Akabokisi K’ebibuuzo

◼ Abarikuba nibaza kugaitwa baayenda kugaitirwa omu Kyombeko Ky’Obukama, ni bintu ki ebi bashemereire kugaaniiraho n’abareeberezi b’ekibiina?

Okugaitwa okuteebekanisiibwe kurugiirira aha misingye ya Baibuli nikuhaisa Yehova ekitiinisa na munonga okurikuba omu Kyombeko ky’Obukama, obu abantu abandi barikureeba emirimo erikukorerwa aha mwanya ogwo nk’eine akakwate n’ekibiina kyaitu. Kugira ngu ‘ebintu byona bikorwe gye, bitebeekanisiibwe,’ kihikire abareeberezi b’ekibiina kugaaniira n’abarikuba nibaza kugaitwa aha nshonga zimwe ezirikukwata aha kugaitwa kwabo.​—1 Kor. 14:40.

Abarikuba nibenda kugaitirwa omu Kyombeko ky’Obukama bashemereire kuhayo okushaba kwabo omu buhandiikye aha kakiiko k’obuheereza ak’ekibiina ekirikukoresa Ekyombeko ky’Obukama ekyo. Bashemereire kuhayo ebaruha yaabo kare kandi boorekye ebiro n’eshaaha obu barikwenda kukoresa Ekyombeko ekyo. Bashemereire kwijuka ngu abareeberezi tibarikwija kuhindura eshaaha z’enteerane ahabw’okugaitwa okwo. Okwongyera ahari ekyo, abarikuba nibaza kugaitwa bashemereire kuba baine emitwarize eshemeire, barikugyendera aha misingye ya Baibuli n’emitindo ya Yehova.

Okuhamya ngu okugaitwa okwo nikuza kuhaisa Ruhanga ekitiinisa, abarikuba nibaza kugaitwa bashemereire kugaaniira n’akakiiko k’obuheereza batakacwiremu ebi barikuza kukora. N’obu abareeberezi batashemereire kugambira abarikuba nibaza kugaitwa eki bashemereire kukora, kwonka haaba haine ekitarikwikirizibwa ekirikuza kukorwa, abarikuba nibaza kugaitwa bashemereire kukora empindahinduka. Ebyeshongoro ebirikuruga omu kitabo kyaitu ky’ebyeshongoro nari Kingdom Melodies nibyo byonka ebishemereire kukoresibwa. Abareeberezi bashemereire kworekwa oku Ekyombeko ky’Obukama kirahuundwe n’oku entebe ziraateerezibwe. Baaba nibateera ebishushani nari nibakwata vidiyo, tibishemereire kushiisha ekitiinisa ky’omukoro. Abareeberezi nibabaasa kwikiriza abarikuza kugaitwa kukoresa Ekyombeko ky’Obukama kwegyezamu oku baraatwaze ekyo kyaba kitarikuteganisa entebeekanisa z’ekibiina ezindi. Tihariho kaada ezishemereire kuhanikwa ahu amabaruha g’ekibiina garikuhanikwa. Kwonka, abareeberezi nibabaasa kucwamu ngu ekirango kigufu kirangwe omu Ruteerane rw’Obuheereza kumanyisa ekibiina ebikwatiraine n’okugaitwa okurikwija kuba omu Kyombeko ky’Obukama.

N’obu kiraabe kitari kiragiro ngu abagore n’abo abarikuba babashagatiire ngu babe babatiziibwe, nikiba kitahikire kuba harimu abu emitwarize yaabo etarikuhikaana na Baibuli nari abu emicwe yaabo erikubaasa kuha ekishushani kibi abo abaija. Orubazo orurikukwata aha kugaitwa rushemereire kuheebwa omureeberezi kyaba nikibaasika. Abareeberezi baine obumanyirizi omu kwegyesa Ekigambo kya Ruhanga, n’ahabw’ekyo nibabaasa kworeka emisingye ya Baibuli erikukwata gye aha mukoro ogwo. (1 Tim. 3:2) Okuragaana kw’abarikugaitwa nikukira kukorwa hariho omureeberezi oyikiriziibwe, orikuhamya ngu abantu bataaha omu bushwere obuhikire.

Obu emikoro y’okugaitwa erikukwata aha mureeberezi orikuba naaza kugyebembera, ashemereire kumanyisibwa kare entebeekanisa zoona ezikozirwe. Ashemereire kugamba n’abarikuba nibaza kugaitwa okubaasa kumanya oku baabaire nibatwaza omu kweriima; bashemereire kumugambira byona bataine ki barikumushereka. Omwe ahari bo yaaba yaabaire yaashweir[w]eho, ashemereire kuha obuhame oburikworeka ngu kurugiirira omu Byahandiikirwe ahikire kushwera nari kushwerwa ondiijo. (Mat. 19:9) Eki nikitwariramu okworeka abareeberezi ebaruha erikworeka ngu akagaitururwa.

Abarikuba nibaza kugaitwa bo bonka ku barikukwatanisa gye kandi bakakwatanisa gye n’abareeberezi, okugaitwa nikureeta okushemererwa ahari boona.​—Enf. 15:22; Heb. 13:17