Baibuli Neegamba ki aha Kureeberera Abazaire Abakaikwire?

Eki Eki Baibuli erikugarukamu

Abaana bakuru omu ka baine obujunaanizibwa bukuru obw’okuhamya ngu abazaire baabo abakaikwire bareebererwa. Baibuli neegira ngu abaana abakuru bashemereire “kuta omu nkora ediini yaabo barikureeberera ab’omu maka gaabo, kandi nibaihura ebi abazaire baabo baabakoreire ahabw’okuba eki nikyo kirikushemeza Ruhanga.” (1 Timoseo 5:4, Baibuli eya New International) Abaana abakuru baakora kyona ekirikubaasika kureeberera abazaire baabo, nibaba baayorobera ekiragiro kya Baibuli ekindi eky’okuha ekitiinisa abazaire baabo.—Abaefeso 6:2, 3.

Baibuli terimu obuhabuzi oburikworeka omuringo gwenyini oku abazaire abakaikwire baine kureebererwa. Kwonka, erimu abashaija n’abakazi ab’okwikiriza ababaasize kukikora. Neeha n’obuhabuzi oburikubaasa kuhwera abarikureeberera abakaikwire.

• Amaka agamwe gakareeberera gata abazaire abakaikwire omu bwire bwa Baibuli?

• Baibuli erimu buhabuzi ki oburikubaasa kuhwera abarikureeberera abakaikwire?

• Baibuli shi neegira ngu abazaire abakaikwire baine kureeberererwa omuka?

Ab’amaka agamwe bakareeberera bata abazaire baabo abakaikwire omu bwire bwa Baibuli?

Bakakikora omu miringo mingi, kurugiirira aha mbeera zaabo.

• Yosefu akaba naatuura hare na ishe, omugurusi Yakobo. Yosefu embeera ku zaamubaasiise, akakora entebeekanisa kufurura ishe Yakobo kutuura haihi nawe. Yosefu akaha ishe oburaaro, eby’okurya, kandi yaamurinda.—Okutandika 45:9-11; 47:11, 12.

• Ruusi akafurukira omu ihanga rya nyinazaara, kandi yaaguma naakora obucweka ihembe kumureeberera.—Ruusi 1:16; 2:2, 17, 18, 23.

• Yesu, ari haihi kufa, akasherurira nyina Mariamu owaabaire ari efaakazi oraamureeberere.—Yohaana 19:26, 27.a

Baibuli erimu buhabuzi ki oburikubaasa kuhwera abarikureeberera abakaikwire?

Baibuli erimu emisingye erikubaasa kuhwera abarikureeberera abakaikwire kugumisiriza oburuhe bw’omubiri n’enyehurira baaba nibareeberera abazaire baabo abakaikwire.

• Ha Abaizaire baawe ekitiinisa.

  Eki Baibuli erikugamba: “Otiine sho na nyoko.”—Okuruga 20:12.

  Omusingye ogu nigubaasa kugyenderwaho guta? Yoreka ngu nooha abazaire baawe ekitiinisa orikubarekyera obugabe bwabo nk’oku kirikubaasika. Kuhikaana n’okubaasa kwabo, barekye beecweremu oku baine kureebererwa. Kandi, bahe ekitiinisa orikukora kyona ekirikubaasika kubahwera.

• Ba orikwetegyereza kandi orikusaasira.

  Eki Baibuli erikugamba: “Okwerinda kw’omuntu kumuzibira kurahuka kugira ekiniga, kandi okwehuzya eki bamushobeize kimuhaisa ekitiinisa.”—Enfumu 19:11.

  Omusingye ogu nigubaasa kugyenderwaho guta? Omuzaire okaikwire yaagamba ekintu kitari ky’embabazi, nari yaareebeka nk’otarikusiima obuhwezi bwawe, yeebuuze oti: ‘Ku ogire ngu niinye ndi omu mbeera nk’eye nkabaire niinyehurira nta?’ Waateeraho kuba orikwetegyereza kandi orikusaasira, noobaasa kwetantara kureetera embeera mbi kwongyera kubeera kimwe mbi.

• Yeebuuze aha bandi.

  Eki Baibuli erikugamba: “Ahatari kuhanuura enaama zifa busha, kwonka ahu abahi b’obwengye bari baingi, zihikiirizibwa.”—Enfumu 15:22.

  Omusingye ogu nigubaasa kugyenderwaho guta? Condooza aha ku orikubaasa kuragurira abazaire baawe abakaikwire. Teeraho kumanya obujanjabi oburi omu kicweka kyanyu oburikubaasa kuhwera. Gamba n’abandi abaareebereire abazaire abakaikwire. Waaba oine abu orikuzaarwa nabo, teekateeka aha kugira orukiiko rw’eka kugaaniira oku muraamureeberere, n’oku muraabagane obujunaanizibwa.

  

• Ba omuringaaniza.

  Eki Baibuli erikugamba: “Obwengye bugirwa abacureezi.”—Enfumu 11:2.

  Omusingye ogu nigubaasa kugyenderwaho guta? Manya obugarukiro bwawe. Nk’eky’okureeberaho, buri omwe aine obugarukiro omu kugira obwire n’amaani. Obugarukiro obu nibubaasa kukwata aha bi orikubaasa kukorera abazaire baawe. Waashanga orengirwe obujunaanizibwa bw’okureeberera omuzaire waawe okaikwire, reeba yaaba noobaasa kushaba obuhwezi abandi omu ka yaanyu nari abashaho abahangu.

• Yereeberere.

  Eki Baibuli erikugamba: “Tihariho muntu oyanga omubiri gwe, kureka aguriisa, agucuma.”—Abaefeso 5:29.

  Omusingye ogu nigubaasa kugyenderwaho guta? N’obu oraabe oine obujunaanizibwa bw’okureeberera abazaire baawe, naiwe oine kwereeberera n’eka yaawe ku oraabe ori omu bushwere. Nooba oine kurya gye. Oine kubyama ekirikumara. (Omubuurizi 4:6) Kandi nooba aine kuhuumuraho kyaba nikibaasika. Waakora ebintu ebi, noija kuba oyetebeekaniise gye omu nyehurira, omu biteekateeko, n’omu mubiri kureeberera abazaire baawe.

Baibuli shi neegira ngu abazaire abakaikwire baine kureeberererwa omuka?

Baibuli terimu buhabuzi yaaba abaana abakuru baine kureeberera abazaire baabo omuka. Amaka agamwe nigacwamu kuguma n’abazaire baabo abakaikwire nk’oku kirikubaasika. Kwonka obumwe, nibabaasa kureeba ngu ni kirungi kubatwara omu myanya y’okureebereramu abakaikwire. Eka neekora orukiiko kucwamu ekiri kirungi ahari buri omwe ou kirikukwataho.—Abagalatia 6:4, 5.