Ebi Turikukoresa omu Kwegyesa Abantu Baibuli
1. Abakristaayo nibashushana bata n’ababaizi?
1 Ababaizi nibaba baine eby’okukoresa bingi. Ebimwe nibikoresibwa bumwe na bumwe, kandi ebindi birikukoresibwa butoosha. Ababaizi abakugu nibaguma baine haihi eby’okukoresa ebirikukira kukoresibwa, kandi nibyo barikumanya kukoresa gye. Baibuli neehiga buri Mukristaayo kwezirikira okubuurira n’okuba “omukozi otashemereire kukwatwa nshoni.” (2 Tim. 2:15) Itwe nitukoresa ki kwegyesa abantu Baibuli? Nitukoresa Ekigambo kya Ruhanga kuhindura abantu “abeegi.” (Mat. 28:19, 20) N’ahabw’ekyo, twine kuteeraho kwega ‘kushoboorora gye ekigambo ky’amazima.’ Kwonka, hariho ebindi ebi turikukira kukoresa, ebi Abakristaayo boona baine kwega kukoresa gye baaba nibeegyesa abantu Baibuli.—Enf. 22:29.
2. Ni butabo ki obu turikukoresa kwegyesa abantu Baibuli?
2 Ebi Turikukira Kukoresa omu Kwegyesa: Oyihireho Baibuli, hariho ebindi ebi turikubaasa kukoresa? Eki turikukoresa ekikuru omu kwegyesa abantu amazima g’omu Baibuli, n’akatabo Niki Eki Baibuli Buzima Erikwegyesa? Orikwega Baibuli yaaheza kwega akatabo ako, nitukoresa akatabo “Mwerindire omu Kukunda kwa Ruhanga” kumuhwera kugyendera aha misingye ya Baibuli omu bi arikukora byona. N’ahabw’ekyo, twine kuteeraho kwega kukoresa gye obutabo obu bwombi. Obutabo obundi nabwo twine kubukoresa kutandika kwegyesa abantu Baibuli. Akatabo Amakuru Marungi Kuruga Ahari Ruhanga! ni kamwe aha butabo obushemereire kukoresibwa kutandika kwegyesa abantu Baibuli. Ekicweka eki turikubuuriramu haaba harimu abantu abatarikumanya kushoma gye nari abarikugamba orurimu oru twine ebitabo byarwo bikye nari tutabiine, nitubaasa kukoresa akatabo Hurikiza Ruhanga nari Hurikiza Ruhanga Obone Kugumaho Ebiro Byona. Kandi, akatabo Ni Baahi Abarikukora Ebi Yehova Akunda Obunaku Obu? niko turikukoresa kuhwera abarikwega Baibuli kumanya ekibiina kya Yehova. Vidiyo ezirikuhwera omu kuhindura abantu abeegi, nka Ahabw’enki Oshemereire Kwega Baibuli?, Niki Ekirikukorerwa aha Kyombeko ky’Obukama?, na Ruhanga Aine Eiziina?, twine kwega kuzikoresa gye.
3. Obuheereza Bwaitu obw’Obukama obu turaatungye omu Agusto nibwija kutuhwera kukora ki?
3 Obuheereza Bwaitu obw’Obukama obu turaatungye omu Agusto nibwija kutuhwera kumanya oku turikubaasa kukoresa gye ebiri omu butabo obuturikukoresa omu kwegyesa abantu Baibuli. Twateeraho kubikoresa gye, nitwija kuba nitukuratira obuhabuzi bw’omu Baibuli obu: “Oyerinde iwe wenka kandi n’omu bi orikwegyesa. Ogumizemu n’ebyo ahakuba omu kukora otyo, noija kwejuna kandi ojune n’abarikukuhurira.”—1 Tim. 4:16.