Teeraho Kuhika Abantu aha Mutima omu Kwegyesa Kwawe
1 Nk’oku entumwa Paulo yaabaire akora, omubuurizi murungi nawe naamanya ngu ‘okushoboorora gye ekigambo ky’amazima’ nikukira aha kujuriza Ebyahandiikirwe Ebirikwera kwonka. (2 Tim. 2:15) Nitubaasa kukoresa tuta Ekigambo kya Ruhanga, kuhika abantu aha mutima?—Byak. 28:23.
2 Yoreka Ou Orikubuurira Eki Ekigambo kya Ruhanga Kirikugamba: Eky’okubanza, gamba ahari Baibuli omu muringo oguraareetere ou orikubuurira kwetegyereza ngu erimu obwengye kuruga ahari Ruhanga. Okworeka ngu nooyesiga ebiri omu Kigambo kya Ruhanga nikibaasa kuhiga ou orikubuurira kufayo kuhurikiza waaba noomushomera ekyahandiikirwe. (Heb. 4:12) Ou orikubuurira noobaasa kumugira oti: “Nshangire kirikuhwera kumanya eki Ruhanga arikugamba aha nshonga egi. Yetegyereze oku Ekigambo kye kirikugira.” Kyaba nikibaasika, teeraho kworeka ou orikubuurira eki Ekigambo kya Ruhanga kirikugamba orikumushomeramu.
3 Ekya kabiri, shoboorora ekyahandiikirwe eki waashoma. Abantu baingi nikibagumira kwetegyereza ekyahandiikirwe aha murundi gw’okubanza kukibashomera. Butoosha twine kushoboorora oku ekyahandiikirwe ekyo kirikuhikaana n’ebi turiyo nitugambaho. (Luk. 24:26, 27) Hamiiriza ebigambo omu kyahandiikirwe ekyo ebirikushagika enshonga enkuru ei murikugambaho. Waabuuza ou orikubuurira ekibuuzo noobaasa kumanya yaaba yaayetegyereza gye enshonga enkuru ey’ekyahandiikirwe ekyo.—Enf. 20:5; Byak. 8:30.
4 Hikaanisa Nawe Ebiteekateeko aha Byahandiikirwe: Ekya kashatu, Teeraho kuhika ou orikubuurira aha mutima. Hwera ou orikubuurira kureeba oku ekyahandiikirwe kirikumukwataho nk’omuntu. Okuhikaanisa ebiteekateeko n’omuntu aha Byahandiikirwe nikibaasa kumureetera kuhindura aha miteekateekyere ye. (Byak. 17:2-4; 19:8) Nk’eky’okureeberaho, waaheza kumushomera Zaaburi 83:18 noobaasa kuhikaanisa nawe ebiteekateeko aha ku okumanya eiziina ry’omuntu kiri kikuru omu kugira nawe omukago guhamire. Noobaasa kumubuuza oti: “Nooteekateeka ngu okumanya eiziina rya Ruhanga nikiija kureetera eshaara zaawe kugarukwamu?” Okuhikaanisa ekyahandiikirwe n’embeera z’ou orikubuurira nikibaasa kumuhwera. Okwegyesa omu muringo nk’ogwo turikukoresa Ekigambo kya Ruhanga, nikuhiga abacureezi kuramya Yehova Ruhanga ow’amazima kandi ohuriire.—Yer. 10:10.
[Ebibuuzo by’obucweka]
1. Okukoresa gye Ekigambo kya Ruhanga omu kubuurira obutoosha nikutwariramu ki?
2. Nitubaasa kuhwera tuta abantu kwongyera kukunda Ekigambo kya Ruhanga?
3. Bwanyima y’okushomera omuntu ekyahandiikirwe, niki eki orikubaasa kukora kumuhwera kwetegyereza amakuru gaakyo?
4. Niki ekya kashatu eki twine kukora kuhika omuntu aha mutima omu kwegyesa kwaitu?