Eizooba ry’Omutaano ery’Okushaba Abantu Kubeegyesa Baibuli
1 Okutandika na Jenwari, buri kibiina nikiija kugira wiikenda emwe buri kwezi, obundi nk’erikubanza omu kwezi, okuta omutima aha kushaba abantu kubegyesa Baibuli. Nikibaasa kukorwa aha Rwamukaaga nari Sande, okurugiirira aha kibiina kyanyu. Aha izooba eryo, abu turikubuurira baayanga kwikiriza kwegyesibwa Baibuli, ababuurizi nibabaasa kugumizamu bagabe akatabo Eki Baibuli Erikwegyesa nari zaamagaziini ensya. Abareeberezi boona n’abaheereza bashemereire kutebeekanisa kwejumbira kimwe omu murimo ogu n’okuhwera ababuurizi kutandika kwegyesa abantu Baibuli.
2 Akakiiko k’Ekibiina ak’Abareeberezi abarikukora aha by’obuheereza nikaija kucwamu eizooba eri muraakorese kushaba abantu kutandika kubeegyesa Baibuli. Ababuurizi bashemereire kuguma nibaijutsibwa, kugira ngu betebeekanise kandi bateereho kushaba abantu kubegyesa Baibuli barikubuurira enju aha nju na baaba nibagarukayo ow’abo aboorekire ngu nibenda kumanya ebirikukiraho.
3 Oku Twine Kwetebeekanisa: Nitubaasa kushanga obuhabuzi aha kutandika kwegyesa abantu Baibuli aha kapapura k’omunda aka Our Kingdom Ministry aka Jenwari 2006 n’aha rupapura 12 omu katabo Reasoning. Abamwe nibabaasa kucwamu kukoresa kaaturakiti, nka Nooyenda Kumanya Amazima? N’aha rupapura 3 orwa Obuheereza Bwaitu obw’Obukama aka Agusto 2007 hariho obuhabuzi aha kutandika kwegyesa Baibuli abo abaikiriize zaamagaziini. Abareeberezi n’abaheereza nibaija kuba nibakoresa edakiika 10 nari 15 okwebembera oruteerane rw’okwetebeekanisa kuza kubuurira, omu barikubaasa kworekyera oku turikubaasa kutandika kwegyesa omuntu Baibuli.
4 N’eky’amazima, ti buri omwe ngu naija kwikiriza kwega Baibuli nari kugumizamu kugyega kumara obwire buraingwa. Ekyo tikishemereire kutuzibira kushaba abantu kutandika okubegyesa Baibuli, ahakuba Yehova niwe arikureeta abantu abacureezi omu kibiina kye. (Yoh. 6:44) Omurimo gwaitu ti kubiba embibo z’amazima kwonka beitu n’okuzihingirira kandi tukaziitirira kugira ngu zitsimbe emizi, kandi ekyo nikitwariramu okwega Baibuli n’ab’emitima mirungi. Twakora tutyo, nitworeka ngu nitusiima omugisha gw’okuba abakozi abarikukora hamwe na Ruhanga.—1 Kor. 3:9.