Ta Omutima aha Kuhindura Abantu Abeegi
1. Twine kukora ki kuhwera abantu kubaasa kuhonokaho?
1 Ripoota y’omwaka gw’obuheereza 2014 neeyoreka obweziriki bw’abaheereza ba Ruhanga n’okumariirira omu kubuurira amakuru marungi g’Obukama. (Mat. 24:14) Okubuurira enju aha nju, okwejumba omu kampeyini z’okugaba turakiti n’okugaba obupapura bw’okweta abantu, hamwe n’okubuurira omu myanya erikuba erimu abantu baingi, byona ebi nibitubaasisa kubuurira abantu baingi amakuru marungi kuruga omu Baibuli kukira oku kiraabaire. Kwonka, abantu kubaasa kuhonokaho, twine kubahwera kuhinduka abeegi ba Yesu turikubeegyesa Baibuli.—1 Tim. 2:4.
2. Nitubaasa kwebuuza bibuuzo ki ebiraatuhwere kuta omutima aha kutandika kwegyesa abantu Baibuli?
2 Ba Oyeteekateekire Kutandika Kwegyesa Omuntu Baibuli: Omuntu yaayoreka ngu naayenda kumanya ebirikukiraho, nooteeraho kutunga endagiriro ye kandi orahuka kugarukayo n’ekigyendererwa ky’okutandika kumwegyesa Baibuli? Ni ryaari obu waahereeruka kuteeraho kwegyesa omuntu Baibuli aha murundi gw’okubanza kumubuurira? Ni ryaari obu waahereeruka kushaba abu orikuguma nootwarira magaziini kubegyesa Baibuli? Waayorekire abu orikukora nabo, abu orikwega nabo, bataahi baawe, abanyabuzaare na banywani baawe vidiyo Ahabw’Enki Oshemereire Kwega Baibuli? na Niki Ekirikutwarirwa omu Kwegyesibwa Baibuli? Mwaba nimukoresa akagaari nari emeeza ebi murikutaho ebitabo, abarikutwara ebitabo ebi turikukoresa kwegyesa abantu Baibuli, nooteeraho kubamanyisa ngu ebitabo ebyo nitubikoresa kubeegyesa Baibuli hatariho kushashura?
3. Nitwetenga ki kubaasa kwegyesa gye abantu amazima?
3 Okuhwerwa Yehova na Yesu: Yesu okugira ngu ‘mugyende, muhindure abantu abeegi,’ akooreka ngu twine kukora n’amaani omu kubuurira. Kandi, taratusigire twenka, akaraganisa kuguma naatuhwera. (Mat. 28:19, 20) Ekindi, Yehova atuhaire omwoyo gurikwera, eby’okukoresa hamwe n’okutendekwa oku turikwetenga kubaasa kwegyesa abantu amazima. (Zek. 4:6; 2 Kor. 4:7) Nitubaasa kushaba Ruhanga kutuhwera kwejumba omu murimo ogu omukuru.—Fil. 2:13.
4. Ahabw’enki twine kuta omutima aha kuhindura abantu abeegi?
4 Okubuurira amakuru marungi nikitureetera okushemererwa kwingi. Kwonka, okushemererwa kwaitu nikweyongyera twayegyesa omuntu amazima kandi tukamuhwera kutwegaitaho omu ‘irembo eririkutaasya omu magara.’(Mat. 7:14; 1 Tes. 2:19, 20) Ekikuru munonga, twata omutima aha kuhindura abantu abeegi, nitushemeza Yehova ‘otarikwenda muntu weena kuhwerekyerera, kureka oyenda ngu boona bahikye aha kweteisa.’—2 Pet. 3:9.