Akabokisi k’Ebibuuzo

◼ Nitubaasa kuhwera tuta abeegi baitu ba Baibuli kuba abahikire kubatizibwa nk’abakuratsi ba Yesu Kristo?

Eki nitubaasa kukikora gye (1) twaba twine abeegi ba Baibuli kandi barikutunguuka, (2) twaguma nitubahiga kwija omu nteerane zoona itaano kandi bakazejumbamu, kandi (3) kurugiirira aha byahandiikirwe baaba bahikire kutandika kubuurira, tubatendekye kubaasa kwejumba omu kubuurira.

Yesu Kristo akatuma abakuratsi be kuhindura abantu abeegi bakababatiza kandi bakabeegyesa kworobera ebiragiro bye. Omurimo ogu nigugumizamu n’omu bunaku obu nk’oku ebigambo bya Yesu birikugira ngu: “Kandi reeba, ndi hamwe naimwe ebiro byona okuhitsya obu ensi egi erihwaho” birikworeka.​—Mat. 28:19, 20.

Entumwa n’ogwo orikwikiriza kushagika enyegyesa z’ogwo orikuba amutumire. N’ahabw’ekyo, abarikuza kubatizibwa nibaba baaherize kwega enyegyesa za Baibuli ezirikutandikirwaho, kandi barikuta omu nkora ebi beegire kworeka ngu nibeetegyereza kandi nibaikiiriza emitindo ya Yehova ehikire. Okwongyera ahari ekyo, nk’abakuratsi ba Yesu Kristo baine kuba nibamanya ekicweka eky’omu nsi eky’ekibiina kya Yehova ekirikwebemberwa Yesu Kristo kurabira omu ‘mwambari ow’okwesigwa kandi ow’obwengye.’ (Mat. 24:45-47; Byak. 1:8) Ahabw’okwetegyereza obukuru bw’obwire obuturimu, nibakwatanisa n’abaheereza ba Yehova omu kukora omurimo ogu Yesu yaatandikireho kandi akagutsigira abakuratsi be. (Luk. 8:1; Mat. 24:14) Okubatizibwa omu maizi kw’abeegi aba n’akamanyiso akarikworeka okwehayo kwabo ahari Ruhanga Yehova.​—Reeba Zab. 40:8.

Ni kirungi kumanya ngu nituba nituhwera abeegi ba Baibuli kuba abakuratsi ba Yesu Kristo kwonka batari baitu. N’ahabw’ekyo, twine kumanyisa abareeberezi enshonga ezirikubaasa kuturemesa kuhwera omwegi wa Baibuli kuhika aha kuba omukuratsi wa Kristo nka, embeera zaitu, obwire,nari ekindi kyona. Abareeberezi nibabaasa kutuha obuhabuzi obu turikubaasa kukoresa kuhwera omwegi kwongyera kutunguuka, nk’oku kirikworekwa omu bigambo bya Paulo ebiri omu 1 Abakorinso 3:5-9.

Omwegi wa Baibuli aine kugumizamu naayega kuhitsya obu araaheze ebitabo ebi bibiri Niki Eki Baibuli Buzima Erikwegyesa? na “Mwerindire omu Kukunda kwa Ruhanga,” n’obu yaakuba yaabatiziibwe. Kimwe aha bitabo ebi kyaba kitariho nari byombi omu rurimi oru omwegi arikukoresa, noobaasa kukoresa akatabo akandi koona akateirwe ekibiina akarikushoborora enyegyesa za Baibuli enkuru kandi karikworeka emitindo ya Yehova ehikire ei twine kugyenderaho.