti omu myanya yaabo y’okuramizamu erikwetwa Ebyombeko by’Obukama. Niki ekirikubayo, kandi noobaasa kugasirwa ota waazayo?
Niki ekirikuba aha Kyombeko ky’Obukama?
Ekyombeko ky’Obukama n’omwanya gw’okwegyeramu ebirikukwata ahari Baibuli. Enteerane ezirikubayo nizibaasa kukuhwera:
kwega amazima agarikukwata ahari Ruhanga.
kwetegyereza amakuru g’ebintu ebirikubaho hati.
kuba omuntu murungi.
kutunga abanywani barungi.
Eki waaba nookimanya? Omwanya ogu Abajurizi ba Yehova barikugiriramu enteerane nigwetwa Ekyombeko ky’Obukama ahakuba Obukama bwa Ruhanga nibwo burikukira kugambwaho.—Matayo 6:9, 10; 24:14; Luka 4:43.
Ahabw’enki oshemereire kuzayo?
Ebi orikwega nibiija kukugasira. Emisingye ya Baibuli erikugambwaho omu nteerane z’Abajurizi ba Yehova neija kukuhwera ‘kugira obwengye.’ (Enfumu 4:5) Eki nikimanyisa ngu Baibuli buzima neebaasa kukuhwera kucwamu gye. Kandi neebaasa n’okukuhwera kugarukamu ebibuuzo bikuru, ebirikutwariramu:
Egi n’emwe aha mitwe y’embazo ezirikuheebwa omu nteerane za wiikenda: [1]
Ahabw’enki Oshemereire Kuhaburwa Baibuli?[1a]
Noobaasa Kwiha Nkahi Obuhwezi omu Bwire bw’Amaganya?[1b]
Eki Obukama bwa Ruhanga Burikutukorera Hati.
“Omwegi mugyenzi wangye akaija omuri rumwe aha nteerane zaitu. Akashutama hamwe n’eka yaitu, kandi twakoresa nawe ebitabo byaitu. Bwanyima, akangira ngu yaashemezibwa eby’okugarukamu omu kicweka ky’okuhikaanisa ebiteekateeko. Kandi akagira ngu omu kanisa yaabo tibaine by’okwega nk’oku twine.”—Brenda.
Eki waaba nookimanya? Okutaaha omu Kyombeko ky’Obukama n’okwa busha, kandi tihariyo kushorooza sente.
Okushashaanuka n’abandi nikiija kukugumya. Baibuli neegira ngu enshonga emwe ahabw’enki Abakristaayo baine kuteeranira hamwe ‘n’okugumyana.’ (Abaheburaayo 10:24, 25) Okushashaanuka n’abantu abarikwebembeza ebya Ruhanga n’eby’abandi kukira ebyo buzima nikihuumuriza.
“Bwanyima y’okukora eizooba ryona, nimba ntarikwehurira gye kandi nduhire, kwonka butoosha abantu aha Kyombeko ky’Obukama nibampwera kwehurira gye. Omu kugaruka omu ka bwanyima y’enteerane, nimba nshemereirwe nyeteekateekiire nyenkyakare.”—Elisa.
Eki waaba nookimanya? Hariho ebibiina ebirikurenga 120,000 eby’Abajurizi ba Yehova omu nsi yoona, omu myanya erikurenga 60,000. Buri mwaka, Ebyombeko by’Obukama nka 1,500 nibyombekwa kugira ngu abantu baingi abarikweyongyera kwija omu nteerane batungye emyanya y’okuramizamu.a
a Kubaasa kumanya omwanya gw’enteerane, za aha “Enteerane z’Ekibiina ez’Abajurizi ba Yehova” reero oyimate aha “Omwanya Ogukuri Haihi.”