Butoosha Ba Oyeteekateekire Kushaba Omuntu Kumwegyesa Baibuli
1. Niki ekirikutwarirwa omu kuhikiiriza omurimo ogurikworekwa omuri Matayo 28:19, 20 ogu Yesu yaatuhaire?
1 Yesu akatuha omurimo ‘gw’okuhindura abantu abeegi . . . , n’okubeegyesa.’ (Mat. 28:19, 20) N’ahabw’ekyo, obwire bwona nitwenda kuba tweteekateekire kwegyesa abantu Baibuli beitu ritari eizooba ryonka eri ekibiina kyaitu kyataireho kushaba abantu kubeegyesa Baibuli. Obuhabuzi obu ahaifo nibubaasa kuhwera.
2. Ni baahi abu turikubaasa kushaba kwegyesa Baibuli?
2 Shaba Abantu Kubeegyesa Baibuli: Oku turikweyongyera kushaba abantu kubeegyesa Baibuli, nikwo turikwija kugira emigisha y’okutunga ow’okwegyesa Baibuli. (Mub. 11:6) Waateireho kushaba omuntu kumwegyesa Baibuli? Ab’omu kibiina kimwe omuri Amerika bakata omutima aha kukora ekyo okumara okwezi kwona. Bakashemererwa munonga okureeba ngu bakatandika kwegyesa Baibuli abantu basya 42. Otakaateekateeka ngu abantu abarikwenda kumanya ebirikukiraho abu orikugarukayo kutaayaayira, nibamanya ngu nooyenda kubeegyesa Baibuli. Waagarukayo omurundi ogundi, teeraho kubashaba kubeegyesa Baibuli. Aha omurundi ogwo ku baarayangye, nikiba kitaine nshonga. Noobaasa kugumizamu kubahwera kukunda kwega Baibuli. Waashabire abataahi, abanyabuzaare, abu orikukora n’abo n’abu orikushoma n’abo kubeegyesa Baibuli? Noobaasa kubuuza abeegi baawe ba Baibuli baaba baine abanywani nari abanyabuzaare abarikwenda kwega Baibuli.
3. Niki ekirikubaasa kutuhwera kutandika kwegyesa abantu Baibuli, kandi nitubaasa kukikoresa tuta?
3 Ekirikuhwera Munonga: Ekirikutuhwera munonga omu kutandika kwegyesa omuntu Baibuli ni kaaturakiti Nooyenda Kumanya Amazima? Noobaasa kukaha abu orikubuurira yaaba nibaikiriza ebitabo ebindi nari batarikubiikiriza. Nikabaasa kukoresibwa mwaba nimubuurira omu bicweka ebirikukorerwamu eby’obushuubuzi, murikubuurira aha nguuto, murikwoherereza abantu amabaruha nari mwaba mugarukireyo ahari abo abarikwenda kumanya ebirikukiraho. Nimubaasa kukatsiga ei mutashanga bantu muka. Teeraho kugyenda nako waaba nooza aha rugyendo, waaba nooza kugura ebintu na waaba nooza aha murimo? Enyima yaako omu bugufu nikashoboorora entebeekanisa yaitu ey’okwegyesa abantu Baibuli kandi nikanjura n’akatabo Eki Baibuli Erikwegyesa.
4. Nitubaasa kukoresa tuta kaaturakiti Nooyenda Kumanya Amazima kutandika kwegyesa omuntu Baibuli?
4 Bwanyima y’okuha omuntu kaaturakiti ako, noobaasa kumworeka ebibuuzo ebiri aha nturukiriro yaako reero omubuuze oti: “Ni kibuuzo ki ahari ebi eki waakwenzire kutunga ekigarukwamu kyakyo?” Reero mureebe hamwe ekigarukwamu kyakyo ekiri omu kaaturakiti ako, reero oshome nari ogambe aha biri aha nyima y’akapapura ako ebirikushoboorora entebeekanisa y’okwegyesa abantu Baibuli. Reero noobaasa kumworeka ahu ebirikukiraho ebirikukwata aha nshonga egyo birikushangwa omu katabo Eki Baibuli Erikwegyesa, reero omuhe akatabo ako, okore entebeekanisa y’okwija kugarukayo mukagumizamu nimwega.
5. Ahabw’enki obutoosha tushemereire kushaba abantu kubeegyesa Baibuli?
5 Omu kicweka eki turikubuuriramu hakirimu abantu abarikwenda kumanya eki Baibuli buzima erikwegyesa. Okuteeraho obutoosha kushaba abantu kubeegyesa Baibuli, nitwija kutunga okushemererwa okurikuruga omu kuhwera abandi kuza omu ruguuto orurikuhitsya omu magara agatahwaho.—Mat. 7:13, 14.