Norwanirira Ekigambo kya Ruhanga?
1 Omu nsi egi etarikwikiriza ngu Baibuli ehikire kandi ngu n’Ekigambo kya Ruhanga, Abakristaayo ab’amazima n’obweziriki nibakirwanirira. Turikuhamya ngu ‘Ebyahandiikirwe byona, bihandiikisiibwe [o]mwoyo wa Ruhanga,’ nitwikirizana na Yesu Kristo, owaagizire ati arikushaba Yehova: “Ekigambo kyawe n’amazima.” (2 Tim. 3:16; Yoh. 17:17) Nitubaasa tuta kurwanirira gye Ekigambo kya Ruhanga?
2 Manya Ebyahandiikirwe: Hatariho kubanganisa, Yesu akaba ataho age kushoma Ekigambo kya Ruhanga. Eki kikamubaasisa kukoresa Ebyahandiikirwe omu buheereza bwe bwona. (Luka 4:16-21; 24:44-46) N’enki ekirikubaasa kutuhwera kuguma nitwijuka ebyahandiikirwe bingi? N’okushoma Baibuli buri izooba kandi tukacumitiriza aha runyiriri orwatugaruramu amaani nari oru turikubaasa kukoresa omu kubuurira. Twaba nitutebeekanisiza enteerane, tushemereire kusherura kandi tukashoma kuruga omu Baibuli ebyahandiikirwe ebyayorekwa kandi tukatebeekanisa kugira eki twabigambaho. Twaba turi omu nteerane, tushemereire kukuratira omuri Baibuli zaitu omugambi yaaba naashoma ebyahandiikirwe. Okumanya ebyahandiikirwe nikwija kutuhwera ‘kushoboorora gye ekigambo ky’amazima.’—2 Tim. 2:15.
3 Reka Baibuli Eyegambire: Twaba nitubuurira, tushemereire kureka Baibuli ekeegambira. Nk’eky’okureeberaho, kyaba nikibaasika, tushemereire kuteeraho kushomera ou twashanga omu ka ekyahandiikirwe kandi tukakigaaniiraho. Yaagira eki yaabuuza nari eki yaahakanisa, ni kirungi okukoresa Baibuli kumugarukamu. Yaaba aine bingi ebi arikukora, nabwe nitubaasa kumworeka eki Baibuli erikugamba turikugira tuti: “Ntakagyenzire, nyikiriza nkutsigire ekiteekateeko ekiri omu kyahandiikirwe eki.” Kyaba nikibaasika, mushomere kuruga omu Baibuli obwo arikukuratira.
4 Omuntu omwe ku yaayorekirwe ebyahandiikirwe ebirikworeka ngu enyegyesa y’obushatu egwire, akagira ati: “Kwiha ngira obwengye ntuura ninza omu kanisa, kwonka buzima ntwire ntarikumanya ngu Baibuli neegamba eti!” Akaikiriza kwegyesibwa Baibuli. Yesu akagira ngu entaama ze zikaba niziija kuhurira eiraka rye. (Yoh. 10:16, 27) Omuringo ogurikukirayo oburungi ogu ab’emitima egororokire barikubaasa kwetegyererezamu amazima n’okugeerebera omu Byahandiikirwe. N’ahabw’ekyo ka tuteereho kurwanirira Ekigambo kya Ruhanga ekirimu amazima!