Yegyesa Abandi Kukunda Yehova
1. N’enki ekirikureetera bamwe kukunda Yehova?
1 Noijuka obu waabanza kuhuurira ebirikukwata ahari Yehova? N’enki ekyakureetaire kumukunda? Abantu baingi ab’emitima egororokire nibaija kukugira ngu bakakunda Yehova bwanyima y’okwega aha mitwarize ye mirungi, n’okukira munonga embabazi ze na rukundo ye.—1 Yoh. 4:8.
2, 3. Nitubaasa kukoresa tuta akatabo Eki Baibuli Erikwegyesa kuhwera abeegi ba Baibuli kweyongyera kukunda Yehova?
2 “Ogu Niwe Ruhanga Waitu”: Akatabo Eki Baibuli Erikwegyesa nikagamba munonga ahari rukundo ya Yehova kandi kooreka obukuru bw’okwegirira omukago nawe. Nitubaasa kukoresa tuta akatabo aka okwegyesa abandi kweyongyera kukunda Ruhanga? Twaba nitugamba aha kintu kisya, nitubaasa kubuuza omwegi ekibuuzo ekirikwija kumureetera kuteekateeka, nka: “Eki nikitwegyesa ki ahari Yehova?” nari “Enshonga egi neeyoreka eta ngu Yehova niiwe Omuzaire murungi munonga?” Okwegyesa omu muringo ogu nikubaasa kuhwera omwegi kutandika kugira omukago guhamire na Yehova.
3 Twahwera abeegi ba Baibuli kwetegyereza ngu buzima n’omugisha okwega ahari Ruhanga ow’amazima kandi ohurire, nibaija kwikirizana n’ebigambo bya Isaaya owaagizire ati, “ogu niwe Ruhanga waitu.” (Isa. 25:9) Twaba nitushoboorora aha Kigambo kya Ruhanga, nitwenda kuhamiiriza oku okuhikirizibwa kw’ebigyendererwa bya Yehova kurabira omu gavumenti ye erikutegyekwa Kristo Yesu kurikwija kureetera abantu emigisha.—Isa. 9:6, 7.
4, 5. Okukunda Yehova nikimanyisa ki?
4 Okworeka ngu Nookunda Yehova: Nitumanya ngu okukunda Yehova n’omutima gwaitu gwona, n’amagara gaitu goona, nikitwariramu ekirikukira aha kugamba bugamba ngu n’okunda Ruhanga. Twine kwikiriza kandi tukahamira aha biragiro bye. (Zab. 97:10) Rukundo ei twiniire Ruhanga nitugyoreka turikworobera ebiragiro bye byona kandi turikugumizamu kuba “abarikwera kandi abarikutiina Ruhanga omu mitwarize,” nangwa n’obu twakuba nitugyezibwa nari nituhakanisibwa.—2 Pet. 3:11; 2 Yoh. 6.
5 Okukora ebi Ruhanga akunda ahabw’okumukunda nikireeta okushemererwa. (Zab. 40:8) Omwegi wa Baibuli aine kwetegyereza ngu ebiragiro bya Ruhanga byona biriho kugasira abaheereza ba Ruhanga obwire bwona. (Bir. 10:12, 13) Omuntu ku arikugyendera aha buhabuzi bwa Yehova, naayoreka ngu naasiima emirimo Ye emirungi munonga. Hwera omwegi wa Baibuli kwetegyereza ngu okugyendera omu mihanda ya Yehova nikirinda omuntu oburemeezi bwingi.
6. Ni migisha ki ei omuntu arikubaasa kutunga ahabw’okukunda Yehova?
6 Emigisha Ahari Abo Abarikukunda Yehova: Yehova naata omutima munonga ahari abo abarikumukunda, kandi naabashuuruurira ‘ebintu eby’omunda ebya Ruhanga.’ (1 Kor. 2:9, 10, NW) Ahabw’okugira ngu nibamanya ebigyendererwa bya Yehova, nibeetegyereza gye ebirikwija kubaho omu biro by’omumaisho kandi baine amatsiko aga buzima. (Yer. 29:11) Abo abarikukunda Yehova naabagirira embabazi ezitaine bugarukiro. (Kur. 20:6) Nibagira amatsiko g’okutunga amagara agatahwaho ahabwa rukundo mpango ei Ruhanga abainiire.—Yoh. 3:16.
7. Nootwara ota okwegyesa abandi ebirikukwata ahari Yehova?
7 Oku turaayeyongyere kumanya ebirikukwata ahari Tataitwe ow’omu iguru, nikwo turaije kweyongyera kubimanyisa abandi. (Mat. 13:52) Ka twine omugisha gw’amaani gw’okwegyesa abandi, n’okukira munonga abaana baitu kukunda Yehova! (Bir. 6:5-7) Itwe hamwe n’abu turikwegyesa Baibuli, ka tugumizemu nituhimbisa Ruhanga obwo turikureeba ‘oburungi bwa Yehova bwingi.’—Zab. 145:7.