Eishomo 7
Okwirira Haihi na Ruhanga omu Kushaba
Ahabw’enki ni kikuru okushaba obutoosha? (1)
Tushemereire kushaba oha? kandi tuta? (2, 3)
Ni bintu ki ebi tushemereire kushaba? (4)
Oshemereire kushaba ryaari? (5, 6)
Ruhanga nahurikiriza buri kushaba kwoona? (7)
1. Okushaba nikwo kugamba na Ruhanga omu bucureezi. Oshemereire kushaba Ruhanga obutoosha. Omu muringo ogu nohurira ori haihi nawe nk’oku oba ori na munywaani waawe owaha mara. Yehova ni mukuru munonga kandi ow’amaani baitu nahurikiriza eshaara zaitu! Noshaba Ruhanga obutoosha?—Zaaburi 65:2; 1 Abatesalonika 5:17.
2. Okushaba n’ekicweeka ky’okuramya kwaitu. Nahabw’ekyo tushemereire kushaba Ruhanga wenka Yehova. Yesu obu yabaire ari omu nsi, butoosha akaba ashaba Ishe hatari ondiijo weena. Naitwe tukore tutyo. (Matayo 4:10; 6:9) Kwonka okushaba kwaitu kwoona kushemereire kurabira omu iziina rya Yesu. Eki nikyoreka ngu nituha omwanya gwa Yesu ekitiinisa kandi nitwikiririza omu kitambo ky’okujuna kwe.—Yohaana 14:6; 1 Yohaana 2:1, 2.
3. Twaaba nitushaba, tushemereire kugamba na Ruhanga twihiire kimwe aha mutima. Tutakashaba nitugaruka omuri ebyo ebi twakwatsire omu mutwe nari kushoma bushoma omu kitabo ky’eshaara. (Matayo 6:7, 8) Nitubaasa kushaba omu muringo gwoona, ogu turaabe turimu, guri kuhaisa ekitiinisa, omu bwiire bwoona, kandi omu mwanya gwoona. Ruhanga nahurira n’eshaara zituri kushaba tuhunami omu mitima yaitu. (1 Samueli 1:12, 13) Nikirungi okutunga omwanya ogucureire ahataine bantu buri omwe yaaba nayenda kweshabira.—Mako 1:35.
4. Ni bintu ki ebi turi kubaasa kushaba? Ekintu kyoona ekiri kubaasa kukwaata aha mukago gu oine nawe. (Abafiripi 4:6, 7) Eky’okureeberaho ky’okushaba nikyoreka ngu tukaashabire ebiri kukwaata aha iziina rya Yehova n’ebigyendererwa bye. Kandi tubaasa n’okushaba atuhe ebyetengo byaitu eby’omubiri, atusaasire ebishobyo byaitu, n’okutuhweera okwangira okutegwa. (Matayo 6:9-13) Omu kushaba kwaitu titushemereire kwefaho twenka. Tushemereire kushaba ebyo byonka ebiri kwikirizana n’ebi Ruhanga akunda.—1 Yohaana 5:14.
5. Nobaasa kushaba ahu orahuririre omutima gwaawe gwayenda kwebaza nari kuhimbisa Ruhanga. (1 Obusingye 29:10-13) Oshemereire kushaba wagira oburemeezi kandi n’okwikiriza kwaawe kwaaba nikugyezibwa. (Zaaburi 55:22; 120:1) Ni kirungi kushaba nooza kurya. (Matayo 14:19) Yehova natwehanangiriza kushaba “obwiire bwoona.”—Abaefeso 6:18.
6. Nitwetenga kushaba na munonga twaaba tukozire ekibi kihango. Omu bwiire nk’obwo tushemereire kweshengyereza Yehova ku atugirira embabazi kandi atusaasire. Ku tumweteisiza ebibi byaitu, twakora kyoona ekiri kubaasika obutabigarukamu, Ruhanga naaba “ayeteekateekire okusaasira.”—Zaaburi 86:5, NW; Enfumu 28:13.
7. Yehova ahurira okushaba kw’abahikiriire bonka. Ruhanga okubaasa kuhurira okushaba kwaawe noragirwa kureeba ngu wayorobera ebiragiro bye. (Enfumu 15:29; 28:9) Noteekwa okwecureeza waaba noshaba. (Luka 18:9-14) Noteekwa kwezirikira ekyo eki ori kushaba. Omu muringo ogwo noija kuhamya ku oine okwikiriza, kandi ku ori kumanyisiza kimwe eki washaba. Obwo Yehova nibwo ari kwiija kugarukamu okushaba kwaawe.—Abaheburaayo 11:6.