Eby’Okureeberaho
◼ Australia: Yohaana, omushaija owaabaire ayeegire munonga, akatandika kuza omu kanisa akiri muto, kwonka bwanyima akareka kwikiriza ngu Ruhanga ariho. Payoniya omwe akamutsigira akatabo Was Life Created?, bwanyima ku yaagarukireyo ya mutsigira akatabo Origin of Life. Payoniya ogwo akaguma na mutwarira magaziini ensya kandi yaguma naamworeka ebicweka ebirikukwata aha byahangirwe nari aha obunabi bw’omu Baibuli. Ku yaareebire ngu Yohaana ahikire kutandika kushoma akatabo The Bible—God’s Word or Man’s? yaakamuha. Yohaana ku yaaherize kukashoma yaahindura emiteekateekyere ye. Bwanyima, payoniya ogwo akamuha akatabo Eki Baibuli Erikwegyesa, yaamworeka akacweka 8 aha rupapura 20 n’akacweka 13-16 aha rupapura 23-24. Yohaana akashemererwa munonga ahabw’ebyahandiikirwe ebyabaire byorekirwe omu bucweka obwo yagira ati: “Shana ninyetenga kugaruka kushoma Baibuli.”
◼ Mexico: Omushaija omwe akagambira omubuurizi ku atarikwikiriza ngu Baibuli ekahandikisibwa Ruhanga. Omubuurizi yaamushaba kumworeka obuhame oburikworeka oku Baibuli yaahandiikisibwe Ruhanga nawe yaikiriza. Bwanyima y’okumara obwire barikuhikaanisa ebiteekateeko aha biri omu Baibuli, omushaija ogwo akakwatwaho ebi yaabaire naayega. Akagambira omubuurizi ogwo ati: “Omu kubanza nyowe naiwe ku twabaire tushoma Baibuli, obuhabuzi bwayo bukaba bunshushanira nk’oburikuruga omu bitabo ebindi kandi bukaba butankwataho. Kwonka hati ku turikushoma omu Baibuli na munonga obuhabuzi oburikukwata aha micwe, ningira obusaasi omu mutima.”
◼ United States: Omushaija n’omukazi we ku baabaire nibabuurira omu bicweka by’endembo empango ebirimu abantu baingi, bakabugana omukazi orikuruga Taiwani owaabaire naateekateeka ngu Baibuli n’ekitabo kya Abajungu. Akaza aha meeza eyaabaire eriho ebitabo byaitu ahakuba akaba aburaaburirwe n’obu araabe yaabaire aine esente zirikumara. Omukazi ogu akaba aine amatsiko ngu Baibuli neija kumuhwera kubaasa kugira amagara againe ekigyendererwa. Bakatandika kwega n’omukazi ogwo barikukoresa akatabo Eki Baibuli Erikwegyesa hamwe n’akatabo Lasting Peace and Happiness—How to Find Them. Omu mwanya gw’okwega eshuura 2 omu katabo Eki Baibuli Erikwegyesa, bakahikaanisa ebiteekateeko aha kicweka ky’akatabo akaine omutwe “Ekitabo Ekirikuhwera Abantu Boona Kutunga Emigisha.” Bwanyima y’okuhikaanisa ebiteekateeko aha bucweka mukaaga oburikubanza omu kicweka eky’akatabo ako, omukazi akatangaara kumanya ngu Baibuli n’ey’omutaano wagigyeragyeranisa n’ebitabo ebindi eby’ediini. Bwanyima y’okuhikaanisa ebiteekateeko aha bunabi bw’omu Baibuli obwahikiriziibwe, akagira ngu, “Ninteekateeka ngu tihariho kitabo ekindi ekihikire kandi ekirikwesigwa nka Baibuli!”
◼ Japan: N’obu ou omubuurizi yaabuurire yaamugarukiremu ngu tarikwikiririza muri Ruhanga, omubuurizi we akaguma nagarukayo arikuhikaanisa nawe ebiteekateeko aha biri omu Awake! ahansi y’omutwe “Mbwenu Shi Kikahangwa?” Mpora mpora omushaija ogwo akahindura emiteekateekyere ye yaatandika kwikiriza ngu hariho omuhangi. Hati naikiriza ngu Ruhanga ariho, kandi omubuurizi naayega nawe akatabo Amakuru Marungi Kuruga Ahari Ruhanga!
◼ Canada: Munyaanyazi-itwe akaha omukazi magaziini ensya owaabaire naaruga omunju arikuza omu motoka ye. Munyaanyazi-itwe ku yaagarukireyo, omukazi ogwo yaamugira ngu ebi yaashomiremu tarabikunzire kandi ngu tarikwikiririza muri Ruhanga. Munyaanyazi-itwe tarahweire maani kandi akamutwarira akatabo A Satisfying Life—How to Attain It. Munyaanyazi-itwe ku yaagarukire ow’omukazi ogwo, akamugira ngu n’obu araabe atarikwikiririza muri Ruhanga, akaguma namuteekateekaho ahabw’okuba omuzaire omwe. Akooreka omukazi ogwo akacweka 6 aha rupapura 4 omu katabo ako, aharikworeka ahu turikubaasa kwiha obuhabuzi burungi. Reero yaamuhiga kushoma ebiri omu ishomo 2 aha bikwatiraine n’okworora abaana. Omukazi akatwara akatabo ako.