Akabokisi k’Ebibuuzo

◼ Abajurizi ba Yehova bashemereire kujanjaaza embazo ezikwatsirwe aha ntambi nari ezihandiikirwe?

Embazo ezirikukwata ahari Baibuli buzima nizitugaruramu amaani. (Byak. 15:32) N’ahabw’ekyo, tikirikutangaaza okureeba ngu abamwe nibateeraho kuha abantu abarikuba bataizire mu nteerane entambi eziriho embazo nk’ezo. Ahabw’okugira ngu hati hariho ebintu bingi eby’okukwata amaraka, kyorobi okukwata embazo ezo aha ntambi reero zikaheebwa abandi. Abamwe bagumire nibabiika embazo aha ntambi, otwariiremu n’embazo ezaahairwe omu myaka ey’enyima, kandi baine ebigyendererwa birungi nibaha banywani baabo embazo ezo. Abandi batandikireho emikura ahari Intaneeti reero baataho embazo ezo ahabw’abo boona abarikwenda kuziihaho.

Twakwata embazo aha ntambi turikwenda kuzekoreseza nari kuziha ab’omu ka yaitu ekyo ti kibi. Ekindi, abareeberezi nibabaasa kutebeekanisa kugira ngu embazo zikwatwe aha ntambi reero ziheebwe ab’eishe-emwe abaine amaani mabi abatarikubaasa kwija omu nteerane. Kwonka, hariho enshonga nungi ahabw’enki tutashemereire kujanjaaza embazo ezikwatsirwe aha ntambi nari ezihandiikirwe.

Obu embazo butoosha zirikuheebwa zirikukwata aha byetengo by’ekibiina eki zaaheebwamu, ni kirungi okutajanjaaza embazo ezikwatsirwe aha ntambi nk’ezo, obu turikuba tutarikumanya embeera ezareeteire orubazo rwaheebwa omu muringo ogwo. Ekindi, nikiba kitoorobi itwe okumanya owaahaire orubazo orwo n’obu yaaruha, okubaasa kuhamya ngu ebyagambirwe omu rubazo orwo nibihikaana n’obwire obu turimu nari bihikire. (Luk. 1:1-4) Ekindi, okujanjaaza embazo nk’ezo nikibaasa kureetera bamwe kuhimbisa abantu nari kwikiriza kuhimbisibwa.—1 Kor. 3:5-7.

Omwambari orikwesigwa kandi ow’obwengye naakora n’amaani kutuha eby’okurya eby’omwoyo ‘ebirikumara’ kandi ‘omu bunaku obuhikire.’ (Luk. 12:42) Ekyo nikitwariramu okukora entebeekanisa kugira ngu embazo ziheebwe omu bibiina by’Abajurizi ba Yehova hamwe n’ebikwatsirwe omu maraka kubaasa kwihwa aha mukura gw’ekibiina ogw’aha Intaneeti ogurikwetwa jw.org. Nituhamya ngu omwambari orikwesigwa kandi ow’obwengye hamwe n’Akakiiko Akareeberezi nibaija kutuha ebi turikwetenga kubaasa kuguma tuhamire omu kwikiriza.—Byak. 16:4, 5.