Omugisha gw’Okushaba

1, 2. Ahabw’enki okushaba kiri ekiconco ky’omutaano, kandi ahabw’enki twine kumanya eki Baibuli erikwegyesa aha kushaba?

YEHOVA, “owaahangire eiguru n’ensi,” naareeba amahanga g’abantu nk’eitondo ry’amaizi omu ndobo. (Zaaburi 115:15; Isaaya 40:15) N’obu kiraabe kiri kityo, omu Zaaburi 145:18, 19 nihagira ngu Yehova “ari haihi na boona abarikumutakira, boona abamutakira omu mazima. Abarikumutiina aryabamarira ebi barikwetenga, kandi aryahurira okutaka kwabo, abajune.” Ka twine omugisha gw’amaani! Yehova Omuhangi ow’Obushoboorozi Bwona, naayenda kuba haihi naitwe, kandi naayenda kugarukamu okushaba kwaitu. Buzima, okushaba n’omugisha, kandi n’ekiconco ky’omutaano eki Yehova ahaire buri omwe ahariitwe.

² Kwonka Yehova kubaasa kuhurira okushaba kwaitu, twine kumushaba omu muringo ogu arikusiima. Nitubaasa kukikora tuta? Ka tureebe eki Baibuli erikwegyesa aha kushaba.

AHABW’ENKI TWINE KUSHABA YEHOVA?

3. Ahabw’enki oshemereire kushaba Yehova?

³ Yehova naayenda ngu omushabe nari ogambe nawe. Eki nitukimanya tuta? Nyabura ’we shoma Abafilipi 4:6, 7. Teekateeka aha kuhigwa okuri omu kyahandiikirwe eki. Omutegyeki w’ebintu byona naakufaho kandi naayenda ngu omugambire enyehurira zaawe n’oburemeezi bwawe.

4. Okushaba Yehova butoosha nikuhamya kuta omukago gwawe nawe?

⁴ Okushaba nikutuhwera kugira omukago murungi na Yehova. Abanywani ku barikugambirana ebiteekateeko byabo, ebirikuberarikiriza n’enyehurira zaabo, omukago gwabo nigweyongyera kuhama. Nikyo kimwe n’okushaba Yehova. Omu Baibuli, naakugambira ebiteekateeko bye, enyehurira ze, n’ebi arikwija kukora omu biro by’omumaisho. Noobaasa kumugambira enyehurira zaawe orikumushaba butoosha. Waakora eki, omukago gwawe na Yehova nigweyongyera kuhama.—Yakobo 4:8.

TWINE KUKORA KI RUHANGA KUBAASA KUGARUKAMU OKUSHABA KWAITU?

5. Nitumanya tuta ngu ti buri kushaba kwona ngu Yehova naakuhurira?

⁵ Yehova naahurira buri kushaba kwona? Ngaaha buzima. Omu bwire bwa nabi Isaaya, Yehova akagambira Abaisraeli ati: “N’obu muriguma nimushaba hakye-hakye, tindibahurira; ahabw’okuba engaro zaanyu ziijwire eshagama.” (Isaaya 1:15) Twaba tutegyendesereize, nitubaasa kukora ebintu ebirikutwiriza hare na Yehova, reero ayangye kugarukamu okushaba kwaitu.

6. Ahabw’enki okwikiriza ni kukuru munonga, kandi nooyoreka ota ngu oine okwikiriza?

⁶ Twaba nitwenda ngu Yehova ahurire okushaba kwaitu, twine kumwikiririzamu. (Mako 11:24) Entumwa Paulo akashoboorora ati: “Kandi otarikwikiriza tarikubaasa kumushemeza; ahakuba omuntu weena orikwija ahari Ruhanga, ashemereire kwikiriza ku ariho, kandi ku aha ebihembo abamusherura.” (Abaheburaayo 11:6) Kwonka okugamba ngu twine okwikiriza kyonka tikirikumara. Twine kworeka okwikiriza kwaitu turikworobera Yehova buri izooba.—Shoma Yakobo 2:26.

7. (a) Ahabw’enki twine kuha Yehova ekitiinisa kandi tukaba abacureezi twaba nitumushaba? (b) Nitworeka tuta ngu nitushaba Yehova twihire aha mutima?

⁷ Twine kuba abacureezi kandi tukaha Yehova ekitiinisa twaba nitumushaba. Ahabw’enki? Waaba nooyenda kugamba n’omugabe nari omwebembezi w’eihanga, noogamba nawe omu muringo gw’ekitiinisa. Yehova ni Ruhanga ow’Obushoboorozi Bwona, n’ahabw’ekyo tushemereire kumuha ekitiinisa kingi, kandi tukaba abacureezi twaba nitugamba nawe. (Okutandika 17:1; Zaaburi 138:6) Tushemereire n’okugamba amazima kuruga aha mutima, beitu kutari kuguma nitugarukagaruka omu bigambo.—Matayo 6:7, 8. 

8. Twashaba Ruhanga ekintu, nituba twine kukora ki?

⁸ Kandi, twagira eki twashaba Ruhanga ngu atuhe, twine kukora n’amaani kubaasa kukitunga. Nk’eky’okureeberaho, twamushaba kutuha ebi turikwetenga buri izooba, titushemereire kuba abanafu turikuteekateeka ngu naija kutuha buri kimwe n’obu twakuba tutakozire. Twine kukora munonga tukaikiriza omurimo gwona oguhikire ogu turikubaasa kukora. (Matayo 6:11; 2 Abatesalonika 3:10) Nari twashaba Yehova kutuhwera kusingura omuze, tushemereire kwetantara embeera ezirikubaasa kutureetera kwohibwa. (Abakolosai 3:5) Hati ka tureebe ebibuuzo ebirikukwata aha kushaba ebirikukira kubuuzibwa.

EBIBUUZO EBIRIKUKWATA AHA KUSHABA EBIRIKUKIRA KUBUUZIBWA

9. N’oha ou tushemereire kushaba, kandi Yohaana 14:6 nihatwegyesa ki aha bikwatiraine n’okushaba?

⁹ N’oha ou tushemereire kushaba? Yesu akeegyesa abeegi be kushaba “Tataitwe ow’omu iguru.” (Matayo 6:9) Kandi akagira ati: “Niinye muhanda, n’amazima, n’amagara; tihariho oija ahari Isheboona, atarabire muriinye.” (Yohaana 14:6) N’ahabw’ekyo twine kushaba Yehova wenka kurabira omuri Yesu. Okushaba kurabira omuri Yesu nikimanyisa ki? Yehova kubaasa kuhurira okushaba kwaitu, twine kuha ekitiinisa omurimo gw’omutaano ogu Yehova yaahaire Yesu. Nk’oku twegire, Yesu akaija omu nsi kutujuna ekibi n’okufa. (Yohaana 3:16; Abarooma 5:12) Yehova atooraine Yesu kuba Omunyamurwa Omukuru kandi Omuramuzi.—Yohaana 5:22; Abaheburaayo 6:20.

10. Mbwenu shi twine kwecureeza omu muringo gw’omutaano twaba nitushaba? Shoboorora.

¹⁰ Mbwenu shi twine kwecureeza omu muringo gw’omutaano twaba nitushaba? Ngaaha, Yehova tarikutugyema kutsimba amaju, kushutama, nari kwemerera twaba nitushaba. Baibuli neetwegyesa ngu nitubaasa kwecureeza omu muringo gwona ogw’ekitiinisa twaba nitushaba Yehova. (1 Obusingye 17:16; Nehemia 8:6; Danieli 6:10; Mako 11:25) Ekikuru ahari Yehova ti kutsimba amaju, kushutama, nari kwemerera, beitu okumushaba twine emiteekateekyere mirungi. Nitubaasa kushaba turikugamba nari tuhunami, hoona ahu turikuba turi, obwire bwona omu ihangwe nari nyekiro. Twaba nitushaba Yehova nituba twine obuhame ngu naatuhurira n’obu abandi baakuba batarikutuhurira.—Nehemia 2:1-6.

11. Ni bintu ki ebimwe ebi turikubaasa kugambira Yehova omu kushaba?

¹¹ Niki eki turikubaasa kushaba? Nitubaasa kushaba ekintu kyona ekirikuhikaana n’ebi Yehova arikusiima. Baibuli neegira eti: “Ku tushaba ekintu kyona nk’oku akunda, atuhurira.” (1 Yohaana 5:14) Mbwenu shi nitubaasa kushaba ebi turikwenda? Eego. Waaba nooshaba Yehova oshemereire kuba ori nk’orikugaaniira na munywani waawe ow’aha mara. Nitubaasa kugambira Yehova buri kintu ekiri omu biteekateeko byaitu n’omu mutima gwaitu. (Zaaburi 62:8) Nitubaasa n’okumushaba kutuha omwoyo gwe gurikwera, kutuhwera kukora ebihikire. (Luka 11:13) Nitubaasa n’okushaba Yehova kutuha obwengye kucwamu gye, n’okutunga amaani g’okwemera oburemeezi. (Yakobo 1:5) Tushemereire kushaba Yehova kutusaasira ebibi byaitu. (Abaefeso 1:3, 7) Tushemereire kushabira abandi, otwariiremu abanyabuzaare baitu n’ab’eishe-emwe omu kibiina.—Ebyakozirwe 12:5; Abakolosai 4:12.

12. Niki eki tushemereire kutwara nka kikuru omu kushaba kwaitu?

¹² Niki ekiine kuba kikuru munonga omu kushaba kwaitu? Yehova n’ebi arikukunda. Tushemereire kumusiima kuruga aha mutima ahabwa buri kimwe eki atukoreire. (1 Obusingye 29:10-13) Eki nitukimanya ahabw’okuba obu Yesu yaabaire ari omu nsi, akeegyesa abeegi be oku baine kushaba. (Shoma Matayo 6:9-13.) Akabagira ngu baine kubanza kushaba ngu eiziina rya Ruhanga ryezibwe, ekirikumanyisa okutwarwa nk’eririkwera. Bwanyima akooreka ngu twine kushaba ngu Obukama bwa Ruhanga bwije n’ebi arikukunda bikorwe omu nsi yoona. Yesu akooreka ngu bwanyima y’okushaba aha bikwatiraine n’ebintu ebyo ebikuru, nitubaasa kushaba ebi turikwetenga. Omu kushaba kwaitu twayebembeza Yehova n’ebi arikukunda, nitworeka eki turikutwara nka kikuru.

13. Tushemereire kumara obwire burikwingana ki omu kushaba?

¹³ Okushaba kwaitu kushemereire kumara obwire burikwingana ki? Ekyo Baibuli terikukigambaho. Okushaba kwaitu nikubaasa kuba kugufu nari kuraingwa kurugiirira aha mbeera. Nk’eky’okureeberaho, nitubaasa kushaba omu bugufu twaba nituza kurya, kandi nitubaasa kumara obwire buraingwa omu kushaba twaba nitusiima Yehova nari nitumugambira ebirikutwerarikiriza. (1 Samueli 1:12, 15) Titurikwenda kushaba kumara obwire buraingwa ahabw’okwenda kushemeza abandi, nk’oku bamwe baabaire nibakora obu Yesu yaabaire ari omu nsi. (Luka 20:46, 47) Okushaba nk’okwo tikurikushemeza Yehova. Eki Yehova arikutwara nka kikuru n’okushaba twihire aha mutima.

14. Mbwenu shi nitubaasa kushaba obwire bwona ahu turikwendera?

¹⁴ Mbwenu shi nitubaasa kushaba obwire bwona ahu turikwendera? Eego, Yehova naayenda ngu tushabe butoosha. Baibuli neetuhiga ‘kugumizamu nitushaba,’ ‘okushaba obutoosha’ kandi ‘tukaguma nitushaba nyomushana na nyekiro.’ (Abarooma 12:12; 1 Abatesalonika 5:17 1 Timoseo 5:5) Yehova naaba ayeteekateekire kuhurira okushaba kwaitu. Nitubaasa kumusiima buri izooba ahabw’okutukunda n’okuba efura. Nitubaasa n’okumushaba kutuhuumuriza, kutuha obuhabuzi, n’amaani. Twaba nitutwara omugisha gw’okushaba Yehova nk’ogw’omuhendo, nitwija kukoresa buri mugisha kumushaba.

15. Ahabw’enki twine kugira ngu “amiina” aha muheru gw’okushaba?

¹⁵ Ahabw’enki twine kugira ngu “amiina” aha muheru gw’okushaba? Ekigambo “amiina” nikimanyisa “eego buzima,” nari “kibe nikwo kyaba.” N’omuringo gw’okworeka ngu ebi twagamba omu kushaba nitubimanyisa, kandi ngu turi ab’amazima. (Zaaburi 41:13) Baibuli neeyoreka ngu ni kirungi kugira ngu “amiina,” omu iraka eririkuhurirwa nari eritarikuhurirwa, omuntu yaaba atwebembeire omu kushaba, kworeka ngu nitwikirizana n’ebi yaagamba omu kushaba.—1 Obusingye 16:36; 1 Abakorinso 14:16.

OKU RUHANGA ARIKUGARUKAMU OKUSHABA KWAITU

16. Mbwenu shi Ruhanga naagarukamu okushaba kwaitu? Shoboorora.

¹⁶ Mbwenu shi Ruhanga naagarukamu okushaba kwaitu? Eego buzima. Baibuli neegira ngu niwe ogwo “ohurira okushaba.” (Zaaburi 65:2) Yehova naahurira, kandi agarukamu okushaba kw’abantu baingi munonga omu miringo mingi.

17. Yehova naakoresa ata baamaraika n’abaheereza be ab’omu nsi kugarukamu okushaba kwaitu?

¹⁷ Yehova naakoresa baamaraika n’abaheereza be ab’omu nsi kugarukamu okushaba kwaitu. (Abaheburaayo 1:13, 14) Hariho abantu baingi abaashabire Ruhanga kubahwera kwetegyereza Baibuli, kandi bwanyima bakataayaayirwa omwe aha Bajurizi ba Yehova. Baibuli neeyoreka ngu baamaraika nabo nibeejumba omu kubuurira amakuru marungi omu nsi yoona. (Shoma Okushuuruurwa 14:6.) Kandi, baingi nibashaba Yehova barikumugambira oburemeezi bwenyine obu baine, reero ab’eishe-emwe babahwera barikubaha eki barikwetenga.—Enfumu 12:25; Yakobo 2:16.

18. Yehova naakoresa ata omwoyo gwe gurikwera na Baibuli kugarukamu okushaba?

¹⁸ Yehova naakoresa omwoyo gwe ogurikwera kugarukamu okushaba kwaitu. Twashaba obuhwezi bw’okwemera oburemeezi, naabaasa kukoresa omwoyo gwe ogurikwera kutuha obuhabuzi n’amaani. (2 Abakorinso 4:7) Yehova naakoresa Baibuli kugarukamu okushaba kwaitu, n’okutuhwera kucwamu gye. Twashoma Baibuli, nitubaasa kushangamu ebyahandiikirwe ebiraatuhwere. Yehova naabaasa kuhiga omuntu yaaba naagarukamu omu nteerane, kugamba kyenyine eki turikwenda, nari omureeberezi omu kibiina naabaasa kutuha obuhabuzi kuruga omu Baibuli.—Abagalatia 6:1.

19. Ahabw’enki obumwe omuntu arikubaasa kuteekateeka ngu Yehova tagarukiremu okushaba kwe?

¹⁹ Kwonka obundi, nitubaasa kwebuuza tuti: ‘Ahabw’enki Yehova atakagarukiremu okushaba kwangye?’ Twine kwijuka ngu Yehova naamanya obu ashemereire kugarukamu okushaba kwaitu n’oku araakugarukyemu. Naamanya eki turikwetenga. Obumwe twine kugumizamu nitushaba kworeka ngu eki turikumugambira nitukimanyisa, kandi tukooreka ngu nitumwikiririzamu. (Luka 11:5-10) Obumwe, Yehova naabaasa kugarukamu okushaba kwaitu omu muringo ogu tutarikuteekateeka. Nk’eky’okureeberaho, nitubaasa kumushaba twaba turi omu mbeera egumire, kwonka omu mwanya gw’okwihaho oburemeezi, naabaasa kutuha amaani g’okugumisiriza.—Shoma Isaaya 40:29.

20. Ahabw’enki tushemereire kuguma nitushaba Yehova ahu turikwendera hoona?

²⁰ Ka twine omugisha gw’omutaano kushaba Yehova! Nitubaasa kuhamya ngu naija kutuhurikiza. (Zaaburi 145:18) Kandi twaguma nitushaba Yehova twihire aha mutima, omukago gwaitu nawe nigwija kweyongyera kuhama.