Esente shi Nizo Muzi gw’Ebibi Byona?

Eki Baibuli erikugarukamu

Ngaaha. Baibuli terikugira ngu esente ni mbi, kandi terikugira ngu nizo zirikukomookaho ebintu bibi byona. Ebigambo ngu ‘esente n’omuzi gw’ebibi byona’ nibiba bitahwaireyo kuruga omu Baibuli kandi nibibaasa kuhabisa. Eki Baibuli erikugamba kyenyini kiri ngu “okwetenga empiiha [esente] n’omuzi gw’ebibi byona.”a—1 Timoseo 6:10.

Baibuli neegamba ki aha sente?

Baibuli neeyoreka ngu esente zaakoresibwa gye, nizibaasa kuba ez’omugasho zikore nk’eky’oburinzi. (Omubuurizi 7:12) Kandi, Baibuli neesiima abo abarikuba efura aha bandi, ekirikubaasa kutwariramu okubaha ebiconco by’esente.—Enfumu 11:25.

Kwonka, Baibuli neerabura aha kwebembeza okusherura esente. Neegira eti: “Mutarigira omutima ogurikukunda empiiha, ebi mwine bibe nibyo byabamara.” (Abaheburaayo 13:5) Eishomo riri ngu twine kuta esente omu mwanya gwazo oguhikire, kandi titwine kwebembeza okusherura obugaiga. Kureka, tushemereire kureeba ngu twamarwa n’ebintu ebi buzima tushemereire kutunga, nk’eby’okurya, eby’okujwara, n’oburaaro.—1 Timoseo 6:8.

**Baibuli neerabura ki aha kukunda sente?**

Abanyamururu tibarikwija kutunga amagara agatahwaho. (Abaefeso 5:5) Ahakuba, omururu n’omuringo gumwe ogw’okuramya ebishushani, nari okuramya okugwire. (Abakolosai 3:5) Kandi, abanyamururu omu kuteeraho kutunga ebi barikwetenga nibakira kwehuzya emisingye mirungi. Ogwo “orikutunga ebya bugubugu taribura kufubirwa,” Enfumu 28:20 nikwo harikugira. Nibabaasa kwohibwa n’okuhenda ebiragiro, nk’okugobeza omuntu, obushomankuzi, okuryangatanisa, okuta omuntu omu bukwatwa, nari okwita.

Nangwa n’obu okukunda esente kwakuba kutarugiremu emicwe mibi, nikubaasa kurugamu ebindi bintu bibi. Baibuli neegira ngu abamaririire kuba ’abatungi nibagwa omu kwohibwa n’omu mutego n’omu kwetenga kwingi kw’obushema okurikushiisha.’—1 Timoseo 6:9.

Nitubaasa kugasirwa tuta omu buhabuzi bwa Baibuli oburikukwata aha sente?

Twaba tutasiisikaire omu micwe yaitu ahabw’okwenda kutunga sente, nitwija kugira ekitiinisa, kandi Ruhanga naija kutusiima kandi atushagike. Abo abarikuteeraho kushemeza Ruhanga, naabaraganisa ati: “Tindikutsigaho, kandi tindikuhemukaho na kakye.” (Abaheburaayo 13:5, 6) Kandi nabwo naatuhamiza ngu ’omuntu omwesigwa naija kugira emigisha mingi.’—Enfumu 28:20.

Baibuli neegamba ki aha sente

Omubuurizi 7:12: ’Empiiha n’oburinzi.’

Amakuru: Esente zaakoresibwa gye, nizibaasa kugira omugasho, ahakuba niziha oburinzi buringaniire.

Luka 12:15: “Amagara g’omuntu tigari mu bwingi bw’ebintu ebi aine.”

Amakuru: Esente tikyo kintu kikuru aha muntu, kandi tizirikwija kuturugiraho okujunwa.

1 Timoseo 6:10: “Okwetenga empiiha n’omuzi gw’ebibi byona; hariho bamwe abaagiriire ebyo omururu, bakahaba, bakaruga omu kwikiriza, bakeecumitira kimwe n’enaku nyingi.”

Amakuru: Esente zo tiziine buremeezi. Kwonka abantu abarikukunda esente, abo abarikuba nizo baataho omutima nibeereetera oburemeezi bwingi, nk’okushenyuka kw’amaka gaabo, n’amagara mabi ahabw’okukora munonga.

Abaheburaayo 13:5: “Mutarigira omutima ogurikukunda empiiha, ebi mwine bibe nibyo byabamara.”

Amakuru: Omu mwanya gw’okusherura obugaiga omu burungi n’obubi, twine kuba abanyabwengye tukamarwa n’ebyo ebirikwetengyesa buzima.

Matayo 19:24: “Nikirahuka engamira kuraba omu nyindo y’empitirizo, okukira omutungi kutaaha omu Bukama bwa Ruhanga.”

Amakuru: Yesu akaba agambiire omushaija omugaiga kwija kumukuratira. Omushaija ogwo akanga ahakuba akaba ahamiire aha by’obugaiga bye. N’ahabw’ekyo Yesu akaba naarabura. Omuntu orikwebembeza eby’obugaiga omu mwanya gw’okwebembeza okuheereza Ruhanga naaba ari omu kabi k’okufeerwa amagara agatahwaho.

a Ekyahandiikirwe eki obumwe nikivunuurwa kiti: “Okukunda sente n’omuzi bw’ebintu bibi ebya buri muringo.”