OMUTWE OGURI AHA MUNAARA

Ahabw’enki Yesu Yaabonaboine Kandi Akafa?

‘Ekibi kikaija omu nsi ahabw’okushiisha kw’omuntu omwe [Adamu,] kandi kikarugamu okufa.’—Abarooma 5:12

Adamu na Haawa nibareeba ekijuma eki baazibiirwe kurya; Adamu na Haawa bakuzire; abantu beekoreire eshanduukye barikuza kuziika

Noobaasa kugarukamu ota baakubuuza bati: “Nooyenda kugumaho ebiro byona?” Abantu baingi nibabaasa kugarukamu ngu nibenda kugumaho ebiro byona kwonka nibabaasa kuba nibateekateeka ngu ekyo tikirikubaasika. Nibagira ngu okufa n’ekya butoosha, ngu omuntu ohuriire weena aine kuhitsya obwire akafa.

Kwonka shi ekibuuzo ekyo ku baakukihindura bakakibuuza bati: “Oyeteekateekire kufa?” Abantu baingi nibagarukamu ngu ngaaha. Eki nikyoreka ki? N’obu turaabe nitutunga oburemeezi kandi tukagyezibwa, butoosha nituba twine ekyetengo ky’okugumaho ebiro byona. Baibuli neeyoreka ngu Ruhanga akahanga abantu baine ekyetengo ky’okugumaho ebiro byona. Neegira ngu akata “omu mitima y’abantu ebiteekateeko by’obunaku obutarihwaho.”—Omubuurizi 3:11.

Kwonka amazima gari ngu, abantu tibarikugumaho ebiro byona. Mbwenu shi niki ekyashobire? Kandi shi Ruhanga haine eki akozire kuhindura embeera? Eby’okugarukamu kuruga omu Baibuli nibishemeza, kandi biine akakwate n’enshonga ahabw’enki Yesu yaabonaboine kandi akafa.

EKYASHOBIRE

Eshuura ishatu ez’ekitabo kya Baibuli eky’Okutandika nizooreka ngu Ruhanga akaha Adamu na Haawa amatsiko g’amagara agatahwaho, kandi yaabagambira n’eki baine kukora kugatunga. Kandi eshuura ezo nizigaruka zooreka oku baremirwe kworobera Ruhanga, reero bakafeerwa amatsiko ago. Abamwe nibateekateeka ngu ebirikukwata aha kugoma kwa Adamu na Haawa n’ekitebyo. Kwonka kushushana n’Engiri, ekitabo ky’Okutandika kirimu ebyafaayo ebihikire.a

Niki ekyarugire omu bugomi bwa Adamu? Baibuli neegarukamu eti: “Nk’oku ekibi kyaizire omu nsi ahabw’okushiisha kw’omuntu omwe [Adamu,] kandi kikarugamu okufa, nikwo n’okufa kwabugire omu bantu boona, ahakuba boona bakashiisha.” (Abarooma 5:12) Adamu ahabw’okugomera Ruhanga akashiisha. N’ahabw’ekyo akafeerwa amatsiko g’okutunga amagara agatahwaho kandi bwanyima akafa. Ahabw’okugira ngu turi baijukuru be, tukamuhunguraho ekibi. Eki nikyo kirikutureetera kurwara, kukaikura, n’okufa. Eki nikihikaana n’eki abanyasayansi bajumbwire ekirikukwata aha muringo ogu abaana barikuhunguramu emitwarize emwe kuruga aha bazaire baabo. Kwonka shi Ruhanga haine eki akozire kuhindura embeera?

EKI RUHANGA AKOZIRE

Buzima, Ruhanga akozire entebeekanisa kugaruraho amatsiko g’amagara agatahwaho agu Adamu yaafeerereize baijukuru be. Ekyo Ruhanga akakikora ata?

“Ebihembo by’ekibi n’okufa,” nikwo Baibuli erikugira omu Abarooma 6:23. Eki nikimanyisa ngu okufa nikuruga omu kibi. Adamu akagira ekibi, n’ahabw’ekyo akafa. Naitwe twine ekibi n’ahabw’ekyo nitutunga ebihembo by’ekibi nikwo kufa. Kwonka ogu ti mushango gwaitu ahakuba tukazaarirwa omu mbeera egi. Rukundo ekareetera Ruhanga kwohereza Omwana we, Yesu kwikiriza “ebihembo by’ekibi” ahabwaitu. Eki kikabaho kita?

Abantu b’erangi zitarikushushana bari omu Paradiso — Okufa kwa Yesu nikutuha amatsiko g’okwija kutunga okushemererwa n’amagara agatahwaho

Obu omuntu omwe ohikiriire Adamu yaagomire akatureetera ekibi n’okufa, kikaba nikyetengyesa omuntu omwe ohikiriire kuguma ari omwesigwa kuhika n’aha kufa, kubaasa kutucungura omu buremeezi obu. Baibuli neekishoboorora eti: “Nk’oku baingi baahindukire abasiisi ahabw’okutahurira kw’omuntu omwe, nikwo baingi barihinduka abahikiriire ahabw’okuhurira kw’omwe.” (Abarooma 5:19) ‘Omuntu omwe’ ogwo ni Yesu. Akaruga omu iguru, yaaba omuntu ohikiriireb, kandi yaatufeera. N’ekyarugiremu, nitubaasa kugira omukago murungi na Ruhanga, kandi tugire n’amatsiko g’okutunga amagara agatahwaho.

EKYAREETEIRE YESU KUBONABONA KANDI AKAFA

Mbwenu shi ahabw’enki kyabaire nikyetengyesa ngu Yesu afe kubaasa kuhikiiriza eki? Mbwenu shi Ruhanga ow’Obushoboorozi Bwona akaba atarikubaasa kutaho ekiragiro ngu baijukuru ba Adamu baikirizibwe kutuuraho ebiro byona? Buzima aine obushoboorozi bw’okukikora. Kwonka ekyo kikaabaire nikimanyisa ngu yaayehuzya ekiragiro kye ekirikugira ngu ebihembo by’ekibi n’okufa. Ekiragiro ekyo ni kikuru tiky’okwehuzya nari kuhindahindurwa. Ahakuba kirimu oburingaaniza.—Zaaburi 37:28.

Ku ogire ngu Ruhanga omu nshonga egyo akeehuzya oburingaaniza, abantu bakaba nibabaasa kuteekateeka ngu naija kukora nikyo kimwe n’omu nshonga ezindi. Nk’eky’okureeberaho, mbwenu shi akaabaire naabaasa kugira oburingaaniza omu kutoorana bamwe ahari baijukuru ba Adamu abaraatungye amagara agatahwaho? Kandi shi akaabaire naayesigwa omu kuhikiiriza ebi arikuraganisa? Ahabw’okugira ngu Ruhanga naahamira aha buringaaniza omu ntebeekanisa ye ey’okujuna abantu, n’obuhame ahariitwe ngu butoosha naija kukora ekihikire.

Kurabira omu kufa kwa Yesu, Ruhanga akataho omuhanda gw’okubaasisa abantu kwija kutunga amagara agatahwaho omu Paradiso omu nsi. Yetegyereze ebigambo bya Yesu ebiri omu Yohaana 3:16: “Nikwo Ruhanga yaakunzire atyo ensi, akahayo Omwana we omwe nyamunegyere, ngu omuntu weena orikumwikiriza arekye kuhwerekyerera, kureka atungye amagara agatahwaho.” Okufa kwa Yesu tikurikworeka oburingaaniza bwa Ruhanga bwonka, beitu okukira munonga rukundo mpango ei ainiire abantu.

Kwonka shi, ahabw’enki Yesu yaabonaboine kandi akafa omu muringo gw’obusaasi munonga ogurikugambwaho omu bitabo by’Engiri? Yesu okwikiriza kugyezibwa munonga kwonka akaguma ari omwesigwa, akahakanisa ebigambo by’Omuregi ngu abantu tibarikubaasa kuguma bahamiire ahari Ruhanga omu kugyezibwa. (Yobu 2:4, 5) Ebigambo bya Sitaane bikaabaire biri nk’ebihikire ahabw’okugira ngu akasingura Adamu owaabaire ahikiriire yaabaasa kushiisha. Kwonka Yesu owaabaire naingana na Adamu omu kuhikiirira, akaguma ari omwesigwa n’obu yaabonaboine munonga. (1 Abakorinso 15:45) N’ahabw’ekyo akooreka ngu Adamu akaba naabaasa kworobera Ruhanga kuri yaacwiremu kukikora. Yesu ahabw’okugumisiriza omu kugyezibwa kw’amaani, akatuteeraho eky’okureeberaho eky’okukuratira. (1 Petero 2:21) Ruhanga akashumbuusha Omwana we ahabw’okumworobera, yaamuha amagara agatarikufa omu iguru.

OKU ORIKUBAASA KUGASIRWA

Buzima Yesu akafa. Hariho amatsiko g’okutunga amagara agatahwaho. Nooyenda kugumaho ebiro byona? Yesu akooreka eki twine kukora obu yaagira ati: “Aga nigo magara agatahwaho, okumanya Iwe Ruhanga omwe ow’amazima, n’Ogwo ou waatumire Yesu Kristo.”—Yohaana 17:3.

Abarikushohoza magaziini egi nibakuhiga kwega ebirikukiraho ebirikukwata ahari Yehova, Ruhanga ow’amazima, n’Omwana we, Yesu Kristo. Abajurizi ba Yehova ab’omu kicweka kyanyu nibaija kushemererwa kukuhwera. Noobaasa n’okutunga obuhwezi orikuza aha mukura gwaitu, www.jw.org/nyn.

a Reeba ekicweka “Abarikugambwaho omu Byafaayo Ebiri omu Okutandika,” omu kitabo Insight on the Scriptures, orupapura 922, ekyateirwe Abajurizi ba Yehova.

b Ruhanga okufurura amagara g’Omwana we kuruga omu iguru akagata omunda ya Mariamu, kikareetera Mariamu kutwara enda, kandi omwoyo gwa Ruhanga ogurikwera gukarinda Yesu kutahungura okutahikiirira ahari Mariamu.—Luka 1:31, 35.

“Mugume Mukore Mutyo”

Aha kiro eki Yesu yaafeereireho, akarundaana abeegi be abeesigwa kandi yaatandikaho omukoro gw’okwijuka okufa kwe. Akabagira ati: “Mugume mukore mutyo okuunyijukiraho.” (Luka 22:19) Omu kworobera ekiragiro ekyo, Abajurizi ba Yehova omu nsi yoona nibateeranira omu myanya mingi buri mwaka kwijuka okufa kwa Yesu. Omwaka oguhweire, abantu 19,862,783 nibo baizire aha mukoro ogu.

Omwaka ogu, omukoro gw’okwijuka okufa kwa Yesu niguza kubaho Okwakashatu, Orwakashatu 23, bwanyima y’eizooba kurenga. Iwe n’ab’omu ka yaawe nimwetwa na rukundo mpango kwija kuhurikiza orubazo orurikwegamira ahari Baibuli. Niruza kushoboorora ahabw’enki Yesu yaabaire aine kufa, n’oku orikubaasa kugasirwa omu kufa kwe. Okutaahamu n’okwa busha, kandi tihariyo kushorooza sente. Nyabura ’we buuza Abajurizi ba Yehova abari omu kicweka kyawe aha bikwatiraine n’obwire n’omwanya. Nari za aha mukura gwaitu, www.jw.org/nyn.